66
Souen ten masmasien ven more leikatien onen Ahi
1 !Meatin vasi keil ten out netan,
mihemasmas Ahi hetal makulien ten sien!
2 Mihesau usil isen koa vi hetetamen,
mihesan masmasien mini ven hetetamenien onen.
3 Mihehiteni min Ahi mihehit, “!Tounah vasi koa komumoni tahos imok!
Keihoen onom marite mok, mul sakin vativieh onom keil amaleilei en metom.
4 Koakeil vasi amul en out netan uva netan minuk,
keil amusau masmasuk, amusau masmas isom.”
5 Almai ka alles asa Ahi mumoni,
mormore tounah keil koa mumoni ven meatin keil ten out netan.
6 Kei viles Atas Tahilhili mai vi atan tames,✡Eks 14:21; Sos 3:14-17
kei sakin avu orer keil amu koteh Oaisal Sodan en ale.
Ekonek rosi ir ven asa kei mumoni.
7 En keihoen onen, mul losil kat out netan,
mul lei kokoe en kantri keil vasi
keke koakeil asesein losilkatien onen, anahati lat sasentei keil.
8 Meatin keil ten out netan, rehemasmas Ahi orer,
masmasien orer heha vasin out.
9 Kei kur koe moulien orer,
romaentei tounah vasut ir.
10 Ahi, keik kosan sakvisien min komai.
Suval silva koa ahang kan moteini,*Suval led, navong aling silva en ahang, mukurle. Tahul teni remal mules, ka silva koa mutolas, amutah lati keke avoumon tounah eni.
komotein moulien onomai en sakvisien keil.
11 Komaen komai mimot en eitapolis tai,
ka koling tounah keil koa meas en eisilomai.
12 Komaen koakeil avi vativieh ral komai avitan en komai,
e memu koteh ahang ka oai.†Koanek mul selus usil sakien koa Ahi rie lat kei min keil ka en ahang en Vatihou Senae ka en oai en Atas ak Tahilhili.
Ka kosa, komul kolah lat komai meva en out ten amas.
13 Nikur sanien votut hemai en Eim Votut onom ka niniti hehat minuk,
nisani minuk asa koa navat kati.
14 Asa koa navat kati minuk navong namul en avong tisa,
nisani minuk.
15 Nikur sipsip keil ka ninit keil en ahor ten sanien venuk,
ninit buluk ka nani keil emun hesakin vite hetupan hehat venuk.
16 Kami koa mivouhou min Ahi, almai ka allong nau.
Nihitehiteni min kami tounah sa koa kei mumoni minau.
17 Navis kataunien mini,
ka namasmasi ral min souen keil.
18 Munak nihuli kat tisaen keil en moulien onak,
Ahi Asuv hesakras valong nau.
19 Ka Ahi raengonau varei,
kei long hisien onak.
20 Namasmas Ahi veni kei roseseintei hisien onak,
vuo rokulattei envatien onen koa mul lises ka lisenges ranau.