1 Ni pahr 149,kPAHR 149: Sounpar wet pahrekiong pahr 163 mwohn Krais. pakair ehu ahpw lelohng Sudas Makapius oh ienge ko me Antaiokus Eupator ketiket kodohng mahweniong Sudia, iangahki lapalahn karis ehu,

2 oh me Lisias sounapwalih nanmwarki pwulopwulo oh wiliepe nan wehio, pil iang ih. Re ketiki kohdo sounpei alu 110,000 oh sounpein dak oahs 5,300 sang Krihs, iangahki elepant 22, oh werennansapw en mahwen 300 me mete keng uhieisang ni daia kan.

3 Menelaus isanekihla ahnsou mwahu wet oh iangirailla, e ahpw koangngoangeirailda, kaidehn pwehki eh kesempwalki wehi, ahpw pwehki eh men ale kamanamanpen wiahla Samworo Lapalap. 4 Ahpw Koht, Nanmwarkien nanmwarki kan, kupwurehda pwe Antaiokus en engiengda pahn Menelaus. Lisias kadehdehiong Antaiokus me iei ohl suwed menet me kahredahr kahpwal nan wehio, Antaiokus eri ruwese ohl menet en wisiklahng nan kahnimw en Perea oh kamakamala wasao nin duwen tiahk en kamalahn aramas en wasao. 5 Nan kahnimwo mie wasahn iroir ehu piht 75 ile. Nan wasahn iroiro diren pehs, oh pasapas ehu mi powe oh dihd en mas loale dikoudilahng nan pehso. 6 Aramas emen me kin wiahda dihp laud ehu ong koht akan de ehu soangen dihp laud, kin wisikdahla poweo oh pisikendilahng nan pehs ko. 7 Ih duwen met Menelaus eh kamakamala, oh sohte emen me sarepedi, 8 oh iei met soangen kamakamala me e konehng ale. Pak tohto e kasaminehla pehs sarawi kan pohn pei sarawio nan Tehnpas Sarawio, oh met e mehla nan pehs.

9 Nanmwarki Antaiokus eri usehla mahmahweniong Sudia ni tiahk lemei, kupwukupwure en wiahiong mehn Suhs kan mehkot me suwed sang me semeo wiahiong irail. 10 Ni Sudas eh rongada met, e ahpw ndaiong aramas akan re en kapakapohng Kaun-o nipwong nin rahn, pwehki ar milahr nan keper laud en pwupwusang nan arail Kosonnedo, ar wehi, oh ar Tehnpas Sarawio. Re uhdahn anahne sapwellime sawas met sang mahs, 11 pwe ar wehi me ahpwtehn onohnsapahlda en dehr lohdiong pahn mehn liki suwed kan. 12 Erein rahn siluh aramas ako sohte wia mehkot, ihte re wonohn wekidekdi nan pwehl, kaikaisihsol oh wie sengiseng, pekipeki rehn Kaun-o me kupwurkalahngan en ketin sewese irail. Sudas eri kapahrekiong aramas akan oh kakehlaka nan kapehdirail kan, koangngoangehkin irail re en onopada ong mahwen.

13 Mwurin met, Sudas ahpw tuhwong kaun akan en mehn Suhs ko ni rir oh koasoanehdi re en mwekilahng mahweniong nanmwarkio sang ni sapwellimen Koht sawas, a re en dehr awiawih pwe nanmwarkio en mwekid mahs oh mahweniong Sudia oh kapilpene Serusalem. 14 Eri, ni Sudas eh mweidohngehr mwekid en mahwen wet ong Sounkapikada sampah, e ahpw kakehlakahki nah sounpei ko re en kommwad mahwen oh re en mehkihla ar kosonned kan, Tehnpas Sarawio, Serusalem, ar wehi, oh ar tiahk kan. Re kauwada ar impwal kan limwahn kahnimw en Modein. 15 Sudas ahpw werkihda ruwes en mahwen, “Koht me kin ketikihdo powehdi,” oh pwohngo e pilada mwahnakapw kommwad kei oh mahweniong wasa kis limwahn en nanmwarki impwalo, oh e kemehla kereniong sounpei 2,000. Re pil doakoahdi elepant me kin tiengo oh me kin apwaliho. 16 Aramas koaros nan kahnimpwalo ahpw masepwehkada oh rerrer ni Sudas oh ienge ko ar poweiraildier oh mweselsang wasao 17 mwohn eh pahn rahnpeseng. Sapwellimen Koht sawas me kahredahr mepwukat eh kak pweida.

18 Pwehki Nanmwarki Antaiokus eh mwahngihier duwen kommwad en mehn Suhs ko, e ahpw kupwurehda ehu ahl tohrohr en kaloweiraildi. 19 E mahweniong en mehn Suhs kan ar kelen mahwen kehlailo me mi Pedsur, ahpw e pwurehng lohdiong pahn mehn Suhs ko. 20 Sudas kadarala mehn ketihnain ong sounpei ko me doandoare kehlo, 21 ahpw sounpein Suhs men ede Rodokus kadilohng imwintihti ko duwen koasoandi rir kei en mehn Suhs kan. Ih eri dierekda, poarpoardi oh kamakamala. 22 Nanmwarkio ahpw pil song keriapak en wia inou en minimin ong mehn Pedsur, oh ni inowo eh pwunglahr, e ahpw mweselsang wasao iangahki sapwellime sounpei ko. E ahpw ketila mahweniong Sudas, ahpw e pil pwurehng lohdi. 23 Ni ahnsowo, Nanmwarki Antaiokus karongehda me Pilip me pwukoahki apwalih wehi nan Andiok moromoradahr oh keselahr nanmwarkio. Nanmwarkio ahpw sehsehla dahme e pahn wia, ih eri tapihada wiekupwuriong mehn Suhs ako oh inoukihong irail me e pahn pwungki ar koasoandi kan oh tiahk kan, e pil wiahda meirong ehu oh ketikihong kisakis laud ehu ong Tehnpas Sarawio pwehn kasalehda eh wauneki Tehnpaso, 24 e ahpw kasamwo Sudas Makapius ni wahu mehlel. Mwurin met, nanmwarkio ahpw idihada Ekemonidihs pwehn wia kepina en sahpw me mi nanpwungen Tolemais oh Kerar, 25 ih eri ketiketlahng Tolemais. Aramas ako wasao inenen lingeringerki eh wiahda inou en minimin ong mehn Suhs kan; re inenen lingeringer oh men kasohrehla inowo. 26 Lisias ahpw wia kapahrek ehu mwohn aramas akan oh kawehwehda kahrepen inowo. Ni eh kameleileidier aramas ako oh kadehdehiong irail me ih me pwung, e ahpw pwuralahng Andiok.

Met iei duwen Nanmwarki Antaiokus eh lohdi nan eh mahwen kan.