1-3 Aramas ako sohte kak wia Sarawien Pahsohpa ni ahnsou me e kin wiawi ni keieun sounpwong, pwehki samworo kan me mwakelekel ong kaudok me malaulau oh pil aramas malaulau me pokonpene nan Serusalem. Nanmwarki Esekaia, oh sapwellime lapalap akan, oh mehn Serusalem eri pwungkihda re en wia sarawio ni keriaun sounpwong. Nanmwarkio eri ketin kadarpeseng pakair wasa koaros nan Israel oh Suda. E ahpw pil ketin kadarala kisinlikou ong kadaudok en Epraim oh Manase ni keneinei, oh luke irail en iang patohdo ni Tehnpas Sarawio nan Serusalem pwe re en iang sarawien Pahsohpa oh iang wauneki KAUN-O, Koht en Israel.Nempe 9.9-11. 4 Nanmwarkio oh aramas akan inenen perenkihda ar koasoandi. 5 Irail eri luke mehn Israel koaros sang Dan ni paliepeng lel Peersepa ni palieir, pwe re en patohdo Serusalem oh iang sarawien Pahsohpa nin duwen Kosonnedo, pwe tohn sarawio en tohtohla sang mahs. 6 Nanmwarkio oh sapwellime lapalap akan eri koasoanehdi pwe meninkeder kei en pekederpeseng wasa koaros nan Suda oh Israel oh pakairkihong aramas akan luhk wet:

“Kumwail mehn Israel kan, kumwail pitsangehr mehn Asiria ar kin mahweniong sapwamwail. Eri, kumwail wiliakapwala oh sapahldohng rehn KAUN-O, Koht en Eipraam, Aisek, oh Seikop, e ahpw pahn ketin sapahldohng rehmwail. 7 Kumwail dehr duwehte amwail pahpa kahlap ako oh iangamwail mehn Israel kan me soaloalopwoatohng KAUN-O, arail Koht. Duwen eh sansal ong kumwail, e ketin kaloke irail mwuledek. 8 Kumwail dehr keptakai duwehte irail, ahpw kumwail peikiong KAUN-O. Kumwail patohdo nan Tehnpas Sarawio nan Serusalem, wasa me KAUN-O, amwail Koht ketin kasarawialahr kohkohlahte, oh kaudokiong pwe en dehr pwurehng engieng pahmwail. 9 Ma kumwail pahn sapahldohng KAUN-O, eri, irail kan me salihedier oh wahsangehr amwail peneinei kan pahn poakeirailla oh kapwureiraildo. KAUN-O, amwail Koht me kupwur kadek oh kalahngan, oh ma kumwail pahn pwurodohng pahn kupwure, e pahn kupwur perenkinkumwailla.”

10 Meninkeder ko eri patoseli nan kahnimw koaros nan sapwen kadaudok kan en Epraim oh Manase, oh lellahng ni paliepeng rehn kadaudok en Sepulon, ahpw aramas ako kouruhrkin irail oh kepitkin irail. 11 Ahpw mie ekei sang kadaudok en Aser, Manase, oh Sepulon me inengieng patohdohng Serusalem. 12 Koht pil kupwukupwurehte sapwellime doadoahk nan Suda oh ketin kaminiminihpene aramas akan pwe re en ngoangki peikiong kupwure ni ar kin idawehn kosonned akan en nanmwarki oh sapwellime lapalap akan.

13 Lapalahn pokon ehu ahpw pokonpene nan Serusalem ni keriaun sounpwong, pwe re en wia Sarawien Pilawa Sohte Doal Ihs. 14 Re ale pei sarawi koaros me doadoahkehr nan Serusalem mehn wia meirong oh isik warpwohmwahu oh kesehla nan Wahun Kidron. 15 Oh ni kaeisek pahieun sounpwong re kemehla sihmpwul kei ong ni meirong en Pahsohpa. Samworo oh mehn Lipai kan me saikinte mwakelekel ong kaudok, re inenen namenekda, re ahpw kasarawihala pein irail ong KAUN-O, irail eri kakehr wia meirong isihs nan Tehnpas Sarawio. 16 Re ahpw kin wia meirong kan nan Tehnpas Sarawio nin duwen kaweid kan nan Kosonned en Moses, ohl en Kohto. Mehn Lipai kan eri patohwanohng ntahn mehn meirong ko rehn samworo ko, re ahpw wudekiong pohn pei sarawio. 17 Pwehki aramas tohto me saikinte mwakelekel ong kaudok, re sohte kak kemehla sihmpwul kan en Pahsohpao, mehn Lipai ko eri wilianiraildi oh kasarawihala sihmpwul ko ong KAUN-O. 18 Pil me tohto me patohsang nan kadaudok en Epraim, Manase, Isakar, oh Sepulon sohte wia sarawien kamwakel ong kaudok, eri, re iang kawauwih Pahsohpao ni tiahk sohte pwung. Nanmwarki Esekaia eri wilianiraildi oh wia kasakas wet: 19 “Maing KAUN, Koht en atail pahpa kahlap ako, pwehki sapwellimomwi kupwurkalahngan komwi ketin mahkohng irail kan me kaudokiong komwi ni mohngiong unsek, mehndahte arail sohte mwakelekel ong kaudok.” 20 KAUN-O eri ketin karonge en Esekaia kasakaso; e kupwur mahkohng irail oh sohte kauweirailla. 21 Erein rahn isuh aramas ako me pokonpene nan Serusalem wiewia Sarawien Pilawa Sohte Doal Ihs ni peren lapalap, oh rahn koaros mehn Lipai ko oh samworo ko kin kapikapinga KAUN-O uwen ar kak. 22 Esekaia kapingahki mehn Lipai ko duwen arail koahiek en kaunda kaudoko me ong KAUN-O.

Mwurin rahn isuh me re kin wiewiahki meirong oh kapikapinga KAUN-O, Koht en arail pahpa kahlap ako, 23 re koasoanehdi re en pil usehla wiepen sarawio erein rahn isuh. Irail eri wiahda ni peren laud. 24 Nanmwarki Esekaia ketikihda kouwol 1,000 oh sihpw 7,000 pwe aramas akan en kemehla oh tungoale, oh lapalap akan pil kihda kouwol 1,000 oh sihpw 10,000. Samworo tohto me iang wia tiahk en kamwakeleirailda ong kaudok. 25 Eri, aramas koaros wie pereperen—mehn Suda, samworo ko, mehn Lipai ko, aramas ako me patohsang ni paliepeng, oh mehn liki kan me kousoanla nan Suda oh Israel. 26 Kahnimw en Serusalem direkihla peren, pwehki sohte mwekid me duwehte met me wiawi sang ni mwehin Nanmwarki Solomon, sapwellimen Depit pwutako. 27 Samworo ko oh mehn Lipai ko eri peki rehn KAUN-O sapwellime kupwuramwahu ong aramas akan. Koht ket nan mwoale nanleng oh ketin karonge arail kapakap akan oh kupwurperenkinirailla.