3
Selkatien keke avong vasi keil orer mul en hen Ahi
Eklisiastes 3:1-8,11-17
1 Tounah vasi koa kur out en out netan,
Ahi ling kat avong keil teni.
2 Ahi ling avong tahasuen ka avong ten matien,
avong taluhluhien ka avong tasuhutien.
3 Kei ling avong tou vini meatin ien ka avong takulat mesaien ien,
avong tou rasilin tounah ien ka avong avoumon tounah ien.
4 Ahi ling avong touaien ka avong tasien,
avong tatangien ka avong taholien.
5 Kei ling avong koa meatin vason ahat keil ien ka avong koa valah ruain keil eni,*Meatin houlu aviteni keke aneite ten selusien koanek vi, ‘Kei ling avong koa meatin heles ahin onen ka avong koa hervatei vesesal veni.’
avong tavuavien ka avong talokoveinien.
6 Ahi ling avong tahotin tounah ien ka avong koa vavuol ien,
avong tahulikatien ka avong koa avasoni vaha.
7 Kei ling avong tatal eisin keil ien ka avong tatitilien,
avong tatoraengien ka avong taselusien.
8 Ahi ling avong tatin katien ka avong ten envatien,
avong tavaeen ka avong ten tomat.
11 Ahi mumon tounah vasi kur out en avong kati teni. Ka tounah sav emun koa Ahi lingi mul en meatin keil vi ileilien keke amundem usil asa koa kur out tuai ka asa koa hemai veah hekistal. Ka avaseini, keil asakras availea vasi asa koa Ahi mum rohtoh eni va rokol keite teni. 12 Sakini namundem kilea keke tahos imok rehesi ir ka reheles tahosien en avong koa romul veah romoul. 13 Tahos keke ir vasi reheanian, rehemun hati oai, ka rehesi ir ven tounah keil koa romum veni, veni tounah keil enek avi sanien keil koa Ahi mul sani min ir.
14 Nakilea keke tounah vasi koa Ahi mumoni hel lisenges. Ir rosakras rovasosor en etai ris tounah eni, ka rosakras rovakulat etai tounah rani. Ahi mumoni mukonek keke meatin keil ihouhou mini ka iha netan mini. 15 Tounah vasi koa amul kosa, amul tuai mulamu; ka asa koa hemai hekatau, kei mul tuai kosa. Ka tounah keil koa kur out mulamu, Ahi helehei hemai hekistal eris.
16 Ka navong namul en out netan, nales tounah tamun: en out koa alei revi usite onen meatin keil, inau nales sakkalkalien eni. Anatin, en out ten maluen, tisaen emun mul ien. 17 Evus, naselus sasok minau navit, “Ahi hesan asa koa mal min meatin vasi keil, koakeil atahos ka koakeil atisa, veni kei ling kat avong kati ten umen vasi keil ka sakien vasi keil akistal ien.”
*3:5: Meatin houlu aviteni keke aneite ten selusien koanek vi, ‘Kei ling avong koa meatin heles ahin onen ka avong koa hervatei vesesal veni.’