2
Atin Ikepitung Eldew
1 Indyari netbes et Empuꞌ dunyaꞌ bekeꞌ langit sampay ginsaʼt sunuꞌ ye sukup ne. 2 Na, nepetaren Empuꞌ Elohim et ikepitung eldew, sabab netbes ye ginsan neng kineradya ye. 3 Angkansa, pinenunganen sampay pineseridiꞌ ye ikepitung eldew apang ipetignaꞌ sabab atin kepeternan et ginsan neng kineradya ye et pegguna.
4 Itue pebnar pasal et pegguna et langit bekeꞌ dunyaꞌ sampay ginsan et sunuꞌ ye.
Luluwakan et Eden
Ganang ginuna ne i Yahweh Elohim neng Empuꞌ langit bekeꞌ dunyaꞌ,*2:4 Yahweh Elohim neng Empuꞌ - Itue ngaran et Empuꞌ Banar dut langit. 5 kayangga peꞌ nega mengeꞌ kekeyuan sampay kayangga peꞌ timinuhuꞌ mengeꞌ ginis neng luluwaken sabab ingga peꞌ nepedlekan ye dunyaꞌ bekeꞌ ingga peꞌ taaw penguma. 6 Segwaꞌ, maya danum neng neperibuwat teyeg et lugtaꞌ na diminanum et sengkedunyaan.
Ating Unang Taaw Ginuna et Empuꞌ
7 Indyariꞌ nisiꞌ si Yahweh Elohim neng Empuꞌ et lugtaꞌ, ginuna ye et tawʼt lelaki sampay tinepiugan ye delang et erung ating guminawa. Angkansa, itueng taꞌaw negmendyaring biyag.
8 Pegketbes, nemaal si Yahweh Elohim neng Empuꞌ et luluwakan dut Eden dut tampar sebangan. Pinelegdeng ye duntin taaw neng binaal ye. 9 Pinetuhuꞌ Yahweh Elohim neng Empuꞌ duntin ginsan neng ginisan et kayu neng keireg-ireg dut pemiriꞌ bekeꞌ menungang kanen. Pinetuhuꞌ ye gasi dut tengaꞌ sembatung puun et kayu na megbebegey et biyag, bekeꞌ sembatung kayu megbebegey et pegkesewd et menunga bekeꞌ meyaat.
10 Maya danum, puun ye megburbur et Eden. Atin ne megtebung et mengeꞌ luluwakan. Teyeg duntin nebagiꞌ ne et epat neng kedenuman. 11 Ingaran et unang danum Peson. Atin ne megburbur et sengkelungsuran et Habila, na duntin maya bulawan. 12 Menunga banar bulawan dut ating lungsud. Maya gasi bebengluen bekeꞌ mengeꞌ batu neng oniks. 13 Ingaran et ikeruwang danum Gihon. Atin ne megburbur et lungsud et Kus. 14 Tigris ingaran et iketlung danum neng megburbur gasi dut tampar sebangan et Asiria. Ikeepat neng sanga et danum pegngeranan Eprates.
15 Pinelegdeng i Yahweh Elohim neng Empuꞌ ating lelaki dut luluwakan et Eden apang umanen bekeꞌ ingetan ye. 16 Binilinan i Yahweh Elohim neng Empuꞌ lelaki, kwan ye, “Kekaan keʼt sebarang buaꞌ et kayu dut seled luluwakan. 17 Segwaꞌ, kasiꞌ kanaꞌ buaꞌ et kayu neng pegkesewd et menunga bekeꞌ meyaat, sabab baꞌ kanen mu ating buaꞌ, tantu matey ke.”
Ginuna et Empuꞌ Libun
18 Pegketbes, kwan i Yahweh Elohim neng Empuꞌ, “Kaya menunga baꞌ yaya lang lelaki. Baalan ku ya et ketabang neng keteup et kenyeng mengeꞌ keilangan.” 19 Angkansa, nisiꞌ et lugtaꞌ si Yahweh Elohim neng Empuꞌ apang baalen ye et ginsan neng mengeꞌ ayup bekeꞌ ginsan neng mengeꞌ begit. Binibit ye dut lelaki apang mesewran baꞌ enu ngeranan ye kedye. Angkansa, mayang itingkag et lelaki dut kedye atin ne ingaran dye. 20 Ngineranan et lelaki ginsan neng ayup, bekeꞌ ginsan neng begit, sampay ginsan neng mengeꞌ ayup et talun. Segwaꞌ kaya lang nekebiaꞌ lelaki et ketabang neng keteup kenye.
21 Angkansa gasi pineigaꞌ i Yahweh na Empuꞌ neng meelek ating lelaki. Indyari sasat ya megigaꞌ, insiꞌ et Empuꞌ sembatung tekgang et lelaki, empaꞌ ne pinepilat ye megtuy itieng insian ye in. 22 Ginuna ye et libun itueng tekgang neng insiꞌ ye dut lelaki. Tebes binibit ye dut lelaki. 23 Sinugid et lelaki, kwan,
“Itue ne sembatung keragbes ku, tulang na insiꞌ eset tulang ku, sampay uned ye insiꞌ eset uned ku.”
Ngeranan ye et libun, sabab insiꞌ ya mewanen eset lelaki.
24 Angkansa, itue sabab manu tirengan et lelaki induꞌ sampay amaꞌ ye apang pebulun dut esawa ye sampay mendyaring samat sembatung taaw dye ne.
25 Ating lelaki bekeꞌ esawa ye meglelbas nega, segwaꞌ kaya dye meglew.