2
Tukang baca bintang datang dari timur
2:1-12
1 Yesus lahir di Betlehem di propinsi Yudea waktu Herodes yang jadi raja disana. Waktu itu, tukang baca bintang*2:1 tukang baca bintang ‒ Orang-orang ini mungkin anggota klompok agama yang pintar-pintar, dong mungkin dari daera yang skarang orang sebut Iran. Dong pigi liat Yesus waktu Yesus pu umur skitar 40 hari (Lukas 2:22) sampe dua taun (Matius 2:16). dong datang dari timur ke Yerusalem. 2 Waktu dong sampe di Yerusalem, dong tanya-tanya, “Anak yang lahir untuk jadi orang Yahudi pu raja itu dimana? Tong su liat De pu bintang di timur, jadi tong datang untuk semba Dia.”
3 Waktu raja Herodes dengar begitu, de kaget skali, begitu juga deng smua orang di Yerusalem. 4 Jadi de kumpul imam kepala smua deng orang Yahudi pu guru-guru agama, trus de cari tau dari dong, Raja Yang Allah Pili mo lahir dimana. 5 Dong bilang dia, “Di Betlehem di propinsi Yudea, karna ada tatulis di nabi satu pu kitab begini,
6 ‘Betlehem, yang di Yehuda pu tana,
ko sama skali bukan kota yang paling kecil di tenga-tenga kota-kota yang penting di Yehuda,
karna dari ko nanti muncul satu orang yang jadi gembala untuk Sa pu orang-orang Israel.’ ”✡2:6 Mikha 5:2; 2 Samuel 5:2
7 Trus Herodes de panggil tukang baca bintang itu diam-diam. Baru de tanya dong kapan bintang itu muncul. 8 Habis itu de suru dong ke Betlehem, de bilang, “Pigi trus cari anak itu baik-baik. Habis kam ketemu Dia cepat kastau sa lagi, biar sa juga pigi semba Dia.”
9 Habis dengar raja pu kata-kata, dong pigi. Trus bintang yang dulu dong liat di timur tu jalan duluan dong, trus bintang itu brenti pas di atas ruma tempat anak itu tinggal. 10 Waktu liat bintang itu, dong snang skali. 11 Trus dong masuk ke dalam ruma itu baru liat anak itu ada sama-sama deng Maria, De pu mama, trus dong tunduk semba Dia. Habis itu dong kas kluar emas, kemenyan, deng mur†2:11 kemenyan, deng mur ‒ Mur itu dari geta yang harum, geta ini de kras kalo kring. Di Israel dong pake geta mur untuk bikin minyak wangi deng obat. Kadang-kadang dong campur minyak mur deng anggur asam untuk pake jadi obat untuk kas kurang rasa sakit. Kemenyan itu dari geta yang harum, kalo bakar de pu bau harum kluar. Biasa dong bakar untuk jadi korban bakar untuk Tuhan. Biasa pake di upacara agama deng untuk obat juga. dari dong pu tempat harta, baru kasi hadia untuk Dia. 12 Karna Allah su kas ingat dalam mimpi untuk jang kembali ke Herodes, jadi dong pulang ke dong pu negri lewat jalan lain.
Yusup deng Maria bawa lari Yesus ke Mesir
2:13-15
13 Habis tukang baca bintang itu dong pulang, Tuhan pu malaikat datang ke Yusup dalam mimpi baru bilang, “Yusup, ko bangun, ambil Anak itu deng De pu mama, kam lari ke Mesir. Tinggal disana sampe Sa bicara lagi deng ko, karna Herodes mo cari Anak itu untuk bunu Dia.”
14 Jadi malam itu juga, Yusup bangun ambil Anak itu deng De pu mama, trus dong lari ke Mesir. 15 Dong tinggal disana sampe Herodes mati. Begitu supaya Tuhan pu kata-kata dulu lewat Nabi Hosea tu su jadi, De bilang begini, “Sa panggil Sa pu Anak kluar dari Mesir.”✡2:15 Hosea 11:1
Anana kecil di Betlehem dapa bunu
2:16-18
16 Waktu Herodes sadar kalo de su dapa tipu dari orang-orang tukang baca bintang itu, de mara skali. Trus de suru bunu anak laki-laki kecil smua yang di Betlehem deng daera-daera sebla, anana yang umur dua taun ke bawa, pas deng waktu yang tukang baca bintang dong pertama kali liat bintang itu. 17 Begitu supaya Allah pu kata-kata dulu lewat Nabi Yeremia tu su jadi, 18 “Di kota Rama, ada suara orang mnangis sedi skali, itu Rahel‡2:18 Rahel itu dong pu moyang Yakub pu istri, de ni Yusup deng Benyamin pu mama. Disini de sperti simbol untuk bangsa Israel.yang mnangis de pu anana, baru de tra mau dapa hibur karna de pu anana su trada lagi.”✡2:18 Yeremia 31:15
Pulang dari Mesir ke Israel
2:19-23
19 Habis Herodes mati, Tuhan pu malaikat datang ke Yusup dalam mimpi di Mesir. 20 Trus malaikat itu bilang ke Yusup, “Yusup, ko bangun. Ambil Anak itu deng De pu mama, trus kembali ke tana Israel karna dong yang mo bunu Anak itu su mati.”
21 Jadi Yusup bangun, ambil Anak itu deng De pu mama untuk mo kembali ke tana Israel. 22 Tapi waktu Yusup dengar kalo Arkelaus su jadi raja di daera Yudea ganti de pu bapa Herodes, Yusup jadi takut mo kesana. Trus karna Allah su kas ingat lagi dalam mimpi, jadi Yusup pigi ke daera Galilea. 23 Di Galilea, dong tinggal di kota yang nama Nasaret. Begitu supaya Allah pu kata-kata dulu lewat nabi-nabi tu su jadi, kalo De nanti dapa panggil ʻOrang Nasaret.ʼ
*2:1 2:1 tukang baca bintang ‒ Orang-orang ini mungkin anggota klompok agama yang pintar-pintar, dong mungkin dari daera yang skarang orang sebut Iran. Dong pigi liat Yesus waktu Yesus pu umur skitar 40 hari (Lukas 2:22) sampe dua taun (Matius 2:16).
✡2:6 2:6 Mikha 5:2; 2 Samuel 5:2
†2:11 2:11 kemenyan, deng mur ‒ Mur itu dari geta yang harum, geta ini de kras kalo kring. Di Israel dong pake geta mur untuk bikin minyak wangi deng obat. Kadang-kadang dong campur minyak mur deng anggur asam untuk pake jadi obat untuk kas kurang rasa sakit. Kemenyan itu dari geta yang harum, kalo bakar de pu bau harum kluar. Biasa dong bakar untuk jadi korban bakar untuk Tuhan. Biasa pake di upacara agama deng untuk obat juga.
✡2:15 2:15 Hosea 11:1
‡2:18 2:18 Rahel itu dong pu moyang Yakub pu istri, de ni Yusup deng Benyamin pu mama. Disini de sperti simbol untuk bangsa Israel.
✡2:18 2:18 Yeremia 31:15