19
Sakeus
1 Waktu Yesus sampe di kota Yeriko, De jalan lewat kota itu. 2 Di situ ada satu orang kaya, de kepala dari tukang tagi pajak, de nama Sakeus. 3 De mo skali liat Yesus itu sapa, tapi de tra bisa liat karna orang banyak skali, baru de pu badan pendek. 4 Begitu jadi de su duluan lari kemuka dari orang banyak itu, trus de panjat satu pohon supaya de bisa liat Yesus yang nanti mo lewat dari situ. 5 Pas Yesus sampe di pohon itu, De liat ke atas pohon baru bilang dia, “Sakeus, cepat ko turun karna Sa mo singga di ko pu ruma hari ini.”
6 Dengar begitu Sakeus de snang skali trus cepat-cepat de turun trus de bawa Yesus ke de pu ruma.
7 Smua orang yang liat itu dong tra snang trus dong baku bicara suda, dong bilang, “Ih, masa tu De pigi singga di ruma orang berdosa!”
8 Tapi di de pu ruma, Sakeus bediri baru bilang sama Yesus, “Tuhan, stenga dari sa punya sa kasi sama orang miskin, juga sapa saja yang perna sa ambil deng paksa nanti sa kas kembali empat kali dari yang sa ambil.”
9 Trus Yesus balik baru bilang, “Hari ini, ko deng ko pu kluarga smua dapa kas slamat dari Allah, karna yang ko su bikin ini kas tunjuk kalo ko ni Abraham pu turunan. 10 Karna Sa, Anak Manusia yang Allah utus, datang untuk cari deng kas slamat orang yang hilang.”
Conto tentang uang emas
11 Waktu orang masi dengar Yesus bicara, De crita sama dong satu conto lagi. Karna waktu itu De su dekat Yerusalem, trus dong kira kalo Allah mo jadi Raja yang nanti mo dong liat. 12 Jadi Yesus De crita begini,
“Ada satu orang penting yang kaya, de pigi ke tempat yang jau untuk dapa lantik jadi raja di de pu negara, baru nanti de kembali. 13 Seblum brangkat, de panggil de pu pembantu spulu orang, baru de kasi stiap orang satu uang logam emas.*19:13 uang logam emas - Uang emas ini dong bilang, Mina. De pu nilai sama deng gaji 100 hari. Trus de kastau dong, ‘Waktu sa pigi, uang ini kam pake usaha supaya nanti sa bisa dapat untung.’
14 Tapi orang-orang di de pu negara dong benci dia. Stela de brangkat dong kirim orang-orang untuk bilang, ‘Tong tra mau orang ini yang jadi raja untuk kitong.’
15 Tapi orang kaya itu dapa lantik jadi raja, habis itu de kembali. De suru panggil de pu pembantu-pembantu yang dapat uang itu supaya de mo tau brapa hasil yang dong dapat dari dong pu usaha. 16 Pembantu yang pertama de datang baru bilang, ‘Tuan, satu uang logam emas yang tuan punya itu, sa dapat hasil spulu uang logam emas.’
17 Tuan itu de bilang, ‘Bagus skali yang ko su bikin, ko pembantu yang baik! Karna untuk hal-hal kecil ko su bisa dapa percaya, sa kasi ko kuasai spulu kota.’
18 Pembantu yang kedua de datang trus bilang, ‘Tuan, satu uang logam emas yang tuan punya itu, sa dapat hasil lima uang logam emas.’
19 De bilang sama pembantu itu, ‘Ko nanti pu kuasa untuk lima kota.’
20 Pembantu ketiga de datang deng bilang, ‘Tuan, ini tuan pu uang, sa simpan dalam lenso. 21 Sa takut karna tuan orang yang kras, tuan ambil apa yang tuan tra simpan, juga tuan ambil hasil di tempat tuan tra perna tanam.’
22 De bilang sama orang itu, ‘Ko ini pembantu yang jahat! Deng ko pu kata-kata sendiri sa nanti adili ko. Ko bilang sa orang yang kras, sa juga ambil apa yang sa tra simpan juga sa ambil hasil yang tra perna sa tanam. 23 Kalo begitu knapa ko tra kas masuk uang itu di bank saja supaya waktu sa kembali sa bisa dapat uang itu sama de pu bunga lagi?’
24 Habis itu tuan de bilang sama orang-orang yang bediri di situ, ‘Ambil uang logam emas dari orang itu trus kasi sama orang yang pu spulu uang logam emas itu.’
25 Tapi orang-orang itu bilang, ‘Tuan, de su punya spulu mo.’
26 Tuan de jawab, ‘Sa kastau kam, orang yang tau atur apa yang su dapa kasi percaya ke dia, nanti de dapat lebi banyak. Tapi orang yang tra bisa atur apa yang su dapa kasi percaya, nanti orang ambil dari dia. 27 Jadi skarang, bawa ke sini sa pu musu-musu yang tra mau kalo sa jadi dong pu raja. Bunu saja dong smua di depan sa pu mata!’ ”
Masyarakat Yerusalem sambut Yesus sperti Raja
28 Habis crita smua, Yesus jalan depan dong untuk pigi ke kota Yerusalem. 29 Waktu sampe dekat kampung Betfage deng kampung Betania yang di dekat kaki Bukit Zaitun,†19:29 Bukit Zaitun - Dong sebut Bukit Zaitun karna di bukit situ banyak tumbu pohon-pohon bua zaitun. Yesus suru De pu murid-murid dua orang deng bilang,
30 “Kam dua pigi ke kampung yang di depan sana! Waktu kam masuk, nanti kam liat anak kledai satu dong ikat, yang blum perna ada orang yang naik duduk di atas kledai itu. Kam kas lepas tali, trus bawa ke sini kledai itu. 31 Kalo ada orang yang tanya sama kam, ‘Knapa kledai itu kam lepas?’ Kam bilang begini, ‘Tuhan De perlu ini.’ ”
32 Trus dong dua yang dapa suru itu pigi, baru smua jadi sperti yang Yesus su bilang. 33 Pas dong ada kas lepas anak kledai itu, orang yang pu kledai tu tanya, “Knapa kledai itu kam lepas?”
34 Dong bilang, “Tuhan De perlu ini.”
35 Dong bawa kledai itu ke Yesus, trus alas kledai tu pu blakang deng dong pu baju panjang‡19:35 dong pu baju panjang - Di sana orang dong biasa pake pakean lapis dua, pakean yang dong pake di luar itu panjang sampe di kaki. Pakean ini yang dong buka trus alas di kledai pu blakang. trus dong bantu Yesus naik duduk di atas.
36 Waktu Yesus duduk di kledai itu trus jalan, orang-orang taru dong pu baju-baju panjang alas jalan yang Yesus mo lewat. 37 Waktu Yesus dekat Yerusalem, di jalan turun dari Bukit Zaitun, smua orang yang ikut mulai puji kas tinggi Allah deng suara yang kras deng gembira karna smua tanda luar biasa yang dong su liat sendiri.
38 Dong bilang, “Allah berkati Dia yang datang sebage Raja deng nama Tuhan, skarang ada damei deng Allah di surga, deng sinar trang di tempat tinggi!”
39 Begini ada satu klompok orang yang ikut di situ, dong dari klompok Farisi yang rajin ikut hukum Musa, dong bilang sama Yesus, “Heee Guru! Tegur Ko pu pengikut-pengikut, karna dong tra bole bilang begitu.”
40 Trus Yesus jawab, “Sa kastau sama kam, kalo dong diam, batu-batu ini yang nanti puji kas tinggi Allah.”
Yesus mnangis liat Yerusalem
41 Waktu Yesus su dekat kota Yerusalem, Yesus liat kota itu baru De mnangis. 42 Yesus bilang,
“Kasian, lebi baik kalo hari ini juga kam tau baik apa yang perlu untuk kam pu tentram deng damai! Tapi skarang kam tra bisa liat itu. 43 Karna hari itu nanti datang, kam pu musu srang kam, nanti dong timbun tana kliling kam pu kota. Trus dong kurung kam dari timur, barat, utara deng slatan sampe kam tra bisa kluar. 44 Dong mo kas hancur kam pu kota trus bunu smua orang yang tinggal di dalam, dong tra mo kas biar batu satu juga tinggal di atas batu lain. Smua itu jadi karna kam tra trima Allah waktu De datang untuk kas slamat kam!”§19:44 Dong mo kas hancur kam pu kota ... di atas batu lain. - Smua ini jadi stela 40 taun, waktu pasukan Roma kas hancur Yerusalem. Begitu juga nabi-nabi kastau: Yesaya 29:3; Yeremia 6:6; Yehezkiel 4:1-3.
Yesus kas bersi Tempat Ibada Pusat
45 Trus Yesus masuk Tempat Ibada Pusat baru usir smua tukang jual di situ. 46 Yesus bilang sama dong, “Ada tulis kalo, ‘Sa pu ruma itu ruma doa,’✡19:46 Yesaya 56:7; Yeremia 7:11 tapi kam bikin ini jadi pencuri pu tempat.”
47 Stiap hari Yesus ajar trus di Tempat Ibada Pusat. Imam-imam kepala deng guru-guru agama sama orang-orang besar dari orang Yahudi, dong smua cari jalan untuk bunu Yesus. 48 Tapi dong tra tau pake cara apa, karna orang smua di tempat situ snang skali mo dengar Yesus pu kata-kata smua.
*19:13 19:13 uang logam emas - Uang emas ini dong bilang, Mina. De pu nilai sama deng gaji 100 hari.
†19:29 19:29 Bukit Zaitun - Dong sebut Bukit Zaitun karna di bukit situ banyak tumbu pohon-pohon bua zaitun.
‡19:35 19:35 dong pu baju panjang - Di sana orang dong biasa pake pakean lapis dua, pakean yang dong pake di luar itu panjang sampe di kaki. Pakean ini yang dong buka trus alas di kledai pu blakang.
§19:44 19:44 Dong mo kas hancur kam pu kota ... di atas batu lain. - Smua ini jadi stela 40 taun, waktu pasukan Roma kas hancur Yerusalem. Begitu juga nabi-nabi kastau: Yesaya 29:3; Yeremia 6:6; Yehezkiel 4:1-3.
✡19:46 19:46 Yesaya 56:7; Yeremia 7:11