2 KRONIKEL
Oaralap
Keriaun Kronikel tepida sang ni imwin Keieun Kronikel. Pwuhk wet koasoia duwen mwehin Nanmwarki Solomon, e ntinting duwen Seropoham eh kaunda kadaudok en paliepeng oh uhwongada Reopoham, sapwellimen Nanmwarki Solomon pwutak me uhd wiliandi oh wiahla nanmwarki, oh pil pepeuslahng poadopoad en wehin Suda lao lel ni pwupwulahn Serusalem nan pahr 586 mwohn Krais.
Audepe ni Oaralap
Mwehin Solomon 1.1—9.31
a. Sounpar en mwowe kan 1.1-17
b. Kokoudahn Tehnpas Sarawio 2.1—7.10
c. Sounpar en mwuri kan 7.11—9.31
Mwekid en uhwong sang kadaudok en palimese kan 10.1-19
Nanmwarki kan en Suda 11.1—36.12
Pwupwulahn Serusalem 36.13-23
1
Nanmwarki Solomon Peki Kupwurokong
(1 Nanmwarki 3.1-15)
Solomon, sapwellimen Nanmwarki Depit pwutak, ketin kakehlakahla sapwellime manaman pohn wehin Israel, oh KAUN-O, eh Koht, ketin kupwuramwahwih oh ketin karosonehda.
Nanmwarki Solomon ketin malipepene lapalap koaros me kin apwalih pwihn en sounpei kid oh pwihn epwiki, lapalap koaros en wehi, kaunen peneinei koaros oh aramas teikan koaros, e ahpw mahsanihong irail re en iang ih ketila ni wasahn kaudok nan Kipeon. Irail eri ketila wasao, pwehki ih wasa me Impwal me KAUN-O kin ketiket loale kin mihmi ie, me Moses, sapwellimen KAUN-O ladu, wiadahr nan sapwtehno. (Ahpw Kohpwahn Inowo mihmi nan Serusalem ni ahnsowo, nan impwal ehu me Nanmwarki Depit ketin kauwada, ahnsou me e ketikihdo Kohpwao sang Kiriad Searim.) 2 Sam. 6.1-17; 1 Kron. 13.5-14; 15.25—16.1. Pei sarawi prons me Pesalel nein Uri, me pahpa kahlapki Hur, wiahda, pil mihmi nan Kipeon mwohn Impwal me KAUN-O kin ketiket loale. Nanmwarki Solomon oh aramas koaros ahpw wia arail kaudok wasao. Eks. 38.1-7. Nanmwarkio eri kaudokiong KAUN-O mwohn Impwalo oh wiahda meirong kei pohn pei sarawi pronso; e kemehla mahn kid oh wiahkihla meirong isihs me pwonte.
Koht ketin pwarohng Solomon pwohngo oh keinemwe, “Dahme ke mwahuki I en kihong uhk?”
Solomon patohwan sapeng, “Maing, komwi ketin kasalehiongehr sapwellimomwi limpoak ong semei Depit, oh met komwi pil ketin mweidohngieier I en wiliandi wiahla nanmwarki. Maing KAUN, ei Koht, komw ketin kapwaiada inou me komwi ketin wiahiongehr semeio. Komwi ketin kupwuredahr I en wiahla nanmwarki oh kakaun uwen tohtohn aramas ehu me sohte kak wadawad, Sen. 13.16; 28.14 10 eri, komwi kupwurehkin ie kupwurokong oh erpit me I anahne pwe I en apwalih mwahu sapwellimomwi aramas pwukat. Pwe ia duwen ei pahn kak kaunda uwen tohtohn sapwellimomwi aramas akan?”
11 Koht eri ketin sapeng Solomon, mahsanih, “Ke wiadahr pilipil pwung ehu. Ke sohte peki kepwehpwe de dipwisou kaselel de ndand de mehlahn omw imwintihti kan de mour werei, ahpw ke peki kupwurokong oh erpit pwe ke en kak kaunda nei aramas akan me I kasapwilkinuhkada pwe ke en kakaun. 12 Eri, I pahn kihong uhk kupwurokong oh erpit. Oh likin mepwukat, I pil pahn kalaudehla omw pai, dipwisou, oh ndand me sohte nanmwarki men ahneki sang mahs kohdo oh pil sang met kohkolahte.”
En Solomon Manaman oh Kepwehpwe
(1 Nanmwarki 10.26-29)
13 Solomon eri sapahllahsang wasahn kaudoko nan Kipeon, wasa me Impwal me KAUN-O kin ketiket loale mihmi ie, oh sapahllahng Serusalem. E ahpw kakaun mehn Israel wasao. 14 E ahpw ketin koasoanehdi pwihn en doare wehi ehu me tohtohki werennansapw kid pahpwiki oh oahs en mahwen nen riekid. E ketikihdi ekei nan Serusalem, oh luhwe ko e ketikipeseng wasa kei nan kahnimw kei. 1 Nan. 4.26. 15 Ni eh mwehi, silper oh kohl duwehla takai mwahl nan Serusalem, oh tuhke sidar tohtohla duwehte tuhke sikamor ni tepin dohl kan nan Suda. 16 Sapwellimen nanmwarkio tohndoadoahk kan me kolokol manaman en kapedolong oahs kan sang Musri oh Silisia,a MUSRI OH SILICIA: Ahd en mahs met kan, a rahnwet wasa ko adaneki Turkey palieir en palimese, iei wasa pwukat me kin kapara oahs ni mwehin Solomon. Deud. 17.16. 17 oh kapedolong en werennansapw en mahwen sang Isip. Iei irail me kin netikihong nanmwarki kan en Id oh Siria oahs oh werennansapw en mahwen. Re kin netikihla werennasapw pwoat ni uwen mwohni silper 600 oh emen oahs ni uwen mwohni silper 150.

1:4: 2 Sam. 6.1-17; 1 Kron. 13.5-14; 15.25—16.1.

1:5: Eks. 38.1-7.

1:9: Sen. 13.16; 28.14

1:14: 1 Nan. 4.26.

a1:16: MUSRI OH SILICIA: Ahd en mahs met kan, a rahnwet wasa ko adaneki Turkey palieir en palimese, iei wasa pwukat me kin kapara oahs ni mwehin Solomon.

1:16: Deud. 17.16.