149
Souen ten masmasien ven tahosien onen Ahi
1 !Rehehati lat isen Iahova!
Rehesau min Iahova hetal min souen hau tai.
Rehehou lati navong rolah ruai ral min meatin sav keil koa amul amusil kati.
2 Me-Isrel keil, mihesi kami ven Ahi koa mumon kami.
Mihelonge hetahos, meatin keil koa mimul en Hou Saeon, ven Iahova koa vi asuv houlu onami.
3 Mihehati lat isen hetal min holien keil,
mihemasmasi hetal min ave ka kitar.
4 Mihehati lati veni Iahova si kei ven meatin keil onen
ka mul san houhouen min koakeil rendemien one mul netan.
Kei mul sakin keil avitan en vativieh keil one.
5 Koakeil amusil kat Ahi isi keil
navong amulin koakeil amul uvae ral min keil,
ka isau hetal min sien navong amuseh.
6 Keil ihiso hetal min masmasien ven Ahi one,
navong avuli kat naef tahuen keil one.
7 Hetal min naef onen meatin keil onen,
Ahi helei rahit usite onen meatin savsav keil ten out netan
ka hesan mahien min keil.
8 Ahi hemaen keil ipar kat alen asuv houlu keil ka avat keil onen vativieh keil one
hetal min sen keil takeih.
9 Anatin, Ahi hesan mahien min meatin keil ekek
hesuval koa vat kati keke voumoni min koakeil amum tisa en meten.
Ka hekatau suk eni,
Ahi hesan hetetamenien min koakeil amusil kati.
!Sakini, rehehati lat isen Iahova!