Surat i Pablo dut mengeꞌ tawʼt
GALASIA
Kepurisnan et itueng Surat neng Galasia
Ganang mebunayag itueng penulduꞌ pasal ki Jesus Kristo bekeꞌ terimanen et mengeꞌ taaw na lein lang Judio, maya nemegingkut na baꞌ merapat nega telinganen itueng Keseraan binggey et Empuꞌ ki Moises tagnaꞌ tiꞌ apang megmendyaring mengengandel ki Jesus. Sinugid i Pablo na diki ne. Dut ketentuan et pengandel, mesugid atin na binggey ne kedye itueng meget neng kekemdesan et biyag na pekikisembatu ki Jesus Kristo itueng pegpengandel dye.
Pebiyaꞌ lang eset pegpengandel dut ki Jesus Kristo, pinuwasen et Empuꞌ kedyeng keselaan ginsan. Megdemikian dut mengeꞌ mengengandel et Galasia, sembatung probinsiya Romano et Asia minor. Segwaꞌ diki nekwit diminateng duun mengeꞌ megsungsang ki Pablo, indyari negsugid na subaliꞌ nega sukupen itueng lelaging Keseraan binggey et Empuꞌ ki Moises tagnaꞌ tiꞌ, apang mepuwas et Empuꞌ, lein lang pebiyaꞌ et pengandel ki Jesus lang, samat tinulduꞌ i Pablo nekeuna tiꞌ.
Itueng pinurisnan et pegsurat i Pablo eset tawʼt Galasia na mengandel peuliꞌ eset tantung pegpengandel itueng mengeꞌ nerundingan et belingkeg neng ketulduan. Negtagnaꞌ si Pablo pebiyaꞌ dut pegapin eset kenyeng kepetutan na metingkag et bibilinan i Jesus Kristo. Binggeyan yeʼt kepengenan itueng peggerar bilang bibilinan na mewanaʼt Empuꞌ, lein lang eset kepengyedian et taaw, itueng kenyeng adyat dut mengeꞌ tawʼt lein Judio.
Pegketbes et itue, pineretiꞌ ye na pebiyaꞌ lang eset pegpengandel dut ki Jesus, mepuwas ne mengeꞌ salaꞌ et mengeꞌ taaw dut elepan et Empuꞌ. Dut emuring kapitulo iperetiꞌ i Pablo na itueng kebiyagan et mengengandel i Jesus mekseg ne megburbur sabab eset pegmergaꞌ na buaꞌ et pegpengandel ki Kristo.
Ketulduan et itueng Surat
Penegnaan 1:1-5
Kepurisnan et Surat i Pablo 1:6-10
Itueng Kepengyedian i Pablo Bilang Bibilinan 1:11—2:21
Pengandel Lang Surungan dut Kepuwasan et Empuꞌ 3:1—4:31
Itueng Keleyaman bekeꞌ Kesukuan et mengeꞌ Mengengandel 5:1—6:10
Penimpusan 6:11-18
1
1 Itueng surat mawaꞌ ki Pablo neng ginerar na Bibilinan i Jesus Kristo*1:1 “Bibilinan” i Jesus Kristo, etawa Apostol, bekeꞌ sembatung pegibuten et mengeꞌ mengengandel, sampay pebunayag dye et Menungang Abar pasal ki Jesus Kristo. Betsaen Keradya 1:13, 26., na surung dut dimyu na megpengandel ki Jesus Kristo dut mengeꞌ tawʼt Galasia. Aku tuꞌ binilinan na memunayag et Menungang Abar, temed daken neng kepegewlaan lein lang teyeg et taaw na nemiliꞌ et daken. Segwaꞌ nemiliꞌ eset daken si Jesus Kristo bekeꞌ kityung Empuꞌ Amaꞌ, na nemangun et biyag i Jesus mawaʼt kepeteyan. 2 Aku bekeꞌ ginsan neng mengengandel atue negpebibit et beres surung mengeꞌ megpegtingtimungan duntin.
3 Meseʼt dimyu teyen itueng redyikiꞌ bekeꞌ kesenangan mawaꞌ dut Empuꞌ Amaꞌ bekeꞌ mawaꞌ Begerar tyu neng si Jesus Kristo.
4 Sinimayaꞌ i Jesus Kristo kenyeng biyag sabab et kityung keselaan apang ipelayam tyu eset keyeatan na pemegbeg tiban eset sengketelingkepan. Itue nebuwat i Jesus Kristo sabab penelinga yeʼt kegeayan et Empuꞌ Amaꞌ tyu. 5 Na subaliꞌ bentugen tyu Empuꞌ misan ingyan! Amen.
Itueng Tantung Menungang Abar
6 Negliluꞌ ku banar eset dimyu na baꞌ manu takuꞌ merugey kew lang tinenelikud dut Empuꞌ na piniliꞌ eset dimyu pebiyaꞌ eset redyikiꞌ i Jesus Kristo dimyu. Na tiban ibuten myu ibang ketulduan na keblan myu ating Menungang Abar†1:6 Menungang Abar - Ating abar teyeg et Empuꞌ Banar pasal et paru Ye apang ugaren dusa et mengeꞌ salaꞌ tyu, bekeꞌ kityu mendyaring metignaꞌ dut kebiriꞌ Ye sabab et sinimayaꞌ i Jesus neng bayad na kepuwasan et salaꞌ tyu. Kaya sabab et keradya tyu, temed lang sabab et keradya i Empuꞌ pasal kityu. Ating ne Menungang Abar eset kityu! pasal dut kepuwasan eset kityu et Empuꞌ. 7 Segwaꞌ asal kaya lang pinegleinan ye eset Menungang Abar pasal dut peglekat eset kityu et Empuꞌ. Temed maya mengeꞌ taaw na menasew lang et dimyung pikiran, bekeꞌ gaay sembian itueng Menungang Abar pasal ki Jesus Kristo. 8 Misan ne kami, etawa dereakan et Empuꞌ neng mawaꞌ dut langit na ketulduꞌ eset dimyu na maya pinegbidaan dut ating Menungang Abar neng pegpeabar kay dimyu, ya tantu na sumurung dut Narkaꞌ. 9 Sene tiꞌ sinugid kay ne itue dimyu, indyari seulinen ku tiban, baꞌ maya sembatu megpengabar et Menungang Abar temed maya pinegbidaan lyu dut tantung ketulduan na tinerima myu lelagi, ye in keberbenaran kesurung dut Narkaꞌ.
10 Kasiꞌ myu pegpikiraꞌ na gaay ku mengeꞌ taaw mengdayew eset daken, sabab diki ne! Pegpurisnan ku kebentugan et Empuꞌ. Kasiꞌ myu pegpikiraꞌ na gaay mengdayew et mengeꞌ taaw, sabab na baꞌ atin peggeayan ku, diki ku ne megpeuripen ki Jesus Kristo.
Enungkwan Negmendyaring Bibilinan si Pablo et Empuꞌ
11 Mengeꞌ ketipusdan neng mengengandel ki Jesus Kristo, gaay ku isugid dimyu na itueng Menungang Abar na pegpebunayag ku eset dimyu, puun ye lein lang mawaꞌ dut seled pikiran et taaw. 12 Diki lang itue tinerima ku mawaʼt taaw etawa ketulduan lang et taaw. Imbes tinerima ku itue sabab pinebunayag eset daken i Jesus Kristo.
13 Netampar eset dimyu na baꞌ enukwan ku nengebiyagan sene tiꞌ na tantu megdapit dut egama et tawʼt Judio. Sebarang pemengandel ki Jesus Kristo in tantu pegtiksaen ku bekeꞌ gaay ku inturen banar supaya binesanen pegandel dye bekeꞌ kaya misan sembatu metinda na mengengandel i Jesus. 14 Bekeꞌ mengeꞌ kesebeyaan ku neng Judio na keumur ku, diki dye aku melumbaan eset kepitukan dut egama et Judaismo. Itueng keeratan et kityung kegunggurangan gey-gaay ku banar.
15 Temed misan aku kwantin ne, minergaꞌ bekeꞌ iningesinan nega akuʼt Empuꞌ. Misan ne aku ingga peꞌ pinengganak, nepiliꞌ Ye na lagi aku bekeꞌ binwat Ye akuʼt dereakan Ye. 16 Indyari ganang nepikir Ye ne pinebunayag Ye eset daken itueng Kenyeng Yegang, apang metulduꞌ ku itueng Menungang Abar pasal Kenye dut kemyu neng mengeꞌ tawʼt lein Judio, kaya lang nengaru ku eset misan sinu. 17 Kaya ne siminurung ku misan dut lungsud et Jerusalem apang mekipegbiriꞌ dut mengeꞌ bibilinan na una eset daken. Imbes, siminurung ku megtuy dut probinsiya et Arabia, pegketbes negpeuliꞌ ku ne gasiʼt lungsud et Damasko. 18 Nekelabay nega telung teun mura ku timinungul dut Jerusalem apang mekipegbiriꞌ ki Pedro, indyari sempuluꞌ limang eldew kay negbeꞌbayaꞌ. 19 Kaya ku nekebiriꞌ et misan sinung bibilinan luwas ki Jakob na tipused i Jesus neng Begerar.
20 Tantung keberbenaran itueng pegsugiren ku atueʼt surat. Sewd et Empuꞌ, na kaya lang pengembut ku.
21 Pegketbes siminurung ku dut mengeꞌ kelungsuran et probinsiya et Siria bekeꞌ Silisia. 22 Atin neng timpuꞌ, sebarang pegtimung-timungan et mengeꞌ mengengandel ki Jesus Kristo dut probinsiya et Judea, kayangga peꞌ nekebiriꞌ eset daken. 23 Ganang nekingeg dye lang itueng susugiran, na kwan dye, “Itueng taaw na tagnaꞌ tiꞌ neniksaꞌ eset kityu, na tiban mengengabar ne ya pasal eset pegandel, na tagnaꞌ tiꞌ gaay ye binesanen.” 24 Indyari nememantug dye ne eset Empuꞌ sabab et ipebuwat et Empuꞌ daken.
*1:1 1:1 “Bibilinan” i Jesus Kristo, etawa Apostol, bekeꞌ sembatung pegibuten et mengeꞌ mengengandel, sampay pebunayag dye et Menungang Abar pasal ki Jesus Kristo. Betsaen Keradya 1:13, 26.
†1:6 1:6 Menungang Abar - Ating abar teyeg et Empuꞌ Banar pasal et paru Ye apang ugaren dusa et mengeꞌ salaꞌ tyu, bekeꞌ kityu mendyaring metignaꞌ dut kebiriꞌ Ye sabab et sinimayaꞌ i Jesus neng bayad na kepuwasan et salaꞌ tyu. Kaya sabab et keradya tyu, temed lang sabab et keradya i Empuꞌ pasal kityu. Ating ne Menungang Abar eset kityu!