25
Abraham pu anana cucu dari Ketura
25:1-6
1 Abraham de kawin lagi deng prempuan satu yang nama Ketura. 2 Prempuan itu de lahir anana untuk Abraham. De pu anana nama tu Zimran, Yoksan, Medan, Midian, Isbak, deng Suah. 3 Yoksan pu anana tu Syeba deng Dedan. Trus Dedan pu anana tu yang jadi moyang dari orang Asyur, orang Letus, deng orang Leum. 4 Midian pu anana tu Efa, Efer, Henok, Abida, deng Elda. Smua ni Ketura pu anana cucu dorang.
5 Abraham de kasi smua harta yang de punya ke de pu anak Isak. 6 Tapi waktu Abraham de masi hidup, de kasi hadia-hadia ke de pu anana dari maitua-maitua lain, budak yang de ambil jadi de pu maitua itu. Baru suru dong pi tinggal di daera sebla timur, di Tana Timur, jang tinggal sama-sama deng Isak.
Abraham mninggal
25:7-11
7 Abraham hidup sampe umur 175 taun. 8 Abraham de su tua skali baru de mninggal, gabung deng de pu orang-orang tua dorang. 9-10 Trus de pu anak Isak deng Ismael dong kubur de di goa Makpela, dalam kebun yang dulu de bli dari orang Het yang nama Efron, Zohar pu anak itu. Goa tu ada di sebla timur daera Mamre. Di tempat ini dulu Abraham kubur de pu maitua Sara. 11 Waktu Abraham su mninggal, Allah tetap kasi berkat ke Isak, Abraham pu anak ini. Trus Isak de tinggal dekat sumur Lahai-Roi.
Ismael pu anana cucu
25:12-18
12 Ini daftar anana cucu dari Ismael. Ismael tu Abraham pu anak yang dari Hagar, Sara pu budak prempuan Mesir itu.
13 Ini Ismael pu anana dong pu nama-nama, mulai dari yang lahir paling duluan: Nebayot, ini anak yang tua. Habis itu Kedar, Adbeel, Mibsam, 14 Misma, Duma, Masa, 15 Hadad, Tema, Yetur, Nafis, deng Kedma. 16 Itu suda, Ismael pu anana smua. Dari dorang lahir 12 kepala suku yang pimpin dong pu suku masing-masing, trus dong pu nama tu yang jadi nama-nama kampung tempat dong tinggal.
17 Ismael de mninggal, de gabung deng de pu orang-orang tua dorang. De pu umur su 137 taun dulu baru de mninggal. 18 De pu anana cucu dong tinggal dari daera Hawila sampe ke Syur. De pu tempat ada di sebla timur Mesir, ke ara-ara tana Asyur. Dong tinggal baku musu deng dong pu sodara-sodara yang lain.
Esau deng Yakub
25:19-34
19 Ini crita tentang Isak pu anana cucu. Isak tu Abraham pu anak.
20 Waktu Isak de pu umur 40 taun, de kawin deng Ribka, Betuel pu anak prempuan. Isak pu maitua ni Laban pu sodara prempuan. Betuel deng Laban ni dong dari suku Aram yang di Padan-Aram. 21 Isak pu maitua de tra bisa dapat anak. Itu jadi, Isak de minta sama TUHAN supaya de pu maitua bisa dapat anak. TUHAN dengar yang Isak minta, trus bikin yang de minta itu jadi. Itu yang, Isak pu maitua Ribka de bisa dapat anak. 22 Tapi waktu de hamil, de pu anana dua baku tolak-tolak dalam perut, trus de bilang, “Knapa sa pu hidup macam begini ka?” Jadi de pigi tanya TUHAN.
23 Trus TUHAN bilang de begini,
“Ada dua bangsa dalam ko pu perut,
yang satu pu orang-orang nanti lebi kuat
dari pada yang satu lagi pu orang-orang.
Anak yang tua, nanti de kerja untuk anak yang muda.
Mulai dari dalam perut sampe nanti juga,
dong dua tetap trakan baku cocok.”✡25:23 Roma 9:12
24 Pas waktu su mo lahir begini, memang ada anak kembar dalam de pu perut. 25 Waktu anak yang pertama kluar, de pu badan mera, baru de pu badan penu bulu-bulu macam de pake baju bulu-bulu begitu. Itu yang, dong kas nama de Esau.*25:25 Esau - Nama ini pu arti ‘penu deng bulu-bulu.’ 26 Habis itu, de pu ade yang kluar, de pu tangan pegang Esau pu tumit. Itu yang, dong kas nama de Yakub.†25:26 Yakub - Nama ini mirip deng kata yang pu arti ‘pegang de pu tumit.’ Isak pu umur su masuk 60 taun waktu dong dua lahir.
27 Anana dua tu dong su tamba besar. Esau de su jadi orang yang paling pintar buru binatang, de suka ada di daera sepi tempat buru binatang. Tapi Yakub, de tu orang yang tenang, de suka tinggal di ruma. 28 Isak de suka makan daging dari binatang yang orang biasa buru. Itu yang bikin de lebi sayang Esau. Tapi Ribka, de lebi sayang Yakub.
29 Satu kali, pas Yakub de ada masak makanan begini, Esau de datang dari daera sepi. Esau de su mati lapar skali. 30 Baru Esau de bilang sama Yakub, “Sa su lapar skali ni. Mari, kasi sa makan barang mera-mera yang ko masak itu dulu.” Gara-gara bilang begitu yang bikin de dapa panggil Edom.‡25:30 Edom - Nama ini pu arti ‘warna mera.’
31 Tapi Yakub de balas, “Ko pu hak anak pertama tu, ko kasi ke sa bole.”
32 “Aih, ko ambil suda. Ini orang su mo mati gara-gara lapar ni. Untuk apa juga hak anak pertama itu, bisa bikin kenyang ka?” Esau de bilang ke Yakub.
33 Trus Yakub de balas, “Ko sumpa sama sa dulu.” Jadi suda, de sumpa sama Yakub, trus de pu hak anak pertama tu, de kasi itu ke Yakub.✡25:33 Ibrani 12:16
34 Trus Yakub kasi Esau roti deng de pu masakan biji-biji mera itu. Esau de makan, de minum, trus de bediri baru pigi dari situ. Jadi begitu suda, Esau yang jadi anak pertama ni, de anggap reme de pu hak.