149
Koulen Kaping
1 Kapinga KAUN-O!
Kumwail koulki koul kapw pwoat ong KAUN-O;
kumwail kapinga ih mwohn pokon en sapwellime aramas loalopwoat akan.
2 Israel, ke en nsenamwahula, pwehki Sounwiepomw;
tohn Saion, kumwail perenda, pwehki amwail nanmwarki.
3 Kumwail kahlek kapingahki mware;
kumwail kesengki aip oh arp kapikapinga ih.
4 KAUN-O kin kupwurperenki sapwellime aramas akan;
e kin ketin kawauwihkihla powehdi en me aktikitik kan.
5 Sapwellimen Koht aramas akan en perenkihda ar powehdi
oh re en kokoul en peren pwohng ehu unsek.
6 Re en ngisingis nindokon ar kapikapinga Koht,
kolokol nair kedlahs keng kan 2 Mak. 15.27.
7 pwe re en kalowehdi wehi kan
oh kaloke aramas akan;
8 pwe re en salihkihdi sahl mete ar nanmwarki kan,
ar kaun akan nan seliparail selmete kehlail;
9 pwe re en kaloke wehi kan nin duwen Koht eh ketin koasoanehdi.
Ih met powehdi en sapwellimen Koht aramas akan.
Kapinga KAUN-O!