27
Siekob, natin Aesak, venan tokolkatien ten moeite ran tunali ka lohosai
Senesis 27:1-46; 28:1-5
1 Avong muli va, ka Aesak mai vi ulmatu ka meten var. Avong tai, san selusien va min natnali koa moeite vit vamai veni. Ka navong Esao mai, Aesak visi vit, “?Natkuli, keik somok eke?”
Ka Esao vit risi mini vit, “Inau ke.”
2 Aesak viteni mini vit, “?Kolesi? Inau namatu, ka vahesa nimat hervitei tuetin. 3 Sakini, kikur hisuput ka atuv keil onom kiha en eivorohus, ka kuas etai tirendan minau. 4 Kikukoni hesuval koa kokilea inau ek vati. Navong nianian hevus, inau nisan tokolkatien ekor ten moeite esuk minuk, veni nareingeingeni nimat nengeis.”
5 Navong Aesak mul selus min Esao, Rebekah mul raengon suain asa mul viteni. Ka navong Esao va en eivorohus, 6 Rebekah viteni min Siekob vit, “Naraengon asa tata onom mul viteni min Esao. 7 Kei viteni mini mukok vit, ‘Kuas etai tirendan venau ka kikukoni hesuval koa kokilea inau ek vati. Navong nianian hevus, en meten Iahova, inau nisan tokolkatien onak esuk minuk, veni nareingeingeni nimat nengeis.’ ” 8 Ka Rebekah vit risi mini vit, “Natkuli, kitaengonau ka kumon asa nihiteni minuk. 9 Kiha en out koa alei kat sipsip keil eni, ka kikur nani elu koa avealu musising, kihousi hemai venau. Nikukoni hesuval koa tata onom en vati. 10 Keik kikuri heha veni ka navong heani hevus, hesan tokolkatien onen minuk, veni roreingeingeni hemat nengeis.”
11 Ka Siekob viteni min mama onen vit, “?Ka mukave, amuvek tovuol ka amuven Esao houlu? 12 Ka vahesa tata hetokol avek, heilea keke rovitei Esao ka hehotini keke namul naluvosi. Nasakini tokolkatien natovuol varei en moulien onak, nametau tata nasesendanau.”
13 Mama onen viteni mini vit, “Natkuli, munak hemukonek, sesendaen enek hersuttei keik, hesut inau nges. Kikalah, kumon asas naviteni, kiha kikur nani elu hemai venau.” 14 Sakini va, kuri mai veni ka kei kukon vati anien koa tata onen en vati. 15 Evus, Rebekah kur more eisin omon Esao koa ling revi mul, ka musin eni suk en Siekob. 16 Evus, kur hiliven nani ka kav koe hen ka hiren Siekob eni. 17 Sak meseini evus, san more anien enek mini ral min veret koa kei mumoni.
18 Evus, Siekob va ven tata onen ka vise vit, “!Tata!”
Ka tata onen visi vit, “!O-o, inau li ke! ?Ka kamil en sei ke?”
19 Siekob vit, “Inau Esao, titam koa moeite. Namumoni suval koa koviteni minau. Mea, tondan revi ka kian vuseri koa nakuri minuk. Ka navong kiani hevus, kokilea kovasan tokolkatien onom minau.”
20 Aesak vit, “?Natkuli, kovotini kalah mukave?”
Siekob vit, “Iahova, Ahi onom, kataunau eni.”
21 Aesak viteni mini vit, “Amai li vesesal venau hesakini nakilea matokoluk mailea keik somok Esao.” 22 Sakini va vesesal ven tata onen, ka ulmatu kamus hen ka viteni vit, “Rem suval Siekob, ka hem keilu lusuval hen Esao.” 23 Ka kei lei ras Siekob varei veni amuven houlu suval Esao. Sakini mumon rendemien onen keke vasan tokolkatien onen mini, 24 ka vis risi vit, “?Keik somok Esao?”
Ka Siekob vit, “He-e, inau varei.”
25 Aesak viteni mini vit, “!San vuseri ak maani! Niani hevus, nitokol katuk.” Sakini, kuri, sani mini, ka san hati uaen muni. 26 Evus tata onen viteni mini vit, “Natkuli, kimai vesesal venau ka kiav katnau.” 27 Navong kav kati, Aesak mus vi eisin mon ka rokol kati. Navong musi mukok, kei mundemi keke Esao kati, ka san tokolkatien onen mini vit,✡Hib 11:20
“Natkuli, vi vem tahos
suval eivorohus katau en avong Iahova san ous mita netan.
28 Ahi hesani minuk tilep ten out nesa
hekas ah esom keil ka houmon keik kil en amas.
Ahi houmon ah ten uit esom italeha
ka nei grep keil esom ihi houlu.
29 Ahi houmon meatin keil um minuk,
meatin keil ten kantri sav keil ihouhou minuk.
Kihi hetetamen helin tumali keil,
titan mama onom keil iha netan enuk.
Meatin keil koa isesenda enuk, Ahi hesesenda en keil.
Ka koakeil isan selusien ten tokolkatien minuk, Ahi hetokol kat keil!”✡Sen 12:3
30 Navong Aesak san tokolkatien mini evus, Siekob va rani.
Ka katau suk, tunali koa Esao mai ris ran eivorohus. 31 Kei mun kukon more anien tai ka kuri va ven tata onen vani. Ka vit, “Tata, mea li, tondan ka kian vuseri koa nakuri minuk. Ka hevus, kisan tokolkatien onom minau.”
32 “?Keik sei?”
Esao vit, “Inau Esao, moeite onom.”
33 Navong Aesak longe mukok, mutimanin ka maleilei houlu ka visi vit, “?Isei keke muas tirendan ka kuri mai venau? Nakani etin vus, keik kumai. Nasan vasi tokolkatien ekor onak mini. Ka nasakras mahilesi, tokolkatien enek heles eni lises.”
34 Navong Esao raengoni, longe tisa ka muai roha vit, “!Tata, tokol kat nau li mun!”
35 Ka Aesak vit, “Tumali mai luvos nau ka kur vasi tokolkatien onom tuai.”
36 Esao viteni vit, “Hatte elu keinek keke kei sak luvos nau. Isen koa vi Siekob mal varei.*Isen Siekob, aneite tamun teni vi ‘meatin tasakluvosien.’✡Sen 25:29-34 Mulamu, kei kulat vuluk ten moeite ranau, ka kosa, kei kulat tokolkatien emun ten moeite ranau. ?Korling etai li hati tokolkatien onom vahi onak?”
37 Aesak vit risi mini vit, “Kei, namumoni tuai mai vi hetetamen mulik, ka namumon vatiamal keil vasi onen imai ihi meatin toumien onen. Nasani mini anien ka uaen. ?Natkuli, asa ris nakilea masani minuk?”
38 Esao mulelis peah tata onen vit, “?Tokolkatien onom tas eli? !Tokol kat nau li mun! !Tata, tokol kat nau li mun!” Ka muai roha.✡Hib 12:17
39 Sakini, Aesak viteni mini vit,✡Hib 11:20
“Ahi hersantei tilep hekas ah esom keil,
ka amas hetovuol enuk.
40 Keik kiles en huhuen ka kihuli kat naef onom lises.
Ka avaseini, kihi eiloheh onen tumali.
Ka hekatau, navong kihit kovaso sesein keihoen onen tumali,
kokilea kovamaluv rani.”✡Sen 36:6-8; 2Ki 8:20
41 Esao vuroh kat Siekob veni tata onen sa vasin tokolkatien mini. Kei mundemi min kei sasen vit, “Avong mul mai vesesal itangis tata onak. Evus, nu vini Siekob.”
42 Navong Rebekah long usil rendemien onen Esao, vise Siekob vamai veni. Navong mai, viteni mini vit, “Natkuli kitaengonau. Tumali mul ling suain vurohien onen, ka mul mumon sise vouasuk kovamat. 43 Sakini kumon asa koa nihiteni minuk. Keitinesek, kiha ven tuak Leban koa ro en out Haran. 44 Ka kito hetal mini en out enek hetokol avong vurohien onen tumali heha netan. 45 Ka navong en hevobongen asa koa komumoni mini, nisila meatin etai hehat hekuruk kimai ris. Nametau keke kei nouasuk konamat, ka evus anahiteni keke kei mun namat. Ek rovattei kamil vasi milvavupuol ranau en avong vatas.”
46 Sakini, Rebekah va ven Aesak ka viteni mini vit, “Avek mah varei ven sakien onen ahin Hitaet keitel eke koa Esao kuri. Munak Siekob emun hekur ahin Hitaet etai, tahos imok inau nimat enges.”