1 Ni Demihtrius eh karongehda me Nikanor oh sapwellime karis lohdier nan mahwen, e ahpw pwurehng kadarala Pakidihs oh Alsimus nan wehin Sudia, met e iangahki sounpei kan en palimaun en sapwellime kariso, me mehn Siria towehda. 2 Re mwekidla nanial en Kilkal, kapilpene Masalod nan Arpela oh kalowehdi oh kemehla aramas tohto. 3 Ni keieun sounpwong en pahr 152,lPAHR 152: Sounpar wet pahrekiong pahr 160 mwohn Krais. re kauwada ar impwal kan sallahng Serusalem.

4 Re ahpw mweselsang wasao kolahng Perea, iangahki sounpei alu 20,000 oh sounpein dak oahs 2,000.

5 Sudas oh nah sounpei pilipil oh koahiek 3,000 kauwada ar impwal kan limwahn Elasa. 6 Ahpw ni ar kilangada uwen tohtohn imwintihti ko, re masepwehkada. Me tohto eri tangdoaui oh mehte 800 me luhwe. 7 Ni Sudas eh kilangada me eh kariso tikitiklahr oh mahweno nektehn tepida, e ahpw pwunodada pwe solahr ahnsou en kapokonepene nah sounpei ko. 8 Nan kapehde inenen tikitikla, e ahpw ndaiong irail ko me luwehdi, “Nna kitail kaunopada mahwen, mweinele kitail pahn kakete kaloweiraildi.”

9 Ahpw nah sounpei ko song en kapweiekdi, re ndaiong, “Kitail sohte kak. Kitail pweiekla met oh doarehla atail mour. Kitail nek pwurodo iangahki ekei sounpei oh mahweniong irail. Pwe met kitail me malaulau.”

10 Sudas ahpw sapengkin irail, “Keinepwi I en tangasang ei imwintihti kan. Ma atail ahnsou leledohr, me mwahu kitail en mehkihla riatail mehn Suhs kan sang kasaminehla lingan en atail wehi.”

11 Karis en Siria ko ahpw mwekidsang nan ar impwalo ko oh irekla onopada pwe re en mahweniong mehn Suhs ko. Sounpein dak oahs ko pwalpeseng wiahda pwihn riau. Sounpei ko me tieng, a sounpein kesik ketieu oh pahi mi mwohn irek en sounpei ko. 12 Pakidihs mi ni palimaun en kariso. Sounpei alu ko mwekidla oh peuk nair sowi kan oh sounpein dak oahs ko mi palimeing oh palimaun pwe re en doare irail. Nein Sudas sounpei ko pil peuk nair sowi ko. 13 Pwehlo rerada ni karis riauo ara mahwenda. Re ahpw pepei lao lel nin soutik.

14 Ni Sudas eh kilangada me Pakidihs oh pali laud en karis en Siria ko mihmi ni palimaune, nah sounpei kommwad koaros iangada ih, 15 re ahpw poar pohn karis en Siria ko me mi palimaun. Re pwakihirailla lel ni keilen nahna kan. 16 Ni ahnsou me sounpein Siria ko me mi palimeing kilangada sounpein palimaun ko ar tangpesengier, re ahpw pwakihala Sudas. 17 Mahweno inenen ukla mehlel, kahrehda me tohto sang nan pali riauo mehla. 18 Sudas eri pil mehla. Eri, nah sounpei koaros ahpw tangdoaui. 19 Sonadan oh Saimon ahpw ale paliweren riarao oh sarepedi nan sousou en samarail ko nan Modein, 20 ira eri sengiseng ni sousouwo. Israel pwon ahpw mwahieiki erein rahn tohto. Re nda, 21 “Apwal ehu met! Sounpei ndand oh sounkomourpen Israel melahr!”

22 Wiewia teikan en Sudas, mahwen kan me e wia, eh kommwad, oh eh pweida kan, sohte kak ntingdi koaros pwehki eh nohn tohto.

23 Mwurin mehlahn Sudas, aramas loallap suwed kan ahpw pwurehng pwarada wasa koaros nan Sudia, oh soangen wiewia suwed koaros pil pwarada. 24 Pil ni ahnsowo mie lehk lapalap ehu me kipehdi sahpwo oh tohn sahpwo koaros mihla pahn manaman en Pakidihs. 25 Pakidihs eri pilada mehn Suhs suwed kei pwe re en kakaun wehio. 26 Aramas pwukat ahpw kin kohseli oh rapahki kompoakepahn Sudas kan oh kin walahng rehn Pakidihs pwe en kaloke irail oh kanamenekih irail. 27 Sohte kahpwal ehu me pwarada nan Israel me laudsang met sang ni ahnsou me sohla soukohp nanpwungen mehn Israel kan.

28 Kompoakepahn Sudas ko eri pokonpene oh ndahng Sonadan, 29 “Sang mwurin riomwo Sudas eh mehla, sohte emen mie me kak kahluwai kitail pwe kitail en kak uhwong atail imwintihti kan, Pakidihs oh mehn Suhs koaros me kin uhwong kitail. 30 Kahrehda rahnwet se pilkomwidahr pwe komwi en wiliandi oh wiahla at kaun oh sounkaweid nan atail mahwen kan.” 31 Sonadan eri ale mwar en kaunepen mehn Suhs ko rahno oh wiliandi rie Sudas.

32 Ni Pakidihs eh rongada met, e koasoanehdi nan kapehde en kemehla Sonadan. 33 Ahpw ni Sonadan eh rongada met, e tangala nan sapwtehn en Tekoa iangahki rie Saimon oh nah sounpei ko oh kauwada ar kahnimpwalo limwahn lehen Aspar. 34 (Ni rahnen Sapad ehu me Pakidihs esehda me re tangehrdoaui, ih eri pwakihirailla kotehla Pillap Sordan iangahki nah karis en sounpei pwon.) 35 Sonadan eri kadarala rie Sohn, me pwukoahki apwalih en sounpei ar peneinei, pwe en peki rehn mehn Napatea ko, me re kin ehupene, pwe re en nekidala mahs ar kepwe kan pwehki eh nohn tohto. 36 Ahpw mehn Sampri en Medepa ahpw poar pohn Sohn oh salihedi oh wahsang mehkoaros me e weuwa. 37 Mwurin ahnsou kis Sonadan oh rie Saimon ahpw rongada duwen mehn Sampri ar pahn wia kamadipw en kapwopwoud kesempwal ehu, duwen ar pahn kapar oh pereperen kahre lih kamwohdo sang Nadapad. Lih kamwohdo iei nein soupeidi men en Kenan. 38 Sonadan oh Saimon men dupuk mehlahn riara Sohn, ihme ira oh neira aramas ako ahpw kohdahla oh rukula nanwel en nahna ehu. 39 Re ahpw mwasamwasahn oh kilangada lapalahn kapar katairong ehu me wa kepwe tohto. Ohl kamwohdo, iangahki kompoakepah ko oh eh peneinei kohkodohng tuhwong pwihn me wa lih kamwohdo. Re wisik tehtehn mahwen oh kesekeseng kohla. 40 Mehn Suhs ako ahpw mwadangete tangdihsang wasa re rukruruk ie oh peiong irail oh kemehla me tohto. A luhwe ko sopolahng pohn nahna kan, mehn Suhs ako ahpw wahsang ar kepwe kan koaros. 41 Eri, kopwopwoudo wiahla ahnsoun mwahiei oh arail keseng en peren wiahla keseng en kedepwidepw. 42 Sonadan oh Saimon ikiher mehlahn riarao ni mwuledek mehlel, ira eri pwuralahng ni lehpwelo ni keilen Pillap Sordan.

43 Pakidihs eri rongada met, e ahpw lellahng ni keilen Pillap Sordan ni rahnen Sapad ehu, iangahki nah karis kalaimwun ehu. 44 Sonadan ahpw ndaiong nah sounpei ko, “Met kitail pahn mahwen uwen atail kak. Kitail milahr nan irair me suwed sang mahs. 45 Imwintihti mi mwohtail oh pillapo mi mwuritail, wahl oh lehpwel me mi ni pengepengetail kan; sohte wasahn atail pitla. 46 Eri, kitail kapakapohng Kaun-o pwe en ketin doarei kitail sang atail imwintihti kan.”

47 Mahweno eri tepida, Sonadan oh nah sounpei ko kereniong kemehla Pakidihs, ahpw e mwadangete tangalahng mwurin kariso. 48 Sonadan oh nah sounpei ko ahpw papalahng palio Sordan oh tangdoaui, oh mehn Siria ko sohte pwakihirailla. 49 Ni rahno nein Pakidihs sounpei 1,000 mehla.

50 Mwurin Pakidihs eh pwuralahng Serusalem, mehn Siria ko ahpw kauwada kelen mahwen ile kei oh wenihmw mete wasa kei nan kisin kahnimw pwukat en Sudia: Emaus, Ped Oron, Pedel, Timnad, Piradon, Tepon, oh ni wasahn mahwen en Seriko. 51 E ahpw kihdi sounpei kei wasa pwukat pwe re en kahpwalih mehn Suhs kan. 52 E pil kakehlakahla wasahn mahwen kan en Pedsur oh Keser oh wasahn mahwen en Serusalem. E kihdiong sounpei kei wasa pwuko oh tehtehn mahwen kei. 53 Eri, e ahpw salihedi oh kolokol nan kelen mahweno nein lapalap en wasa pwuko nair pwutak kan pwe re en dehr kak wia mehkot.

54 Ni sounpwong keriau en sounpar 153,mPAHR 153: Sounpar wet pahrekiong pahr 159 mwohn Krais. Samworo Lapalap Alsimus koasoanehdi me kelen masloalen Tehnpas Sarawio en kerengkpeseng. Met ahpw kauwehla dahme soukohp ako kauwadahr; ahpw ni doadoahko eh tepida,

55 soumwahu ehu lel Alsimus, oh doadoahk ahpw katoktokdi. E mwoatorala oh sohla kak sarapeseng, e sohla kak lokaia oh pil sohla kak wiahda kisinlikoun kehkehlik duwen eh dipwisou kan ong eh peneinei. 56 E mehla nan eh weirek laud. 57 Ni Pakidihs eh rongada me Alsimus melahr, e ahpw pwurala rehn Nanmwarki Demihtrius, oh wehin Sudia ahpw meleileikihdi erein sounpar riau.

58 Aramas en Suhs suwed ko ahpw pokonpene oh nda, “Kumwail kilang, Sonadan oh nah sounpei kan nsensenamwahu oh meleilei ahnsou wet. Ma kitail kapwurehdo Pakidihs wasaht, e pahn kakete koliraildi pwohngtehpwong.” 59 Re ahpw kohla oh tuhkihong Pakidihs ire wet, 60 e ahpw mweselda wahda karis en sounpei kalaimwun ehu. E kadaralahng ienge kan nan Sudia kisinlikou kis ni rir, peki rehrail re en koledi Sonadan oh nah sounpei ko. Eri, re sohte kak wia pwehki koasoandio eh dierekda. 61 Sonadan oh nah sounpei ko koledi oh kemehla aramas 50 me iang pidada koasoandi en kemehla Sonadan. 62 Eri, Sonadan, Saimon, oh neira sounpei ko ahpw tangalahng Pedpasi nan sapwtehno. Re ahpw onehda sapahl kelen mahwen ko me rengkdier oh kakehlakahla wasahn poadoandoar en mahwen ko. 63 Ni Pakidihs eh rongada met, e kapokonepene nah kariso pwon oh pil pakairkihong irail kan me kin utung nan Sudia. 64 E ahpw kapilpene Pedpasi oh mahweniong sang pali koaros oh pil kuwada pasapas en mahwen kei. Mwurin mahweno eh wiewiawihki erein ahnsou reirei, 65 Sonadan eri kihdiong Saimon en apwalih kahnimwo, a ih oh kisin pwihnen sounpei ehu ahpw waieilahng nansapw. 66 Sonadan eri kalowehdi Odomera oh nah aramas ako, oh e ahpw mahweniong oh kamwomwala kahnimpwal en mehn Pasir kan. Ni ar lohdier, re iangala Sonadan oh mahweniong Pakidihs. 67 Ni ahnsowohte Saimon oh ienge ko tangeisang nan kahnimwo oh isikala pasapas ko oh dipwisoun mahwen ko. 68 Nan mahweno Pakidihs diarada apwal laud pwehki eh koasoandi kan eh sohte pweida, ih eri lohdi pahn Saimon. 69 E inenen lingeringerda pahn mehn Suhs suwed ko me kaweidki en pwurodo nan Sudia, ih eri kemehla me tohto rehrail.

Pakidihs eri koasoanehdi en pwuralahng nan uhdahn eh wehi. 70 Ahpw ni Sonadan eh esehda met, e kadarala meninkeder riemen rehn Pakidihs pwe ira en meleileipene oh kasaledekihala neira aramas poar mourdi kan. 71 Eri, Pakidihs pwungki dahme Sonadan peki reh. E ahpw kahukihla me e solahr pahn lidere Sonadan nindokon eh pahn momour. 72 Pakidihs eri kasaledekihala me e poar mourihdi ko oh pwurala nan uhdahn eh wehi. E sohte pwurehng pwurodo nan wehin Sudia. 73 Mahwen eri tokedi nan wehin Israel. Sonadan eri soandihla nan Mikmas, wasa e tapihada kaunda mehn Israel ko oh kasohrehsang nan wehin Israel aramas suwed ko.