1 Sudas Makapius eri wiliandi eh pahpa Madadaias. 2 Rie ko koaros oh irail koaros me iangala eh pahpao, re pil utung Sudas oh perenki iang mahmahweniong en Israel eh imwintihti kan.

10 Apolonius eri kapokonepene karis en mehn liki kei, iangahki sounpein Sameria kei pwehn mahweniong mehn Israel. 11 Ni Sudas eh rongada met, e ahpw kohla pwehn mahweniong Apolonius. E ahpw kalowehdi oh kemehla. Me tohto rehn mehn liki ko ahpw kamakamala oh me luhwe ko tangdoaui. 12 Sudas eri ale nein Apolonius kedlahso, ni dipwisou lohdi nan mahweno ar wisikpene, oh kin wie doadoahngki nan mahwen koaros erein eh mour.

13 Seron, kaun lapalap en sounpein Siria kan rongada me Sudas kapokonepenehr karis lapalap ehu, iangahki pwihn loaloapwoat ehu me onopadahng iang mahwen pahn kaweidpe. 14 Seron ahpw mengimengloalki, “I pahn alehdi lengileng lapalap ehu nan wehiet ni ei pahn mahweniong oh kalowehdi Sudas oh ienge ko, me sohte kin peikiong sapwellimen nanmwarki kosonned.” 15 Ih eri tapihada uhwong Sudas. Mehn Suhs tohto me sohte wauneki Koht ahpw iangala pwe re en sewese dupuk suwed ong mehn Israel ko. 16 Ni arail lel wasa me adaneki Ped Oron, Sudas mwekidla pwehn tuhwong irail, iangahki sounpei malaulau. 17 Ni nein Sudas sounpei ko ar kilangada kiden sounpei me kohkodohng irail, re idek rehn Sudas, “Ia duwen atail pahn kak mahweniong soangen lapalahn karis duwe met nan atail malaulau oh ni atail kaisihsol rahnwet oh ngiralahr mehlel?”

18 Sudas ahpw sapengkin irail, “Kaidehk mehkot apwal ehu me malaulau en kalowehdi me tohto. Mwohn silangin Kaun-o sohte wekpeseng mie ma e men ketikihong powehdi ong me tohto de ong me malaulau. 19 Pwe powehdi nan mahwen sohte kin pwilisang ni uwen laud en karis kan pwe ni manaman en Kaun-o me kin kohsang nanleng. 20 Atail imwintihti kan kohkodohng mahweniong kitail diren aklapalap oh loalsuwed pwe re en adihasang kitail atail kepwe kan, kemehla atail pwoud kan oh neitail seri kan. 21 Ahpw kitail mahmahwenki atail mour oh atail kosonned akan. 22 Ni atail pahn mahweniong irail, Kaun-o pahn ketin kamwomwirailla mwohn masatail kan, eri kumwail dehr masepwehk.”

23 Mwurin Sudas eh kaerala eh lokaia pwukat, e mwadangete poar pohn Seron oh mahweniong nah kariso oh kaloweiraildi. 24 Re ahpw pwakihraildihla ni ukedilahng Ped Oron kolahng nan patapato oh kemehla sounpei kereniong 800. A luhwe ko tangalahng nan sapwen mehn Pilisdia ko. 25 Mwurin met, mehn liki kan ahpw tapihada masakala Sudas oh rie ko wasa koaros nan sahpwo. 26 Eh ndand ahpw lellahng Nanmwarki Antaiokus, oh wehin liki koaros ahpw kin koasoakoasoia duwen Sudas oh pweidahn eh mahwen kan.

27 Ahnsou me Antaiokus karongehda wiewia pwukat, e inenen engiengda kowahlap. E ahpw koasoanehdi pwe karis koaros en sapwellime wehi en kohpene oh wiahla karis lapalap ehu. 28 E ahpw ritingada sapwellime wasahn nek mwohni en wehi oh ketikihong emenemen sounpei pweinen sounpar ehu, oh mahsanihong irail re en onopada ong ahnsou apwal. 29 E ahpw mahsanihada duwen wasahn nek mwohni en wehi eh tikitiklahr. Duwen kapedolong en mwohni sang daksis eh pil tikitik pwehki saminimin oh kahpwal me pein ih kahrehiong sampah ni eh men kasohrehla kosonned akan me sang mahs kohdo wie poadoapoad rehrail. 30 Ih eri perkihda me e solahr pahn kak ketikihda uwen mwohni me kin pwain tohndoadoahk kan oh pil kin pwainda kisakis kan me e kin epwehnki kisakiskihla, me laudsang sapwellimen nanmwarki en mahs ako ar kisakis kan—met wiawiher pak ehu de riau mahs. 31 E inenen pwunodada iei me e kupwurehda en ketila Persia, pwehn ketin rikpene daksis sang nan wehi kan oh ketikipene uwen mwohni laud ehu.

32 Ih eri ketin idihada Lisias, ohl lapalap mehlel men nan wehio me lengilengki “Kisehn Nanmwarki” pwehn wia kepina men oh apwahpwalih sapwellimen nanmwarkio mwekid koaros nan wehio sang ni Pillap Iupreitis lellahng ni irepen Isip. 33 E pil ketin kilelehdiong en apwahpwalih sapwellime pwutak Antaiokus Kelimmen lao e pahn sapahldo. 34 E pil ketikihong en apwalih elepant koaros oh elep en sapwellime karis; pil koasoandi kan me e kupwukupwure en kin wiawi, ahpw mehlel ong me pid mehn Sudia oh mehn Serusalem kan. 35 E ketin koasoanehdi pwe Lisias en kadarala ehu karis en sounpei pwehn kamwomwala mehn Suhs akan, ahpw mehlel mehn Suhs kan me mihmi Serusalem, oh en kauwehla arail manaman oh kamwomwirailla. 36 E ketin koasoanehdi pwe sapwen mehn Suhs ko en pehdsang oh kohieng mehn liki kan, me pahn kak kousoanla wasa ko. 37 Nanmwarki eri ketikihda elep en kariso oh ketin mwesel sang Andiok, poahsoan kaunen wehio ni pahr 147.ePAHR 147: Sounpar wet pahrekiong pahr 165 mwohn Krais. E ahpw ketin kotehla Pillap lupreitis oh kotehla Mesopodamia.

38 Lisias eri pilada Nikanor, Korkias oh Tolemi nein Dorimenihs, pwe re en wia kaunen karis kan; irail koaros ohl wadawad ekei me mwarenki “Kompoakepahn Nanmwarkio.” 39 E ahpw kadarirailla iangahki sounpein nansapw 40,000 oh sounpein dak oahs 7,000 pwe re en mahweniong wehin Sudia oh kamwomwala duwen nanmwarki eh koasoanehdi. 40 Kaunen sounpei pwukat ahpw mwekidla iangahki ar tehtehn mahwen koaros oh ni ar lel limwahn Emaus, re kauwada ar impwal kan wasao. 41 Pwihnen sounpei kei sang Idumea oh Pilisdia ahpw iangirailla. Sounnetinet en wasa ko ahpw rongada duwen kehlail en kariso, re kihpene kiden mwohni silper oh kohl iangahki selmete, oh kohla nan impwal ko, pwe re en pwainda ekei ar lidu mehn Suhs.

42 Sudas oh rie ko kilangada duwen ar apwal eh lalaudla pwehki karis en mehn liki ar kauwadahr ar impwal ko nan irepen sapwarailo. Re pil esedahr duwen koasoandi en namwarkio me dene mehn Suhs kan en kamwomwmwomwla. 43 Irail eri koasoanehdi pwe re en onehda sapahl ar wehio me ohlahr oh mahwenki ar wehi oh Tehnpas Sarawio. 44 Irail eri pokonpene pwe re en onopadahng mahwen oh peki sawas sang rehn Koht.

46 Sudas oh nah sounpei ko ahpw pokonpene oh mwesellahng Mispa, me mihte sallahng Serusalem, pwe mie en mehn Israel ko wasahn kaudok ehu kin mi wasao mahs. 47 Irail eri kaisihsol rahno pwon, pwuhriong nan likoun nsensuwed, kamwerediong pehs pohn moangarail kan oh tehrpeseng ar likou kan. 48 Ni soangen ahnsowo mehn liki kan kin rapahki dahme ar dikedik en eni kan pahn padahkiong irail, ahpw mehn Israel kan kin pahkpeseng pwuken Kosonnedo pwe re en rapahki kaweid sang rehn Koht. 49 Re wa kohla likoun samworo kan, mehn meirong en tepin doandoal en wahn sahpw, eisek kis ehun ar dipwisou kan, re ahpw ekerpene Nasaraid kei me kaimwiseklahr ar inou. 50 Irail koaros eri kapakap, patohwan, “Maing at Kaun, dahme se pahn wiahiong mepwukat? Ia wasa se pahn kahreiraillahng ie? 51 Pwe sapwellimomwi Tehnpas Sarawio tiatipesengehr oh saminlahr oh sapwellimomwi samworo kan mwahmwahiei pwehki ar sarohdier. 52 Mehn liki kan ehupenehr pwe re en uhwong kiht oh kauweikitala. Komw mwahngih dahme re koasoakoasoane ong kiht! 53 Ma komw sohte pahn ketin sewesei kiht, ia duwen at pahn uhwong irail?” 54 Irail eri peuk sowi oh weriwer.

55 Mwurin mwo, Sudas nehkpeseng nah aramas ako ong ni pwihnen sounpei me wad ehk, limehk, epwiki oh kid, e ahpw kilelehiong emen kaun ong ehuehu pwihn. 56 Eri, pwe re en kapwaiada Kosonnedo, e kadaralahng ni imwarail ko koaros me ahpwtehn pwopwoudida, ahpwtehn kauwada imwe, de ahpwtehn padok eh mwetin wain, iangahki irail kan me masepwehk.Deud. 20.5-8; S.K 7.3. 57 Mwuri, kariso ahpw mwekidida oh kohla koasoansoandi palieir en Emaus. 58 Sudas ahpw ndaiong irail wasao, “Kumwail kaunopada noumwail tehtehn mahwen kan oh dehr masepwehk, kumwail kommwad. Kumwail onopada nimensehngie en lakapw pwe kitail pahn mahweniong mehn liki pwukat me pokonpenehr pwehn kauweikitailla oh atail Tehnpas Sarawio. 59 Atail mehla nan mahwen mwahu sang atail pahn mwomwohd mwahl uduhdial ohlahn atail wehi oh atail Tehnpas Sarawio. 60 Ahpw kupwuren Kaun-o en pweida.”