22
Rencana untuk bunu Yesus
1 Waktu su dekat orang Yahudi pu hari besar Roti Tra Pake Ragi, biasa dong bilang hari Paska. 2 Imam-imam kepala deng guru-guru agama, dong cari waktu yang pas untuk bisa bunu Yesus deng diam-diam, karna dong takut orang banyak tau.
Yudas atur cara untuk jual Yesus
3 Begini Iblis kuasai Yudas yang de pu nama Iskariot, de ni satu orang dari Yesus pu dua blas murid-murid. 4 Trus de pigi ke imam-imam kepala deng kepala pasukan yang jaga Tempat Ibada Pusat, trus di sana de atur cara untuk jual Yesus ke dong. 5 Dong smua snang skali baru dong janji mo kasi uang sama dia. 6 De stuju trus mulai cari waktu yang pas trada orang banyak yang sama-sama Yesus baru de srakan Yesus sama dong.
Anana bua kas siap makan Paska
7 Pas hari besar Roti Tra Pake Ragi, biasa hari ini orang dong potong domba Paska. 8 Jadi Yesus suru Petrus sama Yohanes, “Kam pigi kas siap tong pu makanan Paska supaya tong makan.”
9 Trus dong dua bilang, “Di mana Bapa mau tong kas siap?”
10 Yesus bilang,
“Begitu kam masuk ke kota, nanti kam dua ketemu deng laki-laki satu yang pikul air dalam tempayan.*22:10 laki-laki satu yang pikul air dalam tempayan - Di budaya sana ni ane karna di sana tra biasa laki-laki yang pikul air dalam tempayan.Kam ikut masuk ke ruma yang nanti de masuk itu. 11 Baru kam bilang ke orang yang pu ruma tu begini, ‘Guru De tanya: Tempat yang mana Sa deng Sa pu murid-murid dong mo makan Paska?’ 12 Trus orang itu nanti kas tunjuk sama kam ruang besar satu di tingkat atas yang su lengkap, baru kam harus kas siap di situ.”
13 Trus dong dua pigi baru smua jadi sperti yang Yesus su bilang ke dorang. Trus dong kas siap makanan Paska.
Makan Paska deng Yesus
14 Su tiba de pu waktu makan Paska,†22:14 Paska - Biasa orang Yahudi bikin ini untuk ingat Tuhan kas bebas dong waktu dong jadi budak di tana Mesir. Domba ni kas ingat waktu di sana malaikat maut mo bunu anana laki-laki yang pertama tapi dong bebas karna ikut Allah pu printa untuk potong domba trus domba pu dara dong gosok di tiang pintu deng atas pintu depan ruma (Keluaran 11—12). Yesus duduk makan sama-sama deng De pu utusan-utusan. 15 Trus Yesus bilang sama dong, “Sa mau skali makan Paska ini sama-sama deng kam seblum Sa kena sengsara! 16 Begitu jadi, kam dengar baik: Sa trakan makan ini lagi sampe arti makan Paska ini jadi dalam Allah pu krajaan.” 17 Trus Yesus ambil glas yang isi air anggur, bilang trima kasi sama Allah, trus bilang, “Ambil ini, minum, trus kam baku bagi. 18 Karna itu, Sa kastau kam: Habis ini Sa trakan minum hasil anggur lagi sampe Allah de jadi Raja di bumi.” 19 Trus Yesus ambil roti, bilang trima kasi, kas pata-pata roti baru kasi deng bilang, “Ini Sa pu badan yang dapa kasi untuk kam; buat begini trus, supaya kam ingat Saya.” 20 Begitu juga deng glas anggur habis makan, Yesus bilang,
“Air anggur ini Sa pu dara yang tumpa untuk kam, dara ini jadi cap bikin sah Allah pu janji baru.
21 Tapi kam liat! Tangan orang yang mo jual Sa, ada makan sama-sama deng Sa di meja ini. 22 Karna Sa, Anak Manusia yang Allah utus, nanti mati sperti Allah pu rencana, tapi claka untuk orang yang jual Saya.”
23 Dengar begitu dong baku tanya, “Sapa dari tong yang mo bikin itu?”
Yesus deng murid-murid bicara waktu makan malam
24 Begini ada baku ribut di tenga Yesus pu murid-murid tentang sapa yang dapa anggap paling besar dari dong. 25 Yesus bilang dong,
“Pemimpin-pemimpin bangsa tindas dong pu rakyat ikut dong pu mau, padahal dong tu yang pegang kuasa baru sebut diri plindung rakyat. 26 Tapi kam tra bole begitu. Yang paling besar dari kam musti jadi yang paling kecil, juga pemimpin musti jadi pesuru. 27 Kalo ada orang duduk makan juga ada orang yang dapa suru, su pasti orang yang duduk makan yang besar to. Tapi Sa ni ada di antara kam sperti pesuru.
28 Kam yang ada tinggal sama-sama deng Sa dalam smua susa yang sa rasa. 29 Sperti Sa pu Bapa su kasi hak sama Sa untuk jadi Raja, Sa juga nanti kasi sama kam hak itu. 30 Kalo su begitu nanti kam makan deng minum satu meja deng Sa dalam Sa pu krajaan, trus kam nanti duduk di atas kursi raja untuk adili dua blas suku Israel.
31 Simon, Simon‡22:31 Simon itu nama lain untuk Petrus. ko dengar, Iblis su dapat ijin mo coba kas pisa kam dari Saya, sperti pili bras kas pisa tra baik dari yang baik. 32 Tapi Sa ni su berdoa ko, supaya ko percaya trus. Kalo ko su balik sama Saya, kas kuat sodara dong yang lain biar percaya Sa trus.”
33 Simon Petrus jawab ke Dia, “Tuhan, sa ni siap masuk tahanan deng mati sama-sama deng Tuhan.”
34 Yesus bilang, “Petrus dengar eh, malam ini nanti tiga kali ko su pura-pura tra knal Saya, baru ayam de kokok.”
35 Trus Yesus bilang, “Waktu Sa utus kam pigi, tra bole bawa dompet, tas deng sendal, deng smua tu, kam ada susa ka?”
Dong jawab, “Tra susa!”
36 Yesus bilang, “Tapi skarang ni sapa pu dompet ato tas musti bawa, juga yang tra pu pedang musti jual de pu pakean buat bli pedang. 37 Karna ada tulis di Kitab Suci begini tentang Saya, ‘Dong bikin De macam orang jahat saja.’✡22:37 Yesaya 53:12 Itu harus jadi skarang tentang Saya.”
38 Dong bilang, “Tuhan, liat! Ada pedang dua ini.” Yesus bilang, “Suda, tra usa bicara itu.”
Yesus di Bukit Zaitun
39 Slesai makan Paska, sperti biasa Yesus deng murid-murid dong kas tinggal kota pigi ke Bukit Zaitun. 40 Sampe di tempat itu De bilang dong, “Kam doa suda supaya kam jang jatu waktu dapa uji.”
41 Habis itu De pigi jau sedikit dari dong baru De tanam lutut trus doa, 42 “Bapa, kalo mau, kas jau sengsara yang jadi sama Saya, tapi jang ikut Sa pu mau tapi Bapa pu mau saja yang jadi.” [ 43 Begini satu malaikat datang trus kas kuat Yesus. 44 Yesus rasa hati brat skali. Karna itu Yesus sunggu-sunggu berdoa sampe kringat jatu sperti titik-titik dara di tana.]§22:44 Begini satu malaikat datang...kringat jatu sperti titik-titik dara di tana.- Banyak teks kuno bahasa Yunani tra pake ayat 43-44.
45 Habis itu, slesai doa De bediri baru kembali ke murid-murid dong. Tapi De liat dong tidur karna dong pu hati sedi skali. 46 Trus Yesus bilang dong, “Kam knapa tidur ka? Bangun deng doa suda, supaya kam jang jatu waktu dapa uji.”
47 Waktu Yesus masi bicara, ada datang satu rombongan orang baru de pu murid-murid satu yang nama Yudas. De satu dari dua blas murid-murid itu, de yang bawa muka. Yudas datang dekat Yesus karna mo peluk*22:47 peluk - Bahasa Yunani: cium. Di sana tu budaya untuk trima orang. Yesus. 48 Trus Yesus bilang dia, “Eh Yudas! Deng peluk begini, ko jual Sa, Anak Manusia yang Allah utus ka?”
49 Yesus pu pengikut dong liat itu mo jadi trus dong bilang, “Tuhan! Tong srang pake pedang ini ka!” 50 Langsung satu orang dari dong srang pesuru dari Pemimpin Imam sampe de pu telinga kanan putus.
51 Trus Yesus bilang, “Suda! Tra usa lagi!” Yesus pegang orang itu pu tlinga trus Yesus kas sembu orang itu.
52 Habis itu, Yesus bilang ke imam-imam kepala, kepala-kepala pasukan yang jaga Tempat Ibada Pusat deng orang Yahudi pu tua-tua adat yang datang untuk tangkap. De bilang begini, “Kam kira Sa ni prampok ka, jadi kam bawa pedang deng kayu buat tangkap Sa? 53 Barang, stiap hari tu Sa ada deng kam smua dalam Tempat Ibada Pusat, tapi kam tra tangkap Saya. Trapapa juga! Karna ini kam pu waktu, malam ini kuasa glap yang printa.”
Petrus bilang de tra knal Yesus
54 Trus dong tangkap Yesus baru bawa ke Pemimpin Imam de pu ruma, Petrus ikut juga tapi dari jau saja. 55 Pas waktu itu di tenga ruma tu pu halaman, orang dong bikin api untuk kas hangat badan deng duduk kliling dekat api. Petrus juga ikut duduk di situ. 56 Pesuru prempuan satu di situ liat de duduk dekat api. De liat baik-baik baru de bilang, “Orang ini juga sama-sama deng Dia!”
57 Trus Petrus bilang, “Mama, sa tra knal Dia!”
58 Tra lama begini orang lain liat de baru bilang, “Ko juga satu dari dong to!”
Tapi Petrus jawab, “Trada, bukan saya!”
59 Kira-kira satu jam begitu, orang lain lagi bilang Petrus deng suara kras, “Betul, orang ini sama-sama deng Dia, karna de juga orang Galilea.”
60 Tapi Petrus bilang, “Trada, sa tratau ko bicara apa ni!” Pas waktu itu Petrus masi bicara begini, ayam de kokok.
61 Trus Yesus balik liat Petrus. Itu baru de ingat kalo Yesus su bilang dia, “Seblum ayam de kokok hari ini, ko su tiga kali pura-pura tra knal Saya.” 62 Trus de pigi kluar baru mnangis deng sedi skali.
Yesus di depan Sidang Agama
63 Penjaga yang tahan Yesus, dong tertawa ejek-ejek Yesus, trus dong pukul juga. 64 Habis tu dong tutup De pu mata baru tanya, “Coba kastau sapa yang pukul Ko?” 65 Trus masi banyak kata tra baik yang dong hina-hina ke Yesus.
66 Pas pagi begini, orang Yahudi pu tua-tua adat, imam-imam kepala, sama guru-guru agama dong kumpul, baru dong bawa Yesus ke depan dong pu Sidang Agama.†22:66 Sidang Agama ni tempat sidang ato tempat untuk orang dapa adili. Sidang ini yang paling tinggi untuk kas putus satu hal tentang agama deng masyarakat Yahudi. Di sidang de pu anggota ada 70 orang besar deng penting, yang biasa pimpin itu Pemimpin Imam. 67 Trus dong bilang, “Kalo Ko ini Raja yang Allah pili, kastau sama tong.”
Yesus jawab, “Biar Sa kastau kam, pasti kam trakan percaya, 68 trus kalo Sa tanya sama kam, kam juga trakan jawab. 69 Mulai skarang Sa, Anak Manusia yang Allah utus, su duduk di sebla kanan Allah Yang pu Kuasa Paling Besar.”
70 Dong smua bilang, “Kalo begitu, Ko ini Allah pu Anak ka?”
Yesus jawab, “Kam sendiri yang bilang kalo Sa ini Allah pu Anak.”
71 Dengar begitu dong bilang, “Buat apa tong cari saksi lagi! Tong su dengar dari De pu mulut sendiri!”
*22:10 22:10 laki-laki satu yang pikul air dalam tempayan - Di budaya sana ni ane karna di sana tra biasa laki-laki yang pikul air dalam tempayan.
†22:14 22:14 Paska - Biasa orang Yahudi bikin ini untuk ingat Tuhan kas bebas dong waktu dong jadi budak di tana Mesir. Domba ni kas ingat waktu di sana malaikat maut mo bunu anana laki-laki yang pertama tapi dong bebas karna ikut Allah pu printa untuk potong domba trus domba pu dara dong gosok di tiang pintu deng atas pintu depan ruma (Keluaran 11—12).
‡22:31 22:31 Simon itu nama lain untuk Petrus.
✡22:37 22:37 Yesaya 53:12
§22:44 22:44 Begini satu malaikat datang...kringat jatu sperti titik-titik dara di tana.- Banyak teks kuno bahasa Yunani tra pake ayat 43-44.
*22:47 22:47 peluk - Bahasa Yunani: cium. Di sana tu budaya untuk trima orang.
†22:66 22:66 Sidang Agama ni tempat sidang ato tempat untuk orang dapa adili. Sidang ini yang paling tinggi untuk kas putus satu hal tentang agama deng masyarakat Yahudi. Di sidang de pu anggota ada 70 orang besar deng penting, yang biasa pimpin itu Pemimpin Imam.