Rongamwahu me Ntingdier sang rehn
SOHN
Oaralap en Pwuhk wet
Rongamwahu en Sohn kasalehda duwen Sises me iei Mahsen en Koht soutuk, me “wia-aramasala oh ketiketier rehtail.” Nin duwen pwuhk wet eh mahsanih, pwuken Rongamwahu wet ntingdier pwe irail kan me pahn kin wadek, re en pwoson me Sises, iei ih Sounkomour me inoupe wiawiher, iei ih Sapwellimen Koht, oh arail pwoson ih, re en ahnekihla mour (20.31).
Mwurin ire tikitik kan me kasalehda nin tepin pwuhk wet duwen Mahsen en Koht soutuk iei Sises, pali keieun Rongamwahu wet koasoiahda duwen kilel (de manaman kei) me kadehdehda me Sises, iei ih Sapwellimen Koht, Sounkomouro me inoupe wiawiher mahso. Eri mwuhr, kapahrek kei me wiawiher me kawehwehda mouren kilel ko. Palien pwuhk wet pil kasalehda duwen aramas ekei ar pwosonla Sises oh wiahla sapwellime tohnpadahk, a ekei uhwong Sises oh sohte mwahn kamehlele. Ire laud 13-17 koasoia duwen en Sises oh sapwellime tohnpadahk ko arail miniminpene mehlel nipwongo me mehn Suhs ko pahn salihedi ih, oh pil duwen sapwellime mahsen en kaunop oh koangngoange irail mwohn eh pahn pwoula nin lohpwuwo. Eri, ire laud kan me kaimwisekala pwuhk wet, iei koasoiepen en Sises eh selidi oh kopwung mwohn mwoalen kopwung, oh ketin kalohpwuwala oh iasada, oh pil eh ketin pwarohng sapwellime tohnpadahk ko mwurin eh iasada.
Rongamwahu en Sohn kin kawehwehda ni mehlel kisakis de kalahngan en mour soutuk me Krais kin kahrehiong kitail, kalahngan me kin tepida ahnsou wet oh kin kohieng irail kan me kin wiahki Sises alarail, ar mehlel, oh ar mour. Me kin dehde mehlel duwen Rongamwahu en Sohn, iei duwen eh kin wiahki soahng mengei tohto me aramas ahnlahr ahnsou koaros kilelepen padahk duwen mehkan ni pali ngehn, duwehte pihl, pilawa, marain, silepen sihpw oh nah pelin sihpw, oh pil tuhkehn wain oh wah kan.
Audepe ni Oaralap
Tepin pwuhk wet 1.1-18
Sohn Sounpapidais oh tepin tohnpadahk en Sises 1.19-51
Sapwellimen Sises doadoahk ni pokon sansal 2.1—12.50
Kaimwiseklahn rahn akan en mouren Sises nan Serusalem oh limwah 13.1—19.42
En Kaun Sises eh ketin iasada oh pwarohng sapwellime ko 20.1-31
Kaimwiseklahn pwuhk wet: Sises pil ketin pwarohng sapwellime ko nan Kalili 21.1-25
1
Mahsen en Mour
1 Mahseno ketiketier rehn Koht mwohn tepin kawa; pwe Mahseno, iei me Koht. 2 Iei ih me ketiketier rehn Koht mwohn tepin kawa. 3 Koht ketin kapikekihda mehkoaros Mahseno: oh sohte mwahn mehkot mie me Mahseno sohte ketin kapikada. 4 Mahseno iei ih poahsoan en mour; oh mour wet, iei me kin kamarainih aramas akan. 5 Marain wet ahpw kin dakedaker nan rotorot, oh rotoroto ahpw sohte mwahn kasohrehla.
6 Mie aramas emen me pekederdo sang rehn Koht, me ede Sohn. Mad. 3.1; Mark 1.4; Luk 3.1-2. 7 Aramas menet pwarodo pwe en wia kadehdepen maraino, pwe aramas koaros en rong Mahseno oh pwosonla. 8 Kaidehn ih me maraino, ahpw e pwarodo pwe en kadehdehda duwen maraino. 9 Eri, Mahseno, iei me marain mehlelo me pwarodohng sampah pwe en kamarainih aramas akan koaros.
10 Eri, Mahseno ketier nin sampah, oh iei ih me Koht ketin kapikekihda sampah. Ahpw tohn sampah kan sohte ese ih. 11 E ahpw ketidohng sapwellime wasa, a sapwellime kan sohte kasamwo. 12 Eri soh, ekei kasamwoier oh pwosonlahr. Eri, e ahpw ketikihong irail pwung en wiahla sapwellimen Koht. 13 Irail pwukat sohte wiahla sapwellimen Koht sang ni elen kaipwidi aramas, pwe pein Koht, iei me ketin sapwellimanikinirailla.
14 Mahseno eri wia-aramasala oh ketiketier rehtail. Kitail kilangehr sapwellime lingan, me diren kalahngan oh mehlel, sapwellime lingan me ih, Iehros en Koht, ale sang rehn Seme.
15 Eri, Sohn kadehdehda duwen ih ni eh liklikwerki, “Iei ih ohlo me I koasoakoasoia duwe ni ei nda, ‘Emen pahn ketido mwuri, me lapalapasang ie, pwe e ketiketier mwohn ei ipwidi.’ ”
16 Sang ni reken sapwellime kalahngan, e ketin kapaiahkin kitail poatopoat soangen kapai koaros. 17 Koht ketikihong Moses audepen Kosonnedo pwe en patohwanohng kitail, a kalahngan oh mehlel sang rehn Sises Krais. 18 Sohte me kin kilangki Koht mese. Sapwellime Iehrosohte, me duwehte Koht, me kin ketiket ni palimaun en Sahmo, iei ih me ketin kasalehiong aramas akan duwen Koht.
Padahk en Sohn Sounpapidais
(Pil tehk Mad. 3.1-12; Mark 1.1-8; Luk 3.1-18)
19 Lapalap en mehn Suhs ako kadarala sang Serusalem samworo kei oh mehn Lipai kei pwe re en idek rehn Sohn, “Ihs komwi?”
20 Sohn sohte kahng sapeng, e ahpw koasoiada ni sansal, “Kaidehn ngehi Mesaia.”
21 Irail eri kalelapak, “A da? Komwi me Elaisa?”
Sohn sapeng irail, nda, “Soh. Kaidehn ngehi ih.”
Irail pil kalelapak, “Eri da? Komwi Soukohpo?” aSOUKOHPO: Mehmen me aramas akan kin kasikasik me pahn pwarodo oh kalohkihdo ketidohn Mesaia.
A e sapeng, “Soh.” Mal. 4.5; b Deud. 18.15,18; Sir. 48.10-11.
22 Irail ahpw nda, “A komw padahkihong kiht ihs komwi, pwe se en kak sapengki irail ko me kadarkitodo. Dahme komw pahn mahsaniheki duwen pein komwi?”
23 Sohn ahpw sapeng, nda,
“Ngehi ‘ngihl ehu me likilikwerseli nan sapwtehn:
Kumwail kainenehla elen Kaun-o pwe en ketin keid ie!’ ”
nin duwen me soukohp Aiseia mahsaniher. Ais. 40.3 (LXX).
24 Sounkair pwukat me pekederdo sang rehn Parisi ko, 25 ahpw idek rehn Sohn, “A dahme kahrehda komw wiewiahki papidais, ma kaidehn komwi Mesaia, de Elaisa, de Soukohpo?”
26 Sohn eri sapengkin irail, “Ngehi I kin papidaiski pihl, a mie emen me ketiket nanpwungamwail, me kumwail sehse, 27 iei ih me pahn ketido mwuri; oh I sohte warohng I en lapwahda selin sapwellime suht.”
28 Mepwukat koaros wiawiher nan Pedani, palio Pillap Sordan, wasa me Sohn kin wiewia ie papidais.
Sihmpwul en Koht
29 Mandahn rahno, Sohn ahpw kilangada Sises eh ketiket kodohng reh, e ahpw patohwan, “Kilang! Ien Sihmpwul en Kohto me kin ketikihsang dipen sampah koaros. 30 Iei ih ohlo me I koasoakoasoia duwe ni ei patohwan, ‘Ohl emen pahn ketido mwuri, me lapalapasang ie, pwehki eh ketiketier mwohn ei ipwidi.’ 31 Pein ngehi sohte ese ih. Ahpw iet kahrepen ei pwarodo oh papidaiski pihl, pwehn kasalehda ih ong mehn Israel.”
32 Iet kadehde me Sohn pil kasalehda: “I kilangehr Ngehn Sarawio eh ketidihdo sang nanleng, ni mwomwen mwuroi men; e pihrdi oh ketiket powe. 33 Pein ngehi saikinte ese ih, ahpw Koht, me ketin kadariehdo pwe I en kin papidaiski pihl, e pil mahsanihong ie, ‘Mehmen me ke pahn kilang Ngehno eh pihrdi oh ketiket powe, iei ih me kin papidaiski Ngehn Sarawi.’ 34 I kilangehr oh I pil kadehdeier me iei ih Sapwellimen Koht.”
Tepin Tohnpadahk en Sises kan
35 Mandahn rahno, Sohn pil mihmi wasao, iangahki nah tohnpadahk riemen. 36 Ni eh kilangada Sises eh ketiket kohla, e ahpw patohwan, “Kumwa kilang! Ien Sihmpwul en Kohto!”
37 Tohnpadahk riemeno ahpw rongada eh koasoi; ira eri idawehnla Sises. 38 Sises ahpw ketin sohpeido oh mahsanihada ara ideidawehn, e ahpw mahsanihong ira, “Dahme kumwa raparapahki?”
Ira eri sapeng, patohwan, “Rapai, (lepin mahsen wet wehwehki “sounpadahk”) ia wasa komw kin ketiket ie?”
39 E ahpw ketin sapeng ira, mahsanih, “Kumwa kohdo kilang.” Eri, ira ahpw iangada oh kilangada wasa me e kin ketiket ieo, ira eri patopatohte reh rahno (pwehki eh kereniong kulok pahieu mwurin souwas.)
40 Emen ira iei Andru, rien Saimon Piter. 41 Andru ahpw mwadang diarada rie Saimon, oh ndaiong, “Se diaradahr Mesaiao!” (Ih wehwehn lepin mahsen pwoatet Krais.) 42 E ahpw kahrelahng Piter rehn Sises.
Ni Sises eh mahsanihada Piter, e ahpw mahsanihong, “Ih kowe Saimon, me nein Sohn. Ke pahn adanekihla Kepas.” (Met wehwehki Piter, me pil wehwehki ‘Paipalap.’)
Sises Malipe Pilip oh Nadaniel
43 Mandahn rahno, Sises kupwurehda en ketilahng Kalili, e ahpw diarada Pilip, oh mahsanihong, “Idawehniehdo!” 44 (Eri, Pilip mehn Pedsaida, iei nan kahnimw wet me Andru oh Piter kin kousoan ie.) 45 Pilip eri tuhwong Nadaniel oh ndaiong, “Se diaradahr ohlo, nin duwen me Moses ntingihedier nan Pwuken Kosonnedo, oh pil soukohp ako. Iei ih Sises nein Sosep, sang Nasaret.”
46 Nadaniel ahpw idek reh, “Ia duwe, kakete mehkot mwahu en pwarada sang Nasaret?”
Pilip ahpw sapengki, “Nna, kohdo kilang.”
47 Ni Sises eh mahsanihada Nadaniel eh kohkohdo, e ahpw mahsanih, “Iet uhdahn ohl mehlel en Israel men, me sohte kin widing!”
48 Nadaniel ahpw patohwanohng, “Komw mwahngih ie sang ia?”
Sises eri ketin sapeng, mahsanih, “I kilanguhkadahte mwohn Pilip eh ekeruhkodo, ni omw mihmi pahn tuhke piko.”
49 Nadaniel ahpw sapeng, patohwan, “Maing Sounpadahk, uhdahn Sapwellimen Kohto komwi! Komwi me Nanmwarkien Israel!”
50 Sises ketin sapeng, mahsanih, “Ia duwe, ke kamehlele pwehki ei ndaiong uhk me I kilanguhkada ni ahnsou me ke mihmi pahn tuhke piko? Ke pahn kilang soahng kei me lapasang mepwukat!” 51 E pil ketin mahsanihong irail, “I ndaiong kumwail ni mehlel, kumwail pahn kilang nanleng eh ritidahr, oh tohnleng en Koht akan ni ar douda oh doudi pohnangin Nein-Aramas.” Sen. 28.12.