1 Jadi pertama tu, sa mo kas naseat sunggu-sunggu untuk kam doa, sembayang, minta deng bilang trima kasi ke Allah, untuk smua orang. 2 Kam doa untuk raja-raja, sama dong pu kepala-kepala pemrinta di situ, supaya kitong bisa hidup tenang deng trada masala, trus tong bisa slalu ikut Allah pu mau deng sikap yang pantas. 3 Allah De snang doa yang begitu, itu yang baik. Allah yang su kas slamat kitong, 4 De mau supaya smua orang bisa dapa slamat trus bisa tau apa yang benar. 5 Karna De saja Allah. Baru yang kas damei Allah deng manusia itu juga hanya satu orang saja, De itu Kristus Yesus yang jadi manusia. 6 De yang kasi De pu diri ganti manusia untuk kas bebas dong smua. Ini bukti dari Allah pu rencana, yang jadi pas di De pu waktu. 7 Sa dapa angkat jadi De pu utusan untuk kastau rencana ini, trus supaya sa ajar yang benar ke orang-orang bukan Yahudi tentang percaya sama Yesus. Apa yang sa bilang ini benar! Sa tra tipu!

8 Itu jadi, sa mau supaya dimana saja, waktu smua laki-laki mo angkat tangan ke Tuhan untuk doa,*2:8 angkat tangan ke Tuhan untuk doa - Orang Yahudi biasa angkat tangan kalo mo doa, jadi maksud di sini, ‘waktu laki-laki mo doa, dong harus hati suci.’ dong pu hati harus suci, tra bole simpan mara ato masi baku mlawan deng orang lain.

9 Untuk prempuan, hias diri biasa saja: pake yang sopan, yang pantas. Kalo mo tunjuk dong pu bagus tu, jang hias rambut yang lebi-lebi†2:9 hias rambut yang lebi-lebi - Dulu, di daera Yunani deng Romawi, prempuan biasa lingkar rambut, trus dong pake konde emas ato dong lingkar mutiara sampe dong pu rambut naik tinggi skali. Dong anggap itu seni. pake konde emas ato tali-tali mutiara, jang juga pamer dong pu pakean mahal; 10 tapi dong harus kas tunjuk dong pu bagus, lewat bikin yang baik ke orang lain. Begini yang pantas untuk prempuan-prempuan yang bilang dong semba Allah.

11 Prempuan dong harus duduk tenang waktu dong ada trima ajaran, trus dong harus trima itu baik-baik. 12 Sa, Paulus, tra kas ijin prempuan di situ ajar ato mo pegang kuasa di atas laki-laki. Dong harus duduk tenang. 13 Karna Adam yang dapa bentuk duluan, baru habis itu Hawa. 14 Trus yang dapa tipu dari ular tu juga bukan Adam tapi prempuan itu yang dapa tipu sampe de jadi orang yang bikin sala ke Allah. 15 Tapi, prempuan nanti slamat waktu kas lahir anak.‡2:15 prempuan nanti slamat waktu kas lahir anak - Ayat ini susa untuk mngerti. Ahli Alkitab dong pikir brapa arti. Bukan brarti prempuan yang tra lahir anak trakan slamat. Ada ahli yang bilang de pu arti tu: Bukan karna biasa mngajar ato kegiatan atur-atur apa begitu yang bikin prempuan Kristen dapat slamat, tapi lewat de pu setia waktu bikin tugas yang memang Tuhan su kasi. Conto tu kalo de jadi mama, de setia deng tugas itu. Cuma, prempuan-prempuan harus tetap hidup percaya ke Kristus, trus mo sayang orang lain deng pu hidup ikut yang Allah mau saja. De bikin itu smua deng sikap yang pantas.