Unang Surat i
JUAN
Kepurisnan et itueng Surat neng 1 Juan
Itueng unang surat i Juan maya duwang megunang pegperuen. 1. Geyaten itueng memematsaꞌ na mengebiyagan na maya pekikipegsembatu dut Empuꞌ bekeꞌ eset Yegang Ye neng si Jesus Kristo, bekeꞌ, 2. Ipebtiꞌ dye atu eset pegandel et kaya sugat neng penulduꞌ. Itueng kaya sugat neng ketulduan, pegsugiren na meraat itueng dunyaꞌ, bekeꞌ si Jesus neng Yegang et Empuꞌ na lein lang tantung taaw. Pegsugiren et mengeꞌ kaya sugat neng menunuldung itue ne subaliꞌ melayam taaw eset misan enu negang kesusaan pasal atueʼt dunyaꞌ apang mebawiꞌ. Pegtulduꞌ dye gasi itueng kepuwasan kaya pesalan eset kenunganang arat etawa pegmergaʼt kesebeyaan, temed kaya sugat itue.
Bilang pegsungsang et itueng kaya sugat neng ketulduan, metlang na sinugid et nenurat na si Jesus Kristo banar na negmendyaring taaw samat kityu. Pegsugiren ye gasi, subaliꞌ megsimerganan tyu ginsan neng mengengandel ki Jesus bekeꞌ pegmergaꞌ dut Empuꞌ.
Ketulduan et itueng Surat
Penegnaan 1:1-4
Pasal et Telang bekeꞌ Kelingban 1:5—2:29
Mengeꞌ Yegang et Empuꞌ bekeꞌ Yegang et Seytan 3:1-24
Keberbenaran bekeꞌ Kebelingkegan 4:1-6
Gerar et Pegmergaꞌ 4:7-24
Kepengindeagan et Pengandel 5:1-21
1
Beres neng Megbegey et Biyag
(Juan 1:1-18)
1-2 Pegsuratan kay kemyu pasal et Kenye neng betangen Beres na megbebgey et biyag na eset penegnanan peꞌ Ya ne in. Nebunayag itueng Biyag, nebiriꞌ kay Ya in bekeꞌ pinesebenaran eset dimyu. Na Ya nekingeg kay, na itueng si Beres nesiyekan et mata damen, nesiyekan bekeꞌ nekpetan et keremut kay. Indyari pegtulduꞌ kay dimyu itueng biyag na kaya seskeran dingan et Empuꞌ Amaꞌ, na nebunayag damen. 3 Pepebunayag kay pesi eset dimu itueng nebiriꞌ bekeꞌ nekingeg kay, supaya kebayaꞌ kew damen eset pekikisembatu dut Empuꞌ Amaꞌ bekeꞌ eset yegang ye neng si Jesus Kristo. 4 Pegsuraten kay itue gasi supaya mesukup keenepan tyu.
Empuꞌ in Antangan Ye Siluꞌ
5 Itueng beres nekingeg kay eset Yegang ye, bekeꞌ pepebunayag kay eset dimyu, na antangen i Empuꞌ in siluꞌ, tibuuk na menunga, bekeꞌ kaya misan enu negang kelingban etawa kereatan eset kenye. 6 Na baꞌ pegsugiren tyu na kityu kesembatu ye, segwaꞌ megpengebiyagan gasi dut kelingban, megpengembut kityu bekeꞌ kaya lang pengebiyagan et kuyun dut keberbenaran. 7 Segwaꞌ baꞌ pengebiyagan tyu eset ketlangan, baꞌ enukwan ya in eset telang, kityu pemegunung-unung bekeꞌ pegunasan et duguꞌ i Jesus neng Yegang ye itueng ginsang keselaan tyu.
8 Na baꞌ pegsugiren tyu na kityu kaya keselaan, pegekalan tyu lang bilug tyu in, bekeꞌ kaya ne eset kityu in keberbenaran. 9 Na baꞌ pepebunayag tyu itueng mengeꞌ keselaan tyu, mearap tyu na empunen kityu et Empuꞌ, bekeꞌ gunasan kityu eset ginsan neng mengeꞌ salaꞌ sabab ya in mebentel. 10 Na baꞌ pegsugiren tyu kaya pegsalaꞌ tyu, pegbuwaten tyu na meembut Empuꞌ, bekeꞌ kaya ne eset kityu beres Ye.