1 Iná nchanho Jesús cjoi ngaxinhi ná nihngo iná. Co nttiha tají ná xí que ndadixemadoho ná rá. 2 Co nttiha tetsaya canxion xifariseo para sicon xa aco sinchexingamehe xí mé ngain nchanho que nchejogaha ni, para jamé rrochonda quehe rrocjanguixin xa Jesús. 3 Cottimeja ndac̈ho Jesús ngain tti xí que ndadixemadoho ná rá:

―Dingattjen co darihi nttimé ngosine.

4 Cottimeja joanchiangui Jesús ngain xicanxin co ndac̈ho:

―¿Quehe jiquininxin sinchehe ni ngain nchanho que nchejogaha ni? ¿Asinchehe ni jian o sinchehe ni jianha? ¿Atsanc̈hjandaha ni ndasenhe ná chojni, o ani nasoenxon ni?

Co cain xa tencoa xa. 5 Cottimeja Jesús goñao co tsjehe ngain xa co anto vechín ixin vicon que jehe xa joinaoha xa coinxin xa de ixin Dios. Co ndac̈ho Jesús ngain tti venihi:

―Ttinxe rá.

Co jehe tti xí mé coinxe rá co ndaxingamehe ra. 6 Cottimeja cain xifariseo sacjoi xa co coexinhi xa cjoao xa chojni que vacao Herodes ixin queẍén sinchehe na para nasoenxon na Jesús.

7 Cottimeja Jesús sacjoixin de nttiha conixin cainxin chojni que vacao co sacjoi na para ngandehe lago de Galilea co anto tsje chojni Galilea rroé na. 8 Co chojni joixin de nontte dinhi Judea, de ciudad de Jerusalén co de ngain iná nontte dinhi Idumea. Icha chojni joixin lado c̈hinxin nchanho de río Jordán. Icha na joixin na de ngain ciudad de Tiro co Sidón. Co icha na joixin na de icha rajna. Cainxin chojni mé cjoi na joitsjehe na Jesús ixin jehe na conohe na de ixin cainxin cosa jian que vanchehe Jesús. 9 Mexinxin Jesús ndache chojni que vacao ixin cjoé na ná barco para sengá ngataonhe jinda are rroẍatte tsje chojni para sixintjaha chó na ngaca Jesús. 10 Ixin anto tsje chojni venihi joinchexingamehe Jesús, mexinxin cainxin ninihi vaẍattetja na Jesús para vacatte na. 11 Co are chojni que vechonda espíritu jianha vaguicon Jesús, vaguettoxin nttajochjihi co vandac̈ho sén:

―¡Jaha tti Xenhe Dios!

12 Pero Jesús vaquetonhe ixin rrondac̈hoha quensen jehe Jesús.

13 Cottimeja Jesús coani ná jna, co nttiha jehe vayé chojni que jehe joinao coinchiehe co jehe na conchienhe na ngain jehe. 14 Co jehe coinchiehe tteyó chojni para sacao co para rrorroanha na icanxin rajna para rronichja na joajné Dios. 15 Co joanjo joachaxin ngain na para sinchexingamehe na chojni nihi co para senguixin na espíritu jianha de ngain chojni. 16 Co janhi vinhi tti tteyó chojni mé. Ná vinhi Simón, co Jesús joincheguinhi jehe Pedro cai; 17 co Jacobo conixin Juan xanchó jehe Jacobo, co cayoi nimé xenhe Zebedeo co cayoi nimé Jesús joincheguinhi na Boanerges ixin anto c̈hintto vintte na; 18 co icha chojni vinhi Andrés; Felipe; Bartolomé; Mateo; Tomás; co iná tti vinhi Jacobo cai, pero mé xenhe Alfeo; co Tadeo; co Simón, jehe ná de tti partidoe chojni politico que vaquetocaho chojni romano; 19 co Judas Iscariote, tti joindac̈ho para tse na Jesús.

Cottimeja Jesús sacjoi ngain nchia tti vehe conixin cain chojni que vacao. 20 Co nttiha anto tsje chojni ẍatte iná co ẍonhi tiempo vechonda Jesús ni para joine conixin cain chojni que vacao. 21 Co are conohe niparienté Jesús ixin quehe vanchehe, jehe na cjoi na para sarrojicao na Jesús ixin ẍaxaon na que Jesús ndajoinchetján sentidoe.

22 Cai canxion ximaestroe ley que joixin de ciudad de Jerusalén ndac̈ho xa:

―Xí jihi chonda xa Beelzebú, tti ttetonha ngain cain espíritu jianha, ixin jehe xa nchao ttetonha xa co dengui xa espíritu jianha.

23 Cottimeja Jesús vayé cain chojni mé co ndac̈ho ná ejemplo ngain na:

―¿Satanás queẍén sengui ẍajeho Satanás? 24 Co si ná gobierno chjea para tsetocaho chó, gobierno mé c̈hoha tsonc̈hjenhe sé 25 co si ná nindoha ngain nchia atto tteto na, cai tsonc̈hjenha. 26 Co cai Satanás si tseto jeho, cai tsonc̈hjenha sé. Chonda que ndatsjexin.

27 ’Ẍonhi quensen sixinhi ngaxinhi nchiandoha ná xí que anto tsanga para santsjehe cosé xa que chonda xa ngaxinhi nchiandoha xa si tsiaha xa saho. Solo jamé para nchao sasicao cosé xa que jí ngaxinhi nchiandoha xa.

28 ’Anto ndoa tti rrondattjo ra: Cain chojni nchao sitjañehe cainxin cosa jianha que nchehe na co cainxin tti jianha que nichja na. 29 Pero chojni que nichja jianha ixin Espíritu Santo, chojni mé nchoe sitjañeha, co cainxin tiempo sintteca na tti jianha mé.

30 Jañá ndac̈ho Jesús ngain na ixin jehe na ndac̈ho na ixin Jesús vechonda espíritu jianha.

31 Cottimeja cjoi janné Jesús conixin xanchó pero c̈hoha joixinhi na nchia ixin anto tsje chojni te ngain Jesús. Mexinxin tavintte na ndoja co coetonha na que rroquí ngain na. 32 Co chojni que tate ngaca Jesús ndac̈ho na ngain:

―Janná co xanchó ndoja nttihi te na, co rinao na rronichjaha na jaha.

33 Co Jesús ndac̈ho:

―¿Quensen jannana, co quecá xanchian?

34 Cottimeja Jesús tsjehe ngayehe cain nite ngandanji jehe co ndac̈ho:

―Cain chojni tehe tti inchin jannana co jehe na tti inchin xanchian, 35 ixin quexeho chojni que nchehe inchin rinao Dios, mé tti xanchian co mé tti jannana.