119
Selusien votut onen Ahi tahos imok
Tokolkatien hel en koakeil ualien one mutolas,
koa moulien one musil kat mengkatien keil onen Iahova.
Tokolkatien hel en koakeil amum musil rendemien koa Ahi viteni
ka along kati ral min moulien vasi one.
Armumontei tounah vatisa,
ka amusil kat sise koa kei rie keil avousili.
Iahova, keik kosan hihiseien keil
koa kovit malong kati.
Ek vati mok keke nirkur tuntei sise onom,
ka nilong kat rendemien keil koa koling kati mousili.
Nilekat revi keke nusil kat mengkatien keil onom.
Hemukonek, nirmemoutei en meten mesav keil.
Navong nalei kilea mukave kolei rahit en usite vasi keil musil rendemien koa mal,
namasmasuk ral min rendemien koa mutolas.
Rendemien vasi keil koa koling kati, inau nusili.
Sakini, konalokoveintei nau li.
Selkatien heha ven ehon ka atouli hau keil keke usil kat Iahova
?Ehon hau ka atouli hau keil ito en moulien tai koa hetolas hemukave?
Ilei kokoe eni hetal min selusien keil onom.
10 Inau nusiluk en moulien vasi keil onak,
konamaentei nau nanaha ran mengkatien keil onom.
11 Inau naling suain selusien onom neim en tinok,
keke nirmumontei tisaen naha katuk.
12 O Iahova, namasmasuk.
Kihiseinau en rendemien keil onom koa koling kati.
13 Inau namul navit lein
tounah koa kolei usili musil rendemien koa mal.
14 Nasi nau keke mousil asa koa koviteni
suval koa namul nakur tounah keil koa mani teni mariso.
15 Hihiseien keil onom mules en rendemien onak keke nindem kilea aneite ten keil,
ka nalei kilea en sise koa korie keke komai mevousili.
16 Nasi nau ven rendemien keil koa kosani,
ka nirmundem maentei selusien keil onom.
Tokolkatien onen Iahova hel en koakeil vasi along kat ren
17 Inau navi meatin toumien onom.
Kumoni hetahos minau keke nakilea mamoul ka malong kat selusien keil onom.
18 Sehen metok keke malei revi
en more tounah keil koa amul en mengkatien keil onom.
19 Inau naro en out netan suval heou tai.
Sakini, konaling suaintei mengkatien keil onom ranau.
20 En avong vasi, ek vati li mok
keke nilea revi en tounah vasi koa mal en rendemien onom.
21 Keik kovul kat koakeil akur rendemien ten hetetamenien mul en keil.
Sesendaen tai mul en koakeil along ras mengkatien keil onom.
22 Koakeil enek amundem maen nau ka amumon tohtohien minau.
Kiting koe nau ran keil veni inau namusil kat tounah koa koviteni.
23 Avaseini keke hetetamen keil alah ruai keke avalekat sise koa akilea avapurun inau vaka ien,
inau, meatin toumien onom, nil nindem usil rendemien keil koa koling kati mousili.
24 Inau nasi nau houlu mok ven tounah koa koviteni,
veni keil amul arie sise minau keke mousili.
Hisien onen meatin koa en vati mok vousil kat selusien keil onen Iahova
25 Nalonge tisa houlu ka namundem sesai.
Kitali lat nau li hesuval koa kovat kati en selusien onom.
26 Navit lein tounah vasi koa namumoni minuk, ka kovit kes selusien onak.
Kihiseinau li en rendemien keil onom koa koling kati mousili.
27 Kumonau nilea en hihiseien keil onom,
ka nindem usil more tounah keil koa komumoni keke nilea aneite teni.
28 Nalonge tisa houlu ka tinok mul mis.
Kisan ris keihoen minau li hesuval koa kovat kati en selusien onom.
29 Kiting koe nau nanahatei en sise koa romaltei.
Ka veni kotahos imok, kihiseinau en mengkatien keil onom.
30 Inau naling rendemien onak keke nusil sise ten longkatien en moulien onak.
Namundem usil hemukave nusil rendemien keil onom koa koling kati mousili.
31 O Iahova, inau namusil kat tounah koa koviteni.
Sakini, konasakintei nau nanamemoutei en meten mesav keil.
32 Navong nalong mengkatien keil onom, nakalah namum musili,
veni nakilea keke kisan tei ris ileilien minau heka ien.
Hisien onen meatin koa en vati mok vailea revi selusien keil onen Iahova
33 O Iahova, kihiseinau en aneite ten rendemien keil onom koa koling kati mousili,
ka nilong kati lisenges.
34 San ileilien minau ka nusil kat mengkatien keil onom.
Anatin, nilong kati hetal min moulien vasi onak.
35 Kilamunau en sise ten mengkatien keil onom,
veni en sise enek nihotin sien.
36 Kihiles moulien onak keke nusil kat tounah koa koviteni,
keke nanousiltei sakien ten metenan.
37 Kihiles metok ran tounah keil avi heisav enges,
ka kisan moulien minau heka en mengkatien keil onom.
38 Kisakin selusien onom hemai hehi anatin en moulien onen meatin toumien onom,
veni hesakini hehouhou enuk.
39 Inau namul nametaun selkututien keil koa vativieh keil onak amumoni vaha kat inau.
Sakini, kutut inau li veni tounah koa kolei usili musil rendemien koa mal.
40 Ek vati li mok hihiseien keil onom.
Veni keik komal imok, kisakin moulien onak hehi heite hau.
Selusien keil onen Iahova vi kataunien min koakeil amusili
105 Selusien keil onom suval laet koa musil luvat out koa namual ien,
ka san meneai minau keke malei kilea revi sise onak.
 
130 Navong kovit kilea hihiseien keil onom,
namundem kilea asa koa mal.
Avaseini meatin tai rosukul revitei,
selusien onom mul san meteisauen mini.
 
160 Anatinien vi vatte ten selusien vasi keil onom.
Ka tounah vasi koa koviteni musil rendemien koa mal mul lisenges.
 
165 Tomat mul en moulien onen koakeil vasi envatien one mul en mengkatien keil onom,
tounah tovuol vasakin keil avamot.
 
176 Inau navi meatin toumien onom ka nakur tun sise koa mal suval sipsip tai koa vuol.
Sakini, kimai li kihotin inau, veni ek rovobongentei mengkatien keil onom.