19
Reꞌ rilokꞌonjic wach i Dios
xbanaric ruꞌum reh risacharic
wach i tinamit Wawilo̱nya
Chiri̱j chic ricꞌuhtjic wi̱n nicꞌ wach risahchic wach i tinamit Wawilo̱nya, reꞌ hin xnibiraj chi xa cow chic kꞌoric xcaꞌn cho juntuhm chi tinamit ar pan taxa̱j eh jeꞌ wili cꞌahchiꞌ quikꞌorom:
«Yeꞌerok rilokꞌil i Dios maj xa reꞌ woꞌ reꞌ ncoꞌlonic keh eh xa reꞌ woꞌ reꞌ kꞌe̱ꞌ nimal wach rajawric.
Jeꞌ woꞌ, xa reꞌ woꞌ reꞌ sutumaj ri̱j ruꞌum i riholonquilal i sakom wilic wi̱ꞌ.
Yeꞌerok woꞌ rilokꞌil maj reꞌ kꞌatoj kꞌoric riban ru̱cꞌ coric wach cꞌuxlis riban
eh coric woꞌ wach rikꞌorbal.
Ruꞌum aj reꞌ xiban chi xchalic i tiꞌcꞌaxic china̱ i tinamit Wawilo̱nya
reꞌ wilic ribiral chi aj cꞌoyo̱m ruꞌum nok reꞌ tinamit reꞌreꞌ jeꞌ ricab nok jenoꞌ ixok ncꞌambic be̱h pan cꞌoyomal,
xicꞌam woꞌ quibe̱h take cꞌacharel wach acꞌal chi rilokꞌonjic wach take tiyo̱x.
Jeꞌ woꞌ chic reꞌ Dios xiban chi xicansjic take aj Wawilo̱nya
eh ru̱cꞌ reꞌreꞌ xyeꞌeric jelow-bal reh i nicꞌ paꞌ nimal tiꞌcꞌaxic xiban
queh take quiniminic reh takꞌanic ribanam i Dios chi naquicamanic wi̱ꞌ, nqui take.
Chiri̱j chic ruꞌ xquikꞌor woꞌ chic chi jeꞌ wili:
«Yeꞌerok rilokꞌil i Dios maj reꞌ risibil i tinamit reꞌreꞌ
xa npokic woꞌ naricahnic chi junelic i kꞌi̱j sakom, nqui take.
Cu reꞌ aj ruꞌ, reꞌ take quejeb ricaꞌwinak (24) chi cꞌacharel reꞌ wilic quiwaꞌric jeꞌ ricab quiwaꞌric take rijeb tak winak, quichꞌi̱l take cꞌacharel reꞌ wilic nakꞌ quiwach chiqui̱j chi quiwach xquilokꞌej wach i Dios reꞌ tzꞌuklic chipam ritzꞌukꞌa̱b reh kꞌatbal kꞌoric. Til xquixucꞌa̱ꞌ qui̱b chiwach chi xquikꞌor chi jeꞌ wili:
«Yeꞌerok aj rilokꞌil i Dios
maj til jeꞌ reꞌ xcꞌuluric ru̱cꞌ tinamit reꞌreꞌ, nqui take.
Chiri̱j chic reꞌ, ar reꞌ wilic wi̱ꞌ i tzꞌuka̱b reh kꞌatbal kꞌoric, ar xkꞌoric cho jenaj chi jeꞌ wili xikꞌor cho:
«Reꞌ hat-tak reꞌ tiniminic tak reh take takꞌanic ribanam i Dios chi na̱camanic tak wi̱ꞌ,
chalokꞌej tak wach i Dios to̱b ta nchel xa nim chic awaꞌric on xa maꞌxta ti awaꞌric tak, nqui.
Chiri̱j chic ruꞌ xnibiraj woꞌ chic nok juntuhm chi cꞌacharel xa jeꞌ chic ricab cowil ahnic riban i haꞌ nankꞌehbic cho wach sak rehp on xa jeꞌ chic ricab nkꞌoric cho jenaj cow laj cohok i kꞌoric xcaꞌn cho chi jeꞌ wili:
«Yeꞌerok rilokꞌil i Dios reꞌ kꞌe̱ꞌ woꞌ chic rinimal wach rajawric wilic
maj xa reꞌ wach reꞌ nkꞌatbic kꞌoric china̱ chiꞌnchel cꞌacharel.
Kalokꞌej aj tak wach i Dios kꞌuruꞌ eh sukbok kacꞌux
maj yuꞌna reꞌ chiho̱j wach chi naribanam chi ehqꞌuenbe̱s,
tiklic chic chi naribanam chic caxa̱ra ruꞌum chi xponic chic rikꞌijil i caxarahil
ru̱cꞌ i Cꞌacharel reꞌ rijalwachem ri̱b chi jeꞌ jenaj Qꞌuijol Me̱ꞌ.
Jeꞌ reꞌ kꞌuruꞌ reꞌ chiho̱j chic chi rehqꞌue̱n i Cꞌacharel
reꞌ rijalwachem ri̱b chi jeꞌ jenaj Qꞌuijol Me̱ꞌ xyeꞌeric reh i risoꞌ reh caxarahil
jeꞌ ru̱cꞌ til kꞌe̱ꞌ qꞌuih tzꞌa̱k ruꞌum richakꞌwachquilal
eh xa nrepretic woꞌ chic risakil.
Reꞌ holohic laj tzꞌih wili rijalwachej i coric wach noꞌjbal
xcaꞌn take ritinami̱t i Dios sak chic wach quinoꞌjbal, nqui take.
Chiri̱j chic ruꞌ reꞌ raj tzꞌeꞌ wa̱ch i Dios jeꞌ wili xikꞌor wi̱n:
«Chatzꞌihmbaj take kꞌoric wili: Ato̱b je queh i yukꞌumaj take chi wiꞌc chipam i ninkꞌi̱j reh ricaxarahil i Cꞌacharel reꞌ rijalwachem ri̱b chi jeꞌ jenaj Qꞌuijol Me̱ꞌ, nqui xikꞌor wi̱n.
Jeꞌ woꞌ xikꞌor wi̱n chi jeꞌ wili:
«Chiꞌnchel take kꞌoric wili, til rikꞌorbal i kAja̱w Dios. Jeꞌ reꞌ nok til manlic coric wach take, nqui woꞌ wi̱n.
10 Ruꞌum reꞌreꞌ, reꞌ hin xnixucꞌa̱ꞌ wi̱b chiwach raj tzꞌeꞌ wa̱ch i Dios eh nok oquic nak chic wi̱n chi rilokꞌonjic wach, reꞌreꞌ jeꞌ wili xikꞌor wi̱n:
«Ma̱ban jeꞌ reꞌ! Ma̱lokꞌej niwach i hin maj xa hin woꞌ ti raj camanom i Dios jeꞌ ricab nok wilca̱t i hat chꞌi̱l woꞌ take awas acha̱kꞌ aj niminel reꞌ quiniminic reh cꞌuhtunic bano̱j take ruꞌum i Jesus eh reꞌ take cꞌuhtunic reꞌreꞌ, reꞌ woꞌ take xiyew i Lokꞌ laj Uxlabal chi narikꞌormojic cuꞌum take hab wach xyeꞌeric kꞌoric queh chi naquikꞌorom. Jeꞌ reꞌ ajic xa reꞌ woꞌ Dios nariyeꞌeric rilokꞌil, nqui xikꞌor wi̱n.
Reꞌ iloj xiban i Wa̱n chiri̱j i jenaj
tzꞌuklic china̱ jenaj sak ri̱j cawa̱y
11 Chiri̱j chic ruꞌ xwilow chi reꞌ taxa̱j xteh je pa̱m eh chi jeꞌ reꞌ xwilow wach jenaj sak ri̱j cawa̱y eh china̱ tzꞌuklic i Jesus reꞌ nkꞌormojic chi reꞌreꞌ nbanic chi nmanlajic wach i nicꞌ paꞌ nimal kꞌoro̱j ruꞌum i Dios eh jeꞌ woꞌ til aj chꞌiquem cꞌuxlis chiri̱j i rikꞌormojic i coric. Maꞌ xa reꞌ ta reꞌ, coric laꞌ woꞌ wach ricꞌux chi kꞌatoj kꞌoric eh jeꞌ woꞌ chi kꞌakꞌanic cu̱cꞌ take raj ixowonel. 12 Reꞌ Jesus reꞌreꞌ xa quirepretic chic take nakꞌ wach xa jeꞌ chic take xak kꞌa̱kꞌ. Jeꞌ woꞌ yohbal wach take coten laj chꞌihchꞌ wilic chi xoybal wach na̱ eh yejal wach wilic woꞌ jenaj bihnal tzꞌihmbimaj chiwach, reꞌ xa reꞌ wach reꞌ nehtꞌalanic reh chaj bih ra̱j rikꞌorom. 13 Jeꞌ woꞌ xa quicꞌ chic riban risoꞌ eh reꞌ wili cojo̱j chi ribihnal: “Reꞌ aj Sakomonel Wach Noꞌjbal wilic chipam riCꞌuhbal i Dios”, nankꞌoric.
14 Chiri̱j reꞌ xwilow chi reꞌ Jesus xchalic ayuꞌ wach acꞌal eh xa jeꞌ chic ricab juntuhm ok chi sol ntahkanic reh, chi tahkamaj woꞌ cho cuꞌum take raj tzꞌeꞌ wa̱ch i Dios aj pan taxa̱j. Reꞌ take aj tzꞌeꞌ wa̱ch reꞌreꞌ xa sak chic i quisoꞌ wilic chiqui̱j eh maꞌ woꞌ chꞌuwaꞌ ta soꞌ wach, tzꞌukuk take ri̱j cawa̱y sak qui̱j. 15 Jeꞌ woꞌ chic, xwilow woꞌ chi reꞌ rikꞌorbal reꞌ ncamanic reh chi ricamanbal, xa jeꞌ chic maꞌ laj cꞌul kꞌas re̱ chꞌihchꞌ. Ru̱cꞌ rikꞌorbal reꞌreꞌ riban chi reꞌ take cꞌacharel reh juꞌjun chi tinamit reꞌ maꞌ nca̱j ta quiniminic reh nquicꞌul i tiꞌcꞌaxic. Jeꞌ woꞌ chic, xwilow woꞌ chi reꞌreꞌ riban ricamaj ru̱cꞌ rinimal rajawric jeꞌ ricab rajawric wilic aj chaꞌjanel me̱ꞌ nok wilic pa rikꞌab richꞌimim wilic ribolix laj chꞌihchꞌ china̱. Jeꞌ ricab nok reꞌ cꞌacharel resaj ransil chi ripuchꞌuric pa̱m i u̱wa chi resmejic lok i ri̱s, jeꞌ woꞌ reꞌ i Jesus naribanam woꞌ chi reꞌ Dios reꞌ kꞌe̱ꞌ nimal wach rajawric, naresam rinimal wach ricꞌa̱ chi quina̱ take aj mahc chi riyeꞌeric cho tiꞌcꞌaxic chi quina̱. 16 Chiri̱j lok chiꞌnchel reꞌreꞌ, xinwilow woꞌ chi ar chiwach risoꞌ wilic waritu̱k tzꞌihmbimaj take kꞌoric kꞌoro̱j chiri̱j chi jeꞌ wili: “Reꞌ wili i Kꞌatal Kꞌoric reꞌ wilic rajawric chi quina̱ chiꞌnchel take kꞌatal kꞌoric, nqui rikꞌor. Jeꞌ woꞌ rikꞌor chi jeꞌ wili: “Reꞌ woꞌ wili Ajabe̱s reꞌ wilic rajawric chi quina̱ take chiꞌnchel ajabe̱s, nqui rikꞌor i kꞌoric tzꞌihmbimaj.
17 Chiri̱j chic rilmijic i tzꞌuklic nah sak ri̱j cawa̱y, reꞌ hin xwilow nok jenaj raj tzꞌeꞌ wa̱ch i Dios paꞌlic chiwach i kꞌi̱j, xa cow chic rikꞌoꞌrej je take cꞌuch chi jeꞌ wili cꞌahchiꞌ rikꞌorom je queh:
«Quim tak. Chamol awi̱b tak. Tiklic jenaj awaꞌ tak ruꞌum i Dios. 18 Nachirak rikꞌijil chacꞌux aweh tak i quitiꞌjolal take kꞌatal kꞌoric eh jeꞌ woꞌ reꞌ quitiꞌjolal take sol chꞌi̱l tak cꞌamol quibe̱h. Jeꞌ reꞌ nok chacꞌux aweh tak i quitiꞌjolal take cꞌacharel nimak eh chi cucꞌ tak quiwach. Chacꞌux woꞌ aweh tak i quitiꞌjolal take cawa̱y chꞌi̱l woꞌ quitiꞌjolal take cꞌacharel quibehic china̱. Chacꞌux woꞌ aweh tak i quitiꞌjolal take cꞌacharel choplic on maꞌ choplic quina̱ ru̱cꞌ cow laj camanic ru̱cꞌ riwaꞌric jenoꞌ ajabe̱s, nqui cꞌahchiꞌ rikꞌorom queh.
19 Chiri̱j chic ruꞌ reꞌ hin xwilow wach i maꞌ laj chicop xa cꞌahbil chic rilbal, chꞌi̱l woꞌ take kꞌatal kꞌoric ayuꞌ wach acꞌal eh chꞌi̱l woꞌ take qꞌuih tuhm chi sol quimolom qui̱b chi kꞌakꞌanic ru̱cꞌ i tzꞌuklic nah sak ri̱j cawa̱y chi richꞌi̱l woꞌ take raj tzꞌeꞌ wa̱ch reꞌ quihchꞌilinic reh chi riso̱l. 20 Xa reꞌ laꞌ reꞌ tzꞌuklic china̱ i sak ri̱j cawa̱y xbanic canar i kꞌakꞌanic eh chi jeꞌ reꞌ xchoporic woꞌ i maꞌ laj chicop xa cꞌahbil chic rilbal. Naxchoporic ruꞌ, xchoporic woꞌ i chucul aj kꞌorol riCꞌuhbal i Dios. Reꞌ aj kꞌorol wili ar nak ricꞌul rajawric ru̱cꞌ i maꞌ laj chicop chi ribanaric take sahchbal cꞌuxlis eh chi ru̱cꞌ take sachbal cꞌuxlis reꞌreꞌ kꞌe̱ꞌ take cꞌacharel xijotꞌ. Chi jotꞌo̱j chic quicapew-bal, reꞌ take reꞌ xquicꞌul i rehtalil ribihnal i maꞌ laj chicop eh xquilokꞌej woꞌ wach i tiyo̱x reꞌ tikꞌimaj ru̱cꞌ rijalwachil i maꞌ laj chicop reꞌreꞌ. Naxichoporic aj take quib reꞌreꞌ, reꞌ maꞌ laj chicop chꞌi̱l i raj kꞌorol, xicuturic chi cꞌacha̱ch take ar chipam i yeꞌa̱b reꞌ xa ntenic chic cho rikꞌakꞌil eh xa sute̱n chic pa̱m chi asu̱pra reꞌ xa nquihic chic richuhil. 21 Chiri̱j reꞌ, reꞌ chic take riqꞌuihal quiso̱l take kꞌatal kꞌoric xmoloric quiwach chi naquicansjic eh jeꞌ ricab nok jenaj cꞌul kꞌas reh chꞌihchꞌ ncojoric chi cansbal, reꞌ xcamanic reh i tzꞌuklic china̱ i sak ri̱j cawa̱y, reꞌ i rikꞌorbal reꞌ xitakꞌa̱ꞌ wi̱ꞌ quicansjic take sol reꞌreꞌ. Naxiban chi jeꞌ reꞌ, chiꞌnchel take cꞌuch xquinuksaj qui̱b chi coric ru̱cꞌ ricꞌuxuric quitiꞌjolal take chiꞌnchel take xicansjic reꞌreꞌ.