Surat i Pablo dut mengeꞌ tawʼt
PILIPOS
Kepurisnan et Itueng Surat neng Pilipos
Si Pablo sembatung Bibilinan i Jesus Kristo. Sinurat ye itueng surat lebi ne 2,000 teun tagnaꞌ tiꞌ, petsa na 60 AD. Sinurat i Pablo dut ketingtimungan et mengengandel dut lungsud et Pilipos, ating unang ketingtimungan binaal i Pablo dut Europa, dut Masedonia, sembatung probinsiya et bangsa neng Roma. Sinurat ye itue ya na dut pipirisuan dut lungsud et Roma. Ating masa pegeriweraan ya et pegsagkaꞌ et ibang mengengandel petudyu kenye bekeꞌ mesusa ya sabab et kaya megpesembatu dut iba-ibang mengeꞌ mengengandel et ketingtimungan et Pilipos. Ya in mebiꞌbirinan et kelemian bekeꞌ tuwakal na ganang neretian lang na itueng si Pablo na maya mepangger neng pengandel ki Jesus Kristo.
Punsabab et Kesuratang itue peselematan mengeꞌ mengengandel et Pilipos na negsembatu ki Jesus Kristo sabab et bebgey na tinabang dye eset timpung pengengeilangan i Pablo. Ipinebunayag i Pablo kenyeng pegarap eset kedye, apang maya kedye tuwakal bekeꞌ kepengenan et seled eset kenyeng pegeriweraan bekeꞌ kedyeng timpung kesusaan gasi. Pegpeasi-asi ye kedye megmendyaring kebebaang seled saliꞌ i Jesus, imbes pebulag eset diring gaay bekeꞌ keebuan. Pegperendeman ye na kedyeng pekikipegsembatu ki Kristo atin begey et pegmergaꞌ i Empuꞌ, na tinerima dye tudyu eset pengandel dye ki Jesus, lein lang eset kedyeng keendelen eset ketehagan et Keseraan et mengeꞌ tawʼt Judio. Sinurat ye pasal et itueng kelemian bekeꞌ kesenangan pegbegey et Empuꞌ eset mengeꞌ pengebiyagan na maya pekikipegsembatu ki Jesus Kristo.
Ketulduan et itueng Surat
Penagnaꞌ 1:1-11
Antangen et diriꞌ i Pablo 1:12-26
Pengebiyagan neng pekikisembatu ki Kristo 1:27—2:18
Paru ki Timoteo bekeꞌ ki Epaprodito 2:19-30
Peamay-amay pasal et kebanta bekeꞌ ketekutan 3:1—4:9
Salamat i Pablo sabab et tabang et mengeꞌ bibilaꞌ ye dut Pilipos 4:10-20
Ketimpusan 4:21-23
1
1 Kami neng si Pablo bekeꞌ si Timoteo, mengeꞌ tetehagen i Jesus Kristo, bekeꞌ itue surat kay dimyu set Pilipos neng mengeꞌ tawʼt Empuꞌ pebiyaꞌ et nekipegsembatu myu ki Jesus Kristo,* 1:1a Kristo - ingin bersen ating taaw piniliꞌ et Empuꞌ apang mendyaring mememawiꞌ, bekeꞌ derateng neng Surutan. Betangen Ya gasi ating “Mesias”. iba gasi mengeꞌ pegibuten et mengeꞌ mengengandel sampay mengeꞌ menenabang kedye.† 1:1b mengeꞌ menenabang - dut Griego, “mengeꞌ obispo bekeꞌ diakono dye”. Dut Tagalog, “sa mga tagapangasiwa at sa mga tagapaglingkod”.
2 Meseʼt teyen dimyu ating redyikiꞌ bekeꞌ kesenangan neng teyeg dut Empuꞌ neng Amaꞌ tyu sampay ki Jesus Kristo neng Begerar tyu gasi.
Penelangin i Pablo pasal et mengeꞌ Mengengandel dut Pilipos
3 Pegselematan ku Empuꞌ dut ginsaʼt nerendeman ku kemyu. 4 Kede penelangin ku dimyu, megpenelangin ku et megsegya banar sabab kemyu ginsan. 5 Megpeselamat ku bekeꞌ megenep sabab et pegtabang myu daken dut pegpebunayag et Menungang Abar pasal ki Jesus Kristo. Timinagnaꞌ kew buwaten atin tihad et unang eldew neng pengandel myu Kenye seked tiban. 6 Indyari meketantu ku na itueng menungang keradya neng pinetegnanan et Empuꞌ dut pengebiyagan myu, meglahyun Ye gasi atin seked metbes Ye dut eldew et pegpeuliꞌ atue i Jesus Kristo. 7 Daran kew eset pusuꞌ ku! Bekeꞌ banar atin na rendemen ku samat kwantin pasal kemyu. Sabab mekebagiꞌ kew neꞌ ginsan ne iba-iba ku dut redyikiꞌ et Empuꞌ na binggey Ye daken, ganang pegkepirisu ku tiban, sampay tagnaꞌ ganang liwan ne aku, na pegtentuen ku ating kebebenaran et Menungang Abar dut mengeꞌ iba-iba. 8 Sabab Empuꞌ ating saksiꞌ ku, baꞌ enukwan pegmerganen ku kemyu ginsan, atin pegmerganen na teyeg si Jesus Kristo.
9 Indyari, pegpenelangin ku dut Empuꞌ na meglelebi nega pegmergaꞌ myu dut sebayaꞌ myu, bekeꞌ meglelebi nega dimyung pegkesewd pasal et Empuꞌ sampay ginsaʼt pegretiꞌ myu mendyaring metignaꞌ, 10 apang keendelen myu baꞌ enu menunga banar. Indyari pengebiyagen myu et metignaꞌ bekeꞌ kaya lang tendes atu dimyu seked et eldew et pegdateng peuliꞌ i Jesus Kristo. 11 Tebangen gasi i Jesus kemyu apang biyag myu maya kansang na buaꞌ neng metignang arat, supaya mengeꞌ taaw mebentugan sampay deyewan Empuꞌ.
Ating Menungang Buaꞌ et Pipirisuan i Pablo
12 Mengeꞌ ketipusdan kuʼt pengandel, ingin ku na mesewran myu na itueng neinabu daken asal neketabang dut pegpebunayag et Menungang Abar. 13 Sabab ginsaʼt mengeꞌ taaw atue, sampay ginsaʼt mengeꞌ sundalu na menununggu et kelang benwa et pegibuten, nemekesewd na sabab et pegsukuꞌ ku ki Kristo, angkansa, nepirisu ku. 14 Sabab gasi et pegkepirisu ku, mekansang neng mengeꞌ ketipusdan et pegandel na nememangger pegandel ki Jesus Kristo, bekeꞌ nememasag seled dye dut pegtulduꞌ et beres et Empuꞌ et kaya takut.
15 Asal maya sebarang iba ipegtulduꞌ gasi pasal ki Jesus Kristo sabab et imbeng eset daken bekeꞌ pegdawa-dawa. Segwaꞌ, maya sebarang iba na ipegtulduꞌ pasal ki Kristo sabab et menungang kepurisnan. 16 Pegtulduꞌ itueng emuri sabab et pegkasi dye daken, sabab nesewran dye nepirisu ku sabab et pegtentuen ku et kebebenaran et Menungang Abar. 17 Segwaꞌ mengeꞌ iba in na megimbeng daken, pegtulduꞌ pasal ki Kristo eset meyaat na kepurisnan, sabab dut pikiran dye, ingin dye aku pesekitan kwit atue kuʼt pipirisuan.
18 Sabab misan enu ne, misan menungang sebaban dye etawa meyaat, misan ne pepebunayag ne ating Menungang Abar pasal ki Jesus Kristo, meksan ku banar sabab atin.
Kepurisnan et Biyag Tyu atueʼt Dunyaꞌ
(2 Korinto 5:6-10)
19 Eꞌ, nenep ku daran, sabab nesewran ku na sabab et mengeꞌ penelangin myu bekeꞌ dut tabang neng teyeg et Nakem i Jesus Kristo, ginsan neng neinabu daken ketabang et pegpeliwan ku atue. 20 Ating pegtetegeyen ku banar bekeꞌ pegerapen ku na diki lang meglelew ku dut Empuꞌ, segwaꞌ tatap pangger ku apang pepebunayag ku et beres et Empuꞌ tiban samat nekeuna tiꞌ, apang mebentugan si Kristo daran sabab et aku, misan pebiyaꞌ kebiyagan ku etawa kepeteyan ku. 21 Megdemikian pasal daken, baꞌ megbiyag ku, mepelahyun ku mengempuꞌ ki Kristo bekeꞌ mengsusukuꞌ ku Kenye. Baꞌ matey ku, lebi negang kepulusan et daken sabab surung ku abit Kenye dut langit. 22 Segwaꞌ, baꞌ ipekebuwat biyag ku, mekansang nega kemerganan mekeradya ku. Angkansa baꞌ pilinen ku sembatu, kaya mesewran ku baꞌ embe lebing menunga. 23 Meliyut ne pikiren ku sabab et itueng duwang keinginan. Gayen ku ne mugad itueng biyag atuʼt lugtaꞌ apang meiba ku ne si Kristo dut langit, sabab itue gasi lebi negang menunga daken. 24 Segwaꞌ lebi neng keilangan dut dimyung ikenunga baꞌ tumerna aku eset itueng bilug-lugtaꞌ. 25 Metantu ku pasal itue, angkansa kesewd ku na megbiyag ku nega et mebuwat apang meiba-iba myu ginsan, apang ketabang dimyu dut perpanggar dut pegandel myu bekeꞌ ipereklaꞌ enep myu. 26 Gaay ku gasi pegpeuliꞌ ku dimyu, apang ganang duntin ku na megkeiba-iba tyu peuliꞌ, sebaban atin megbantug kew ki Jesus Kristo.
27 Segwaꞌ, misan enu meinabu, pegpengnaꞌ kew mengebiyagan et metignaꞌ bekeꞌ keteup et Menungang Abar pasal ki Jesus Kristo. Apang baꞌ misan kepeuliꞌ ku etawa mebaran ku lang pasal et dimyu, mesewran ku na tantu keteteg kew et sembatu lang neng peggayen, bekeꞌ megsembatu dut pegtenggung et pegandel et Menungang Abar na mengandel tyu. 28 Indyariꞌ, kasiꞌ myu pegtekutiꞌ mengeꞌ kebanta myu eset misan enu. Sabab itueng tuwakal myu, tetendaan kedye na binesanen dye et Empuꞌ. Segwaꞌ dimyu, itue tetendaan na puwasen Ye kemyu. Empuꞌ in na Ya buwaten itue. 29 Sabab tinugutan et Empuꞌ dimyu itueng kenunganen na mengsukuꞌ ki Jesus Kristo. Segwaꞌ mengsukuꞌ myu Ya diki lang pebiyaꞌ pegandel myu Kenye, erapun gasi dut dimyung keliyutan sabab et Kenye. 30 Indyari iba ku ne kemyu tiban et pegatu. Itueng pegatu samat ating nelebayan ku neng nebiriꞌ myu tagnaꞌ, bekeꞌ neebaran myu tiban na pegatu ku gasi.