39
Yusup kerja di kepala pasukan raja Mesir pu ruma
39:1-6a
1 Baru pas orang Ismael dong sampe di Mesir ni, dong jual Yusup ke orang Mesir, yang de pu nama Potifar. Potifar ni raja Mesir pu orang penting. De tu kepala dari pasukan raja*39:1 pasukan raja - Liat catatan di Kejadian 37:36. Mesir. 2 Waktu de tinggal di de pu tuan orang Mesir pu ruma, TUHAN yang ada sama-sama deng Yusup. Itu yang bikin sampe, apa saja yang Yusup de kerja, pasti smua jadi bagus skali. 3 Brapa lama begini, Yusup pu tuan sadar kalo TUHAN yang ada sama-sama deng Yusup, trus TUHAN yang bikin sampe apa saja yang Yusup de kerja tu, pasti jadi bagus skali. 4 Dari situ Potifar de mulai snang deng Yusup. Trus de angkat Yusup jadi pesuru kusus. Potifar kas tugas Yusup untuk urus de pu urusan di ruma sama atur de pu barang-barang smua. 5 Mulai dari Yusup dapa tunjuk untuk jaga liat Potifar pu ruma deng barang-barang, TUHAN kasi berkat ke orang Mesir ini de pu barang-barang smua juga: yang di ruma ka, yang di kebun ka, de pu binatang-binatang piara ka, smua TUHAN kasi berkat. 6a Itu jadi, apa saja yang Potifar de punya, de kasi Yusup yang atur smua. Karna Yusup su urus Potifar pu barang-barang smua, jadi Potifar de cuma perlu atur de pu makanan saja, tra perlu sibuk deng de pu barang-barang yang lain lagi.
Yusup dapa rayu tapi de tra mau
39:6b-20
6b Yusup ni de muka bagus baru de badan juga bagus. 7 Lewat brapa lama begini, Potifar pu maitua mulai liat Yusup trus de mau-mau dia. Jadi, de bilang, “Yusup, mari suda, tong dua pi tidur sama-sama.”
8 Tapi Yusup de bilang Potifar pu maitua tu begini,
“Sa tra mau! Bapa Potifar de tra kuatir deng de pu barang-barang karna su percaya sa untuk urus itu smua. Jadi, sa tra bole bikin begitu! 9 Memang bapa Potifar su kasi sa kuasa untuk urus de pu barang-barang smua, jadi di sini trada yang pu kuasa lebi besar dari saya. Tapi hanya nyonya saja yang sa tra bole kore karna nyonya ni bapa Potifar pu maitua! Sa trakan bikin barang yang jahat begitu! Kalo sa sampe bikin begitu, sa su bikin sala ke Allah.”
10 Tiap hari Potifar pu maitua tinggal ganggu trus minta Yusup pi tidur deng dia, tapi tetap Yusup de tra mau, sampe Yusup de tra mau dekat deng Potifar pu maitua.
11 Satu kali begini, Yusup de masuk ke Potifar pu ruma mo kerja. Baru hari itu tu pas orang kerja dong trada sama skali dalam ruma situ. 12 Kaget begini, Potifar pu maitua tarik Yusup pu pakean baru bilang, “Yusup, mari tidur deng sa suda!” Yusup langsung lari kluar, kas tinggal de pu pakean di Potifar pu maitua pu tangan. 13 Waktu de liat Yusup su lari kluar, baru Yusup pu pakean masi tatinggal di de pu tangan, 14 Potifar pu maitua panggil anana laki-laki yang kerja di dong situ baru de bilang dong begini,
“Kam liat! Potifar pu orang Ibrani yang de bawa datang tu, de datang mo kas tipu kitong! Orang itu de masuk ke ruma baru paksa mo tidur deng sa, tapi sa langsung batariak besar-besar. 15 De dengar sa batariak tu yang de langsung lari kluar. Ini kam liat! De pu pakean ada tatinggal di sa ni.”
16 Jadi Potifar pu maitua simpan Yusup pu pakean tu di dia sampe nanti de pu paitua pulang. 17 Waktu de pu paitua pulang, de pi crita ulang ke de pu paitua lagi. De bilang begini, “Orang kerja Ibrani yang ko bawa ke sini tu, de tadi mo bikin kurang ajar deng saya! 18 Tapi sa langsung batariak kras-kras, itu yang de langsung lari kluar. Ini ko liat! De pu pakean ada tatinggal ni.”
19 Dengar de pu maitua crita tu, Yusup pu tuan de langsung emosi skali. 20 Langsung de suru de pu orang-orang pi tangkap Yusup baru kas masuk de ke penjara, di tempat raja biasa kurung-kurung orang. Jadi begitu suda, Yusup de dapa kurung di penjara situ.
TUHAN tetap tolong Yusup waktu di penjara
39:21-23
21 Waktu Yusup de di penjara, TUHAN yang ada sama-sama deng Dia. TUHAN tra perna stop kas tunjuk TUHAN pu sayang sama Yusup.✡39:2, 21 Kisah para Rasul 7:9-10 TUHAN yang bikin sampe kepala penjara tu, de snang deng Yusup. 22 Kepala penjara ni de percaya sama Yusup. Itu jadi, de kasi de pu tugas di penjara tu smua untuk Yusup kerja, sampe orang-orang yang dapa tahan di situ juga tu Yusup de yang urus. 23 Karna TUHAN yang ada sama-sama deng Yusup jadi TUHAN bikin smua yang Yusup de kerja jadi bagus skali. Itu yang, kepala penjara ni, de juga su tra perlu jaga liat Yusup pu kerja lagi.