1 Vitján yó nchanho para tti quiai dinhi pascua are jine na niottja que chondaha levadura. Co are mé cain xidána que vaquetonha ngain icha xidána co cain ximaestroe ley cjoé xa queẍén sinchehe xa para rrojincheyehe xa Jesús co rrotse xa co nasoenxon xa. 2 Pero ndac̈ho xa:

―Sonttoha na are mero quiai ixin cain chojni seguro tsoñaoa na na co tsetocoho na na.

3 Ná nchanho ngain rajna Betania Jesús tajine ngaxinhi nchiandoha Simón tti veninxin chin lepra. Co are jehe tají ngain mesa, joixinhi ná nc̈hí que joicao ná ẍoẍao de marmol jic̈he de aceite que anto ẍajni que diconchjian joxon ca dinhi nardo co aceite mé anto rentte. Condai nc̈ha ẍo mé co cointtjitaha nc̈ha cain aceite mé ngataha já Jesús. 4 Co canxion de tti nite nttiha goñao na co ndache chó na jeho na:

―¿Quedonda coxincoa aceite yá? 5 Nchao rrocochji aceite yá co anto tsje tomi rroguitte, inchin tsjexin dacha ná tti nchehe ẍa ngoixin ná nano. Co tomi mé nchao rrocjenguijna chojni noa.

Co joinchesattehe na tti nc̈hí mé.

6 Pero Jesús ndac̈ho ngain na:

―Tanc̈hjanda ra nc̈hí yá. ¿Quedonda nchesattehe ra? Jehe nc̈ha joinchehe nc̈ha ná cosa jian nganji na janha. 7 Chojni noa cainxin tiempo sintte na ngayaha ra, co nchao tsjenguijna ra na are jaha ra sinao ra. Pero janha cainxinha tiempo sarihi nganji ra. 8 Nc̈hí jihi joinchehe nc̈ha tti nchao conohe nc̈ha joinchehe nc̈ha. Ochjé nc̈ha cuerpona aceite para rroẍavá na. 9 Co seguro rrondattjo ra que ngoixin mundo tti rronichja na tti joajna que danjo iná vida naroaxin, cai rronichja na ixin quehe joinchehe nc̈hí jihi nganji na janha, para rroẍaxaon na de ixin jehe nc̈ha.

10 Cottimeja Judas Iscariote, jehe ná de tti tteyó chojni que vacao Jesús, cjoi ngain canxion xidána que vaquetonha ngain icha xidána, para cjoao chó na queẍén jehe Judas sanjo Jesús ngain xa. 11 Co are jehe xa coinhi xa ixin quehe joindac̈ho ngain xa anto ché xa, co ndac̈ho xa ngain ixin sanjo xa tomi. Cottimeja Judas coexinhi ẍaxaon ixin queẍén sinchehe para sinchechienhe Jesús ngain xa.

12 Ngain saho nchaoen quiai que jine na niottja que chondaha levadura, nchanho mé doen na coleco. Co chojni que vacao Jesús joanchianguihi na co ndac̈ho na ngain:

―¿Ttinó rinao sinttachjianxin na tti sintte soixin ngain quiai pascua?

13 Cottimeja Jesús coetonhe yó chojni que vacao co ndac̈ho ngain na:

―Ttji ra ngain ciudad de Jerusalén, co nttiha setan ra ná xí que jidicao ná nchíẍa de jinda. Sattjiho ra xí mé. 14 Co tti nchia sixinhi xa, nttiha ndache ra tti ndoha mé: “Tti Maestro ndac̈ho: ¿Ttinó jí cuarto tti sinexin ngain quiai pascua conixin cain chojni que dicao?” Jañá c̈hoache ra tti ndoha mé. 15 Cottimeja jehe tti ndoha mé tsjagoha ra ná cuarto jie ngain piso yoxin que onchao jí. Nttiha nchechjianxin ra tti sontte na.

16 Cottimeja cayoi chojni mé sacjoi na para ngain ciudad co vittja na cain inchin Jesús ndac̈ho ngain na. Co nttiha joinchechjianxin na tti joine na ngain quiai pascua.

17 Co are ondaconttie Jesús co tti tteyó chojni que vacao ẍatte na para joinecaho na. 18 Co are tene na, Jesús ndac̈ho ngain na:

―Janha seguro rrondattjo ra que ná de jaha ra ẍo tentte ra nganji na jaxon rrondache ra chojni queẍén para rrotse na na janha.

19 Cottimeja cain jehe na tavinttechín na co coexinhi na joanchianguihi na Jesús ná na co ná na, co ndac̈ho na:

―¿Apoco janha?

Co cai iná ndac̈ho:

―¿Apoco janha?

20 Co Jesús ndac̈ho:

―Ná de tti tteyó jaha ra que tejintte ra ngain láto jihi conixin janha. 21 Janha, tti Xí que joixin de ngajni, chonda que ndasenhe na inchin jitaxin ngain Palabré Dios, pero anto tangui tsonhe tti xí que rrondache chojni queẍén para rrotse na na; icha jian si jehe rrogoanha.

22 Co are tene na, Jesús coá niottja co chjé gracias ngain Dios, cottimeja váña nio, co joanjo nio ngain cain na co ndac̈ho:

―Jintte ra. Jihi rroc̈ho cuerpona.

23 Cottimeja coá Jesús vaso co chjé gracias ngain Dios, co joanjo ngain na cai, co cain na vihi na nchinnchin. 24 Co ndac̈ho ngain na:

―Jihi rroc̈ho jnina que nchesegurá tti trato naroaxin co sinttji jnina para tsjenguijna tsje chojni. 25 Co seguro rrondattjo ra que janha isiha tti danjo ttouva hasta tsí tti nchanho que janha sihi tti vino naroaxin ngain lugar tti ttetonha Dios.

26 Are vinttetsje na ná himno, cottimeja sacjoi na ngain jnanchjan que dinhi Nttaolivo. 27 Cottimeja Jesús ndac̈ho ngain na:

―Cain jaha ra sinttechinhi ra de ixin janha ngain ttie jihi, ixin jitaxin ngain Palabré Dios: “Janha, tti Dios, nasoenxon tti ttingaria coleco, co cain coleco ndarrochjequé va.” 28 Pero después que janha rroxechon na, cottimeja janha saho tsji Galilea que jaha ra.

29 Cottimeja Pedro ndac̈ho ngain Jesús:

―Masqui cain jehe na sinttechín na de ixin soixin, pero janha nahi.

30 Cottimeja Jesús ndac̈ho ngain:

―Janha seguro rrondattjo que ngain ttie jihi saho que conttaxichia rrotsje va yoxin nttiha, jaha orrondac̈ho ninxin nttiha ixin chonxinha na janha.

31 Pero Pedro ẍa ndac̈ho ngain Jesús:

―Masqui rrochonda que senhe na conixin jaha, pero janha rrondac̈hjanha ixin chonxinha.

Cai cain ni icha ndac̈ho na ẍajeho.

32 Cottimeja joiji na ngain ná lugar dinhi Getsemaní, co Jesús ndac̈ho ngain na:

―Tadintte ra nttihi are janha sinttatsán ñao Dios.

33 Co sajoicao jeho Pedro, Jacobo co Juan. Co Jesús coexinhi conohe ná joaẍaon anto soji co cai conohe anto jie joachjaon que joinchenihi ansén. 34 Co ndac̈ho ngain canio nijoicao:

―Janha tonona ngain ansenna ná joachjaon anto soji hasta rinaho ndasenhe na. Jaha ra dittoha ra nttihi, co dinttec̈hinha ra.

35 Cottimeja Jesús sacjoi nchion cjin de ngain na, co vejantaha ngataha nontte. Co joinchetsenhe ñao Dios que si nchao jehe rrogattoha ngain tiempo que jitonchian are jehe anto tangui tsonhe. 36 Co are jinchetsenhe ñao Dios, ndac̈ho:

―Padre, soixin nchao nchehe cainxin cosa. Mexinxin si nchao, tanc̈hjandaha na janha satto ngain tti anto tangui que tsonna. Pero tsoenha inchin janha rinaho, sino que tsonhe inchin soixin rinao.

37 Cottimeja cjan Jesús ngain tti vittohe canio chojni que vacao, pero otatejoa canio na. Co ndac̈ho ngain Simón Pedro:

―Simón, ¿aotarric̈hin? ¿Acoixianha tajoaritsjehe ni ná hora? 38 Tadinttetsjehe ra co nchetsenhe ra ñao Dios para que ẍonhi cosa jianha sinttatjanji ra. Ndoa, espiritua ra anto rinao sintte jian, pero cuerpoa ra sojiha.

39 Cottimeja cjan Jesús sacjoi para joinchetsenhe ñao Dios iná, co ndac̈ho ẍajeho. 40 Co are cjan joí ngain na jehe na otatejoa na iná ixin icoixinha con na de anto cottac̈hin. Co are xingamehe na ni inoencoa na quehe rrondac̈ho na ngain Jesús. 41 Cottimeja ninxin nttiha Jesús sacjoi para joinchetsenhe ñao Dios iná, co are cjan ngain na, ndac̈ho:

―Janché dinttec̈hin ra co nchejogaha ra ixin onchao; hora ojoi are janha, tti Xí que joixin de ngajni, chonda que tsonchian ngá rá chojni jianha. 42 Dingattjen ra, nttimé joí tti ndac̈ho queẍén para rrotse na na janha.

43 Are Jesús ẍa jinichja ngain tti ní chojni mé, joí Judas, ná de tti tteyó chojni que vacao Jesús, co joicao Judas anto tsje xí que teyá espada co nttá. Xidána que vaquetonha ngain icha xidána, ximaestroe ley co xittetonha ngain nihngo, xí mé rroanha xa cain chojni mé. 44 Judas, tti joindac̈ho queẍén para tse na Jesús, odindac̈ho ngain na ixin quexehe señal sinchehe ngain Jesús para jehe na nohe na quensen Jesús, co ndac̈ho:

―Tti janha tsetoxin para rrochjaha joajna, jehe mé. Tse ra co sattjiho ra co ttjiho ra cuidado jian que satsingaha.

45 Co are ojoí, jehe conchienhe ngain Jesús co ndac̈ho:

―Maestro, Maestro.

Co coetoxin Jesús. 46 Cottimeja tse na Jesús para sajoicao na.

47 Pero ná de tti vintte nttiha joantsje espadé co conc̈hinjihi na ndatsjoen ná xinchehe ẍé xidána icha importante. 48 Cottimeja Jesús ndac̈ho ngain cain chojni que joí:

―¿Quedonda jaha ra joihi ra conixin espada co nttá para rrotse ni ra janha como si janha rrocji ná tti chehe? 49 Anto tsje nchanho joarihi janha ngayaha ra ngain nihngo icha importante para jointtacoanha ra, co ẍonhi tiempo tse ni ra. Pero janhi tsonhe, para tsonhe inchin jitaxin ngain Palabré Dios.

50 Cottimeja cain chojni que vacao Jesús cointtohe na jeho, co jehe na sacoinga na.

51 Co cai nttiha ná xanxí vetsá xan jeho ná lontto roa. Co tse na xan. 52 Pero vac̈hjenga xan lontto mé co sacoinga xan ttolocho xan.

53 Cottimeja sajoicao na Jesús ngain xidána icha importante. Co ẍatte cainxin xidána que vaquetonha ngain icha xidána co cain xittetonha ngain nihngo, co cain ximaestroe ley. 54 Co Pedro ta tti cjin jirroexin hasta joiji ngain patioe nchiandoha xidána icha importante, co nttiha tavehe xiẍohe ngain ẍohi, jehe conixin xipolicié nihngo icha importante.

55 Cain xidána que vaquetonha ngain icha xidána, co cain xí que vechonda joachaxin ngain juzgadoe nihngo, cain xí mé cjoé xa queẍén sinchecaxin xa Jesús para nasoenxon xa Jesús. Pero c̈hoha vittjehe xa Jesús ni ná cosa jianha. 56 Co tsje na joinchecaxin na Jesús, pero ẍonhi chojni nichja ẍajeho inchin nichja iná chojni para joinchesegurá chó na. 57 Cottimeja canxion na vingattjen na co joinchecaxin na Jesús co ndac̈ho na:

58 ―Janha na coian na ndac̈ho xí yá ixin jehe tsonxantte nihngo icha importante jihi que dinchechjian chojni, co nincoa nchanho jehe xa sinchechjian xa iná nihngo que jeha chojni nchechjian.

59 Pero masqui ndac̈ho na jañá, ẍa nichjaha na mero ẍajeho.

60 Cottimeja xidána icha importante vingattjen xa ngayé cainxin na, co joanchiangui xa ngain Jesús co ndac̈ho xa:

―¿Aẍonhi rrondac̈ho jaha? ¿Quehe rroc̈ho cain tti jinichja chojni tehe de ixin jaha?

61 Pero Jesús ẍonhi nichja. Co jehe xa cjan xa joanchianguihi xa iná co ndac̈ho xa:

―¿Ajaha tti Cristo, Xenhe Dios que anto jian?

62 Co Jesús ndac̈ho:

―Ján, janha. Co sicon ni ra janha, tti Xí que joixin de ngajni, sarihi ngain lado jian de Dios, tti chonda cainxin joachaxin. Co cai sicon ni ra are rrocjan na sihi ngacjan ttjoi.

63 Cottimeja jehe xidána icha importante mé goñao xa. Mexinxin coinchje xa lonttoe xa, co ndac̈ho xa:

―¿Quedonda tsjé na icha chojni de testigo? 64 Jaha ra ocoinhi ra queẍén nichja xa jianha de ixin Dios. ¿Quehe ẍaxaon ra?

Co cainxin na ndac̈ho na ixin Jesús jiquininxin ndasenhe.

65 Cottimeja canxion na coexinhi na cointtjitte na nttatté na, co coejehe na con Jesús, co ẍanguí na manazo, co ndache na:

―Si jaha ná profeta, ndac̈ho quexehe tti goen.

Co cain xipolicié nihngo icha importante cai xanguí xa Jesús manazo.

66 Are Pedro tají nontte ngain patioe nchiandoha xidána icha importante, vatto ná nc̈himozé xidána mé. 67 Co are vicon nc̈ha Pedro tajixiẍohe ngandehe ẍohi, jehe nc̈ha tavengattjen nc̈ha, tsjehe nc̈ha co ndac̈ho nc̈ha ngain:

―Jaha cai vacjiho Jesús, tti joixin de Nazaret.

68 Co Pedro ndac̈ho ixin ndoaha ngain nc̈ha co ndac̈ho:

―Janha chonxinha xí yá, ni nonaha de quehe rrinichja jaha.

Cottimeja sacjoi para ngain puerté patio mé. Co rato mé tsje ná conttaxichia. 69 Co nc̈himoza mé cjan nc̈ha vicon nc̈ha iná, co coexinhi ndac̈ho nc̈ha ngain nite nttiha:

―Xí jiha ná xivacao Jesús.

70 Pero Pedro cjan ndac̈ho ixin ndoaha. Cottimeja icanxin nite nttiha ndac̈ho na ngain Pedro:

―Jaha seguro ná chojni que vacao Jesús, ixin jaha cai joixin regioen Galilea. Co inchin nichja chojni de Galilea, jamé nichja jaha.

71 Cottimeja Pedro jeho joanchia ná castigo ngain Dios para ixin jehe ixin joinchejurá ngain Dios co ndac̈ho:

―Janha chonxinha xí yá que jaha ra tendachjenji ni ra.

72 Co rato mé tsje conttaxichia yoxin nttiha. Cottimeja Pedro ẍaxaon tti ndac̈ho Jesús: “Icha saho que conttaxichia rrotsje va yoxin nttiha, jaha orrondac̈ho ninxin nttiha ixin chonxinha na janha.” Co are jehe ẍaxaon yá, jehe vehe tsjanga.