PEBUNAYAG
ki Juan
Kepurisnan et itueng Buuk neng Pebunayag
Ating pebunayag et Empuꞌ ki Juan, atin sinurat kwit tiꞌ pasal et derateng naꞌ pegtitiksaen eset mengeꞌ mengengandel ki Kristo, sabab et kedyeng pengandel ki Jesus Kristo bilang Begerar dye. Unang pegegayen et sumurat supaya begeyan et penetap-seled bekeꞌ kumsan sebarang memematsaꞌ, bekeꞌ pituanan dye na daran mepatut mebentel misan dut timpuʼt keliyutan bekeꞌ ketiksaan.
Ating kelang bagiꞌ et itueng buuk, sinukup et senung pebunayag bekeꞌ teginep ne tinuturan bilang simpar et kebanar-benaran. Neretian itue et mengeꞌ mengengandel ki Kristo dut timpu na atin, segwaꞌ megmeliluꞌ et mekwit sebarang mengeꞌ ibang mengengandel leyd ne. Samat pegtuturanen et sembatung inegungan, ating mengeꞌ tuturan et buuk ne itue. Megtuturan pegulit-uliten dut ibang egian, pebiyaꞌ dut iba-ibang teginep. Seukat neglein-lein neng pengira-kira pasal dut pegbebegey et gaay bersen dut mengeꞌ ketuturanan, ating unang-unang tuturan et buuk ne itue metlang, deagen et Empuꞌ kenyeng mengeꞌ kebanta sampay si Seytan, pebiyaꞌ dut ki Jesus Kristo, bekeꞌ maya kegentian dut sebarang mengeꞌ mengengandel ne mebentel.
Ketulduan et itueng Surat
Peuna 1:1-8
Unang Pebunayag 1:9-20
Mengeꞌ Surat dut Pitung Ketingtimungan et mengeꞌ Mengengandel 1:9—3:22
Mengempuꞌ dut Langit 4:1-11
Ating Nilulun na Buuk bekeꞌ Ating Ibun ne Bibili 5:1-14
Pitung Bedbed na Tendaꞌ dut Nilulun na Buuk 6:1—8:1
Ating Pitung Tiup-tiup 8:2—11:19
Ating Beluguen bekeꞌ Duwang Setwaꞌ 12:1—13:18
Ating Bibili bekeꞌ 144,000 Taaw Nelkat et Empuꞌ 14:1-5
Ating Pegkeyg et Empuꞌ et Dunyaꞌ et mengeꞌ Taaw 14:6-20
Ating Pitung Mangkuk et Kutuk et Empuꞌ 15:1—16:21
Ating Pegkerumbak et Babilonia, bekeꞌ Pegkeraag et Setwaꞌ, ating Embut naꞌ Tarus, bekeꞌ si Seytan 17:1—20:10
Ating Emuring Ukuman et Empuꞌ 20:11-15
Ating Bagung Langit, Dunyaꞌ, sampay Lungsud et Jerusalem 21:1—22:5
Penimpusan et Kesuratan 22:6-21
1
Peunang Bebresen
1 Itue ating tuturan pasal pebunayag ki Jesus Kristo na ibinggey Kenye teyeg dut Empuꞌ supaya ipebiriꞌ dut Kenyeng mengeꞌ uripen ating mengeꞌ ginis na mekabiꞌ ne keilangan metuman. Pinesewd i Jesus itue ganang pinebibit Ye ne Kenyeng dereakan et Empuꞌ dut mengsusukuꞌ yeng si Juan. 2 Na si Juan negpebanar et ginsaʼt keginisan na kenyeng nebiriꞌ, diki meglein, pasal et ating bebresen et Empuꞌ bekeꞌ ating pesebanar i Jesus Kristo. 3 Mesukud ating pematsaꞌ et mengeꞌ bebresen et pebunayag na itue, bekeꞌ mesukud sebarang megkingeg et itue bekeꞌ pegtumanen ye nesurat atue. Sabab mekabiꞌ ne ating timpu neng megderateng.
Pegpangling dut Pitung Ketingtimungan et mengeꞌ Mengengandel bekeꞌ Pegdayew
4-5 Itueng surat mawaꞌ ki Juan, dut pitung pemegtingtimung et mengeꞌ mengengandel na dut probinsiya et Asia.
Meseʼt dimyu ating redyikiꞌ bekeꞌ kesenangan mawaꞌ dut Empuꞌ, bekeꞌ mawaꞌ gasi dut pitung nakem dut elepan et kenyeng metaas na eerungan, bekeꞌ mawaꞌ gasi ki Jesus Kristo.
Na Empuꞌ banar, Ya in atue tiban, Ya atue tagnaꞌ tiꞌ, bekeꞌ Ya atue dut timpu megderateng. Yegang ye, si Jesus Kristo, na ya mebentel ne saksiꞌ, na ya in unang negbiyag peuliꞌ dut mengeꞌ patey, bekeꞌ megekpet et mengeꞌ surutan atuʼt timbew et dunyaꞌ.
Na pegmerganen si Jesus kityu bekeꞌ nemuwas et dusaen et kityung keselaan sabab lang dut kenyeng kesimeyaan dut krus.
6 Imbes, binetang i Jesus kityu na kenyeng pengmilikan samat mengeꞌ pariꞌ supaya sumukuꞌ dut kenyeng Empuꞌ bekeꞌ Amaꞌ. Dumuʼt Empuꞌ ating kebentugan bekeꞌ basag neng pemegbeg beberapa. Amen*1:6 Amen - beres neng Hebreo ingin bersen “Metuman teyen”, bersen dye dut ketimpusan et pegpenelangin, etawa pegketbes et pegbersen et paru kuyun dut kegeayan et Empuꞌ..
7 Indaniꞌ myu, si Jesus dumateng pegmegebiyaꞌ eset mengeꞌ kunem, bekeꞌ mebiriꞌ Ya et ginsaʼt taaw atueʼt dunyaꞌ, sampay dye in siminurak et budyak kenye dut krus. Ginsaʼt taaw atueʼt dunyaꞌ memenyak sabab eset kenye. Atin key tantu meinabu! Amen.
8 Sugid et Begerar na Empuꞌ “Aku ating Alpa bekeꞌ Omega†1:8 Alpa bekeꞌ Omega - Puun bekeꞌ Yuntuk et abakada neng Griego, ingin bersen si Jesus Puun bekeꞌ Yuntuk et ginsan.. Ya ne atin sibantuꞌ, Ya ne ating neketalib, bekeꞌ Ya ne ating megderateng, Ya gasi na Mekewasa dut ginsan.”
Terebinbin et Taaw na Samat Yegang et Taaw
9 Akung si Juan, mengengandel gasi iba-iba myu dut ki Kristo. Keiba-iba gasi kityu dut keliyutan. Kesendalan tyu sabab binggey et Empuꞌ kityu basag, sabab lang pegmilik tyu ki Jesus. Aku pinirisu ne, tinimbag dut pulew et Patmus sabab lang dut pegtulduꞌ ku et bebresen et Empuꞌ bekeꞌ pegpepesebanar pasal ki Jesus. 10 Sene tiꞌ Eldew et Begerar, ganang pengempuꞌ ku, dimpelan aku et Empung Nakem bekeꞌ nekingeg ku dut daken neng lilikuran sembatung mebasag na gibek keblan ku lang buut. 11 Kwaʼt tugnaꞌ et beres, “Isurataꞌ dut linulun na buuk sebarang nebiriꞌ mu pegketbes ipebitaꞌ dut pitung ketingtimungan et mengeꞌ mengengandel dut mengeꞌ lungsud et Epeso, Esmirna, Pergamo, Tiatira, Sardis, Piladelpia, bekeꞌ Laodisea.”
12 Liminingew ku supaya birinen baꞌ sinu na neres dut daken, bekeꞌ nebiriꞌ ku pitung semberikaran na bulawan. 13 Dut tengaꞌ et mengeꞌ semberikaran maya sembatung dagbes ye na “Yegang et Taaw.”‡1:13 Yegang et Taaw - Betsaen dut Mateo 8:20; Lukas 7:34; Daniel 7:13. Repanan ye seked pebubukuꞌ ye bekeꞌ maya bulawan na pebebedbed set debdeb ye. 14 Kenyeng buek, meputiꞌ banar samat melinas na bulbul et bibili, meputi siat delek na yilo; mengeꞌ mata ye sama meneʼt megdedleg na apuy. 15 Kenyeng paa sama meneʼt megdelidyap neng tumbaga dut meinit na apuy, bekeꞌ kenyeng pengluluwaan sama meneʼt gibek et mebasag naꞌ besey in. 16 Maya pegkekpetan et kewanan ye na pitung bituen, bekeꞌ megliliwan dut kenyeng babaꞌ samat sembatung metarem neng gelaman na maya tarem sembelaꞌ-pesembelaꞌ. Kenyeng rupa mekepulew sama meneʼt segit dut ugtu. 17 Ganang nebiriꞌ ku ne ya, sama ku meneʼt patey na nepermak dut kenyeng tiked. Pegketbes dimpen ye ulu ku et elima kewanan ye indyari kwan ye, “Kas takut. Aku ating Una bekeꞌ ating Emuri. 18 Aku si Jesus, ating Pebibiyag. Mawaꞌ ku natey, segwaꞌ tiban biyag daran-peraran. Bekeꞌ kapet ku ating kepengdyarian apang mengindaag et Kemeteyan bekeꞌ Narkaꞌ.
19 “Angkansa isurataꞌ sebarang nebiriꞌ mu, bekeꞌ pasal et neinabu tiban, bekeꞌ ating meinabu dut ngine ne. 20 Sugiren ku dimu keretian ye et ating mekebiriꞌ mu na pitung bituen dut kewanan neng keremut ku bekeꞌ ating pitung semberikaran. Ating pitung bituen, atin ne mengeꞌ dereakan et Empuꞌ dut pitung ketingtimungan. Bekeꞌ ating pitung semberikaran, atin neꞌ mengeꞌ pitung ketingtimungan.”
*1:6 1:6 Amen - beres neng Hebreo ingin bersen “Metuman teyen”, bersen dye dut ketimpusan et pegpenelangin, etawa pegketbes et pegbersen et paru kuyun dut kegeayan et Empuꞌ.
†1:8 1:8 Alpa bekeꞌ Omega - Puun bekeꞌ Yuntuk et abakada neng Griego, ingin bersen si Jesus Puun bekeꞌ Yuntuk et ginsan.
‡1:13 1:13 Yegang et Taaw - Betsaen dut Mateo 8:20; Lukas 7:34; Daniel 7:13.