1 Ininunga et Empuꞌ Elohim si Noe bekeꞌ mengeꞌ keyegangan yeng lelaki, kwan ye kedye, “Megyegang kew bekeꞌ kumeldam kew apang meletapan myu sengkedunyaan. 2 Ginsan neng mengeꞌ ayup sampay mengeꞌ begit bekeꞌ ginsan neng mengeꞌ ayup neng meglempey sampay mengeꞌ seraꞌ tumakut dimyu. Ibgey ku dimyu ginsan apang kemyu mengmilik dye. 3 Binggey ku dimyu ginsan neng ayup apang mekedyaring pegkaan myu. Samat pegkaan myu et mengeꞌ luluwaken tagnaꞌ, dugangan ku tiban ginsan. 4 Segwaꞌ, diki myu mekaan uned et ayup neng kaya inugaran et duguꞌ, sabab seled atin biyag ye. 5 Mayang mengimatey, belsen ku misan ayup ya. Belsen ku gasi mayang mengilang et ginawa et sebayaꞌ ye. Itue sugiren ku dimu. 6 Baꞌ mayang mengimatey, imeteyen gasi ya et taaw sabab binaal ku ketaawan samat dagbes et diriꞌ neng Empuꞌ.*9:6 Betsaen Tagnaꞌ 1:26, 27 pasal et dagbes et Empuꞌ.

7 “Dimyu tahag ku, megyegang apang kumeldam kew. Letapiꞌ myu sengkedunyaan.”

8 Dinugangan et Empuꞌ Elohim beres ye ki Noe sampay dut mengeꞌ keyegangan yeng lelaki neng iba ye, kwan ye, 9 “Tiban tektakan ku ikew sampay mengeꞌ keupuꞌupuan myu et tinangeꞌ. 10 Kwantin gasi itangeꞌ ku dut ginsan neng mengeꞌ ayup neng iba myu samat mengeꞌ begit bekeꞌ mengeꞌ meguep sampay meklag neng ayup, misan gasi dut ginsan keldamen et liminiwan et kelang kapal letew. 11 Itue penektak ku dimyu. Ginsan neng megiginawa diki ne mebinasa peuliꞌ et liyud. Sampay diki ne binesanen peuliꞌ et liyud itueng dunyaꞌ.”

12 Indyariꞌ sinugid et Empuꞌ Elohim, “Tendaꞌ itue et tangeꞌ ku dimyu bekeꞌ dut ginsan indeginis neng ayup neng meiba myu seked dut keskeran et mengeꞌ tutusan. 13 Pebeluntung ku dut inarak. Atin tendaꞌ et tinangeꞌ ku et sengkedunyaan. 14 Meinabu itue. Baꞌ ipekunem ku bekeꞌ mebiriꞌ myu memeluntung et kunem, 15 merendeman ku tinangeꞌ ku dimyu sampay dut ginsan ginis neng pebibiyag. Diki ne lumyud danum apang mebinasa ginsan neng pebibiyag. 16 Baꞌ memeluntung dut kekuneman, mebiriꞌ ku apang merendeman ku et kaya keskeran na tinangeꞌ ku et ginsan neng pebibiyag et dunyaꞌ.” 17 Angkansa, sinugid et Empuꞌ Elohim ki Noe, “Atin ne tendaꞌ et penangeꞌ ku dut ginsan neng ginis pebibiyag et dunyaꞌ.”

18 Itue mengeꞌ ingaran et mengeꞌ kelelekian neng yegang i Noe na liminiwan et kelang kapal letew. Si Sem, si Japet bekeꞌ si Ham neng amaꞌ i Kanaan. 19 Mengeꞌ yegang i Noe itueng telung megtipused. Teyeg kedye mengeꞌ taaw neng liminatap et sengkedunyaan.

20 Neinabu gasi na megunang nengluwak et ubasan si Noe sabab mengunguma ya. 21 Kasa ninum ya et alak et ubas seked linenguan ya, bekeꞌ nekeigaꞌ ya et meglelbas dut tetluan ye. 22 Nebiriꞌ i Ham neng amaꞌ et mengeꞌ tawʼt Kanaan na meglelbas amaꞌ ye. Pineabar ye dut duwang ketipusdan ye neng dut liwan. 23 Indyariꞌ, si Sem bekeꞌ si Japet nisiꞌ et kumut. Ginantuy dye bekeꞌ siminled apang tegmunan dye bilug et amaꞌ dye. Neketelikud dye kenye bekeꞌ tinegmun dye bilug ye. Mendiꞌ dye mebiriꞌ meglelbas amaꞌ dye. 24 Ganang nelibuasan ne si Noe, nesewran ye kineradya et yegang yeng ariꞌ. 25 Sinugid ye, “Mebusung mengeꞌ tawʼt Kanaan. Uripenen dye et mebabang ginisan neng uripen bekeꞌ timuruen dye mengeꞌ tipused dye.” 26 Sinugid ye nega, kwan, “Bentugen si Yahweh neng Empuꞌ Elohim i Sem. Indyariꞌ pesariꞌ ne tawʼt Kanaan menimuru ki Sem. 27 Dugangan teyen lugtaꞌ neng milikan i Japet. Kelegdeng ya teyen dut mengeꞌ benwa neng tetluan i Sem. Indyariꞌ pesariꞌ ne mengeꞌ tawʼt Kanaan menimuru gasi kede Japet.” 28 Pegketbes et liyud negbiyag nega si Noe et telung gatus limampulung teun. 29 Siyam neng gatus limampulung teun sinkeran et umur i Noe. Indyariꞌ, natey ya.