48
Selusien ekor ka matien onen Siekob
Senesis 48:1-6,13-21; 49:8-10,33
1 Avong vahis muli, Siosep kur selusien tai koa vit, “Tata onom mesai.” Sakini, kur titan keilu, Manase ka Efrem, telva telsao eni. 2 Navong Siekob longe keke natnali Siosep mai valesi, mun tina mea ka rondan en avet onen. 3 Siekob viteni mini vit, “Navong naro veah en out Lus en atan ten out Kenan, Ahi ten Keihoen kistal venau ka rokol kat nau 4 vit, ‘Inau nisakin titam keil ihi houlu vis ihi houlu mok. Keil imai ihi mari vangi meatin keil. Ka atan ekek, nisani min vatiamal onom keil enek keke ito eni lises ka lisenges.’ ”✡ Sen 28:13-14
5 Evus, Siekob viteni mun vit, “Siosep, ehon onom koa avasi keilu en out Isip mulamu en avong numai ekok, nikur kan keilu luhehi onak. Efrem ka Manase luhesuval ehon onak keilu, Ruben ka Simeon. 6 Munak ehon tei ris ikistal enuk, ihi onom esuk. Atan koa keil ikuri, ikuri ran out koa nisani min Efrem ka Manase.”
13 Sakini Siosep ling Efrem en usiven Siekob koa meil, ka Manase en usiven matu. 14 Ka Siekob mupes en hen esuk, ka ling hen matu mul en vatin Efrem, avaseini vi tasite. Ka hen meil, lingi mul en vatin Manase koa vi moeite.* En sakien onen Siu keil, houhouen mul en hen matu mulin hen meil. 15 Evus, rokol kat Siosep vit,
“Ahi koa Ebraham ka Aesak, tata keilu onak, lumusili, kei hetokol kat ehon keilu ekek.
Ahi koa lei kat revi moulien onak rokol avong kosa, hetokol kat keilu.
16 Ka angelo koa kur koe nau en avong tatisa keil, hetokol kat keilu.
Isok ka isen tata onak keilu, Ebraham ka Aesak, telhemoul en ehon keilu ekek.
Titaealu keil ihi houlu, ka vatiamal onealu ihi houlu mok en out netan.”
17 Navong Siosep les tata onen ling hen matu mul en vatin Efrem, rositei veni. Sakini mul sak vakulat hen tata onen ran vatin Efrem ka valingi en vatin Manase. 18 Kei viteni min tata onen vit, “!Vuo, romukteinek! Kiling hem matu hemai ekok en vatin koa moeite.”
19 Tata onen seseini vit, “!Natkuli, nakilea! Vatiamal onen Manase imai ihi vangi meatin tai koa hemarite. Ka vatiamal onen tunali koa tasite imai ilin onen keil, imai ihi mari vangi meatin keil koa hehi houlu mok.”
20 Sakini kei rokol kat keilu en avong enek vit, “Me-Isrel keil ihit usil keilu en avong ten tokolkatien ihit, ‘Ahi hetokol katuk hesuval koa kei mumoni en Efrem ka Manase.’ ” En sakien enek, Siekob ling Efrem mulamu en Manase.✡ Hib 11:21
21 Evus, Siekob viteni min Siosep vit, “?Kolesi? Vesesal mamat. Ka Ahi heto venuk ka hekur keik kiha ris en atan esen avu onom keil.”
Evus, Siekob vise ruain natnali sav keil, rokol kat keil ka viten tounah koa hekistal en vatiamal one keil en avong koa hemai veah. Ka min Sudah, viten selusien koanik: