6 Navong Sosua selus min me-Isrel keil evus, sila retai en keil uva avato en atan kati one. 7 Ka en avong keil koa Sosua moul ro, me-Isrel keil along kat Iahova. Ka navong Sosua mat, meatin keil amules along kati rokol navong hetetamen one keil koa ales marmari tounah keil koa Iahova mumoni en usite onen me-Isrel keil umatmat. 8 Navong Sosua, natin Nun, sua onen rokol handred tai ka halualim (110), kei mat. Kei vi more meatin toumien onen Iahova 9 ka arahini en atan kati osen en hou keil ten out Timnat Serah, not en Hou Kas.✡ Sos 19:49-50

10 Avong muli ka meatin keil vasi koa amoul en avong enek, keil vasi umatmat. Ka titae keil koa amea katau suk en keil, keil e vobongen Iahova ka tounah vasi koa kei mumoni en usite onen me-Isrel keil. 11 Sakini me-Isrel keil amumon tisaen en meten Iahova ka uva netan min ahi sav. 12 Keil alokovein Iahova, Ahi koa onen avu one keil, Ahi koa kulat keil ran out Isip. Ka amul amusil ahi savsav keil onen meatin keil koa amul rahit keil ka uva netan min keil. Asakin Iahova vuroh kat keil. 13 Keil arvatei mun netan min Iahova, ka keil amules esuk uva netan min ahi meahos keil koa avise keil en Baal ka ahi ahin keil koa avise keil en Astata. 14 Sakini Iahova tin katiat imok ven me-Isrel keil ka maen vangi tarhena keil umai apurun keil ka avenan tounah keil one. Meatin sav keil amul rahit keil, keil emun uvae kat keil. Ka Iahova maeni keke meatin savsav keil avakur keihoen vali me-Isrel keil, ka alesi keke asakras avating koe keil. 15 Avong vasi keil avaha en rea, rendemien onen Iahova keih kat keil suval koa vat kati min keil houmoni. Sakini, keil alonge tisa houlu.

16 Evus, Iahova san metai keil min me-Isrel keil koa umai alei revi usite keil one ka akataun keil ven vangi tarhena keil enek. 17 Mukos, me-Isrel keil alei sesein metai one keil enek. Arlong kattei mun Iahova ka amai kat keil ven ahi sav keil ka uva netan min keil. Mengkatien keil onen Iahova koa tata keil along kati en avong onen Sosua, titae keil esuk alokoveini. 18 Ka navong Iahova san metai tai min me-Isrel keil, kei san kataunien mini. Ka navong metai koanek moul ro, Iahova kulat me-Isrel keil ran hen meatin keil koa uvae ral min keil. En mahis keil mukonek veni long kilea mahien one ven koakeil asak purun keil. 19 Ka navong metai enek mat, meatin keil aviles uva ris en sakien matu one, ka amumon sakien keil esuk tatisaso lohlin koakeil aro mulamu. Keil amusil kat ahi sav keil ka uva netan min keil. Aseseini avalokovein sakien tatisaso keil one.