1 A̱ ntá tí ángel kjuáko̱na ijnko nta̱río tjóá, a̱ ntá tí nta̱ a mé tjanjon kjuachón. Táha mé tꞌikonxínni éxí xro̱se̱nta̱ la mé kꞌuaxrjexín tí trono kuènte Dios la ko tí Kolélo. 2 A̱ ntá jnko̱siné tí calle tjetoan kuènte tí chjasin a la ko nanánko tí nta̱río ntiha itjen tí inta tjanjon kjuachón mé tꞌóna to teyó veces jnkojnko nánó kíxin tꞌóna to jnkojnko nitjó. Tí ka kuènte tí nta la xro̱a̱n tsito̱exín jína tí nación siín ntiha. 3 La mé ntiha tso̱kohya ninkehó kjuachji̱no̱xínhin la tí trono kuènte Dios la ko kuènte tí Kolélo la ntiha tjen tí chjasin. La tí sín chꞌehe chꞌán xra̱ la mé tsjikosáyehe sín chꞌán. 4 Tsꞌikon sín tí kàré Dios la ko tsochónta sín ihni̱é chꞌán tí totjen sín. 5 Ntiha la tso̱kohya tsꞌixin tie la tí sín siín ntiha la tꞌichjánxi̱enhya sín xrohi kuènte lámpara la ko ni xrohi kuènte ya̱on kíxin Ìnchéni Dios mé tsꞌinkaséyanxín sín ntiha la ko tsochónta sín kjuachaxin kuènte Dios jnkochríxín.

6 A̱ ntá tí ángel mé nixja̱na chꞌán ntáchro kíxin:

―Tí itan a mé chaxín la chrókuítekákonhén tí tan a. La ko Ínchéni mé tí Dios nchexraxinkaon tí sín nixja kjuachaxin ihni̱é chꞌán mé ichrꞌán chꞌán tí ángel kuènte chꞌán kíxin tsja̱kue̱xi̱n chꞌán tí sín chꞌehe chꞌán xra̱, tí nkehe tjoka tso̱nhen.

7 ―¡Tjoka tsꞌinka janhan!

Náxrjón tjejó tí sín titekaon tí itén Dios nixja tí libro i.

8 Janhan Juan, kui̱nha̱n la ko kꞌuíkua̱n tíha. A̱ ntá chrꞌéxi̱n kjuixin kui̱nha̱n la ko kꞌuíkua̱n tíha ntá kjuakꞌéxia̱n to̱chꞌia̱n chrínkí to̱té tí ángel kíxin xi̱kaha kjua̱ko̱na la ntá chrókjuíkosáya̱ha̱ chꞌán. 9 A̱ ntá jehe chꞌán ntáchro chꞌán kíxin:

―Xi̱kahya si̱chꞌe kíxin janhan kja̱xin tꞌa̱ha̱ xra̱ Dios éxí tí jaha xi̱kaha la ko éxí tí sín kíchuá mé tí sín nixja itén Dios la ko kaín tí sín tjinkaon chrókuitekaon nkexrí nixja tí libro i. Mé jehó Dios chrókjuíkosáyehé.

10 Kja̱xin kꞌue̱tua̱nna chꞌán kíxin:

―Chrókjuakꞌechjinahya tí nkehe jahvá kuinhín kuènte Dios éxí nixja tí libro i kíxin ó kuichjina tí ya̱on tsoxiteyá. 11 A̱ ntá tí sín chꞌe jínahya ája nohe sín chꞌe sín tí jínahya. A̱ ntá tí nkexro ntoáhya chꞌe la ája nohe chꞌe tí nkehe ntoáhya. A̱ ntá tí nkexro chꞌe nkehe tóxrjínhi̱n Dios la na̱xa̱ chrókjuichꞌe xi̱kaha la ko tí nkexro tsíkjinchetjóá Dios la na̱xa̱ jína chrókꞌuejó sín chrókuitekaon sín tí jehe chꞌán.

12 ―Chaxín tjoka tsꞌinka janhan la tsꞌinkakian tí nkehe tso̱tja̱hará jnkojnkorá kíxin nkexrí tí xra̱ chui̱chꞌerá. 13 Janhan mé tí xrankíxixín la ko tí tsjixixín la janhan mé tí sa̱oxín la ko tí tsjixixín éxí tí letra xrankíxixín A la tsjixixín Zeta.

14 Náxrjón tsꞌejó tí nkexro tsíkje̱n iké kíxin tsochónta sín kjuachaxin tso̱chjinehe sín tí nta tjanjon kjuachón kíxin jína tsꞌixenxín sín tí puerta kuènte chjasin. 15 A̱ ntá ntója tsito̱he tí chojni jínahya kuítekakonhya la ko tí chojni nchexro̱a̱n la ko tí sín chónta nchónhya chojni chjin la ko tí chojni tjàya la ko tí chojni tinkáchónki tí nkehe tsíkjano̱ya la ko tí chojni tóxrjínhi̱n xrichꞌia.

16 ―Janhan Jesús mé ichrꞌan tí ángel kuènta̱na kíxin tsochénka kaín ni̱nko kaín tíha. Janhan mé kꞌuaxrjeníxian tí rey David la ko janhan tí konotsé itji tí chjina tꞌinkáséyan. 17 Tí Ncha̱kuen Dios la ko tí sín tinkáchónki tí Kolélo ntáchro kíxin:

―Xrákiá.

La tí sín tjejótinhin la ntáchro sín kíxin:

―Xrákiá.

A̱ ntá tí nkexro tꞌenxín nta̱ tjinkaon nta̱ la chrókꞌui tí nta̱ tjanjon kjuachón la ninkehó tsꞌixinkíhya tíha.

18 Kaín nkexro tjejótinhin itén Dios tsꞌínixín tí libro i la chrókónohe sín tíha: Jnkojín sín chrókjuichꞌéna í so nkehe chrónixja la Dios mé a̱ntsí sinchekjasóte tí jehe sín tso̱níhi sín éxí nixja tí libro i. 19 A̱ ntá jnkojìn nkexro tsja̱tse̱n jnkojín palabra chónta tí libro i la Dios tsja̱tse̱n tí nkehe chrókꞌuáyéhe̱ sín chónta tí libro tsꞌínixín ihni̱é tí sín tsaá la ko Dios tsja̱tse̱n tí nkehe chróchónta sín tí tjen tí chjasin tjóá kíxin éxí nixja tí libro i.

20 A̱ ntá tí nkexro chrónkaxín tí tan i mé ntáchro kíxin:

―Tjoka tsꞌinka janhan.

Amén. ¡Xrákiá. Ìnchéni Jesús!

21 Ìnchéni Jesucristo mé sincheyaonrá kaín rá. Amén.