3
Aman wiahda Koasoandien Kamwomwala mehn Suhs
1 Mwurin ahnsou ehu Nanmwarki Serksihs ahpw kawauwihala ohl emen ede Aman, nein Ammedada, mehn Akak, ni eh ketin kasapwiladahng nan dehu en sounpapah keieu lapalap. 2 Nanmwarkio ketin koasoanehdi pwe sapwellime opiser koaros en kasalehiong Aman ar wauneki ni ar pahn kin poaridi mwowe. Irail koaros eri kapwaiada koasoandi wet, ihte Mordekai me sohte kin poaridi mwowe. 3 Opiser teiko ahpw idek rehn Mordekai dahme e sapeikiong kosonned en nanmwarkio. 4 Rahn koaros re kin koangngoangehki en kin poaridi mwowe, ahpw e sohte dukiong irail, e ahpw ndaiong irail, “Ngehi mehn Suhs men, oh I sohte kak poaridi mwohn Aman.” Irail eri padahkihong Aman duwen Mordekai eh kahngohdiong kosonned en nanmwarkio. 5 Aman ahpw lingeringerda kowahlap ni eh esehda me Mordekai sohte pahn poaridi mwowe, 6 e ahpw wiahda koasoandi en kemehla mehn Suhs koaros nan wehin Persia pwon.
7 Ni sounpar kaeisek riau en mwehin Serksihs, Aman ahpw wiahda usuhs ehu pwe en rapahkihda rahn de sounpwong mwahu me kamwomwmwomwlahn mehn Suhs kan kak wiawi, koaros pahn kamakamala rahnteieu. Ni kaeisek pahieu en rahnen sounpwong Adar me pilipilda.
8 Aman eri padahkihong nanmwarkio, “Mie soangen aramas ehu me mwarahkselier nan wehi koaros me komwi kaunda. Re kin wia tiahk kei me weksang en aramas teikan. Pil ehu, re sohte kin peikiong kosonned en wehi, eri, e sohte mwahuong komwi en kolokol irail. 9 Ma komw kupwurki, a komw ketin padokada kosonned ehu pwe re en kamwomwmwomwla. Ma komw ketin wia met, I inoukihda me I pahn kihong nan wasahn nek mwohni en nanmwarki ten en silper 375.”
10 Nanmwarkio eri ketikihsang sapwellime rihng, me kin wia mehn sidampih kalohk me nanmwarki kin pein wiahda, oh ketikihong rihngo Aman pwehn sidampiheki kosonned me pahn ntingdi me uhwong mehn Suhs akan. 11 Nanmwarkio ahpw mahsanihong, “Kolokolete noumw mwohni kan, ahpw ke pahn wiahiong soangen aramas pwuko dahme ke mwahuki.”
12 Eri, ni kaeisek siluh en keieun sounpwong, Aman likwerihodo sounnting kan oh padahkihong irail en ntingihedi kalohk ehu me pahn wiawihda ni mahsen en wehi koaros oh pekederlahng rehn lapalap koaros oh kepina koaros. E wiawihda ni mwaren Nanmwarki Serksihs oh pekederlahng wehi 127 me e kaunda, me sang India lel Sudan. 13 Meninkeder kan eri wahla kalohk wet ong wehi koaros me nanmwarki kaunda. E nting loale me rahnteieu, nan sounpwong kaesiek riau, sounpwong Adar, mehn Suhs koaros pahn kamakamala oh ar dipwisou kan pahn duwehla dipwisou me lohdi nan mahwen. bPeuspen Ire Laud 3 mi mwurin Ire Laud B.
En Serksihs Kalohk me Uhwong mehn Suhs kan cIre Laud B 1-7 duwehte Ire Laud 13.1-7 ni ekei pwuhk me kahwehwehdi ni mahsen en wai.
14 [1] Iet audepen pelien kisinlikou en kalohko:
“Nanmwarki Lapalap Serksihs ketin kadarpeseng kosonned wet ong kepina kan en sapwellime wehi 127, sang India lel Sudan, oh ong wiliaparail kan:
15 [2] “Mwurin ei wialahr kaunen wehi tohto oh lapalap en sampah pwon, I koasoanedier pwe nei aramas akan en kin momour ni popohl. I men wia met, kaidehn sang ni roson lap en ei manaman pwe ahnsou koaros I kin kakaun nei aramas akan ni kupwurkalahngan. I kupwuredahr I en onehda sapahl popohl oh meleilei me kitail koaros kin ngoangki oh wia dahme konehng en wiawi pwe kitail en sapwellimaniki wehi marain ehu, kitail en kin silasil mwahu nan atail seiloak kan sang ni ehu irepen wehi lel apali.
16 [3] “I pekier rehn nei sounkaweid kan duwen ei pahn kapwaiada met, oh Aman wiadahr kasalada ehu, ih ohl audaudki kupwurokong, oh e pil kasaledahr duwen eh ngoangki kamwahupen wehi. Pwehki loalopwoat mehlel, e kesepwildahngehr en keriau en kaunen wehi. 17 [4] Ahnsou kis samwalahr Aman kasalehiong kiht duwen soangen aramas ekei me wiewia suwed me mwarahkpesengier nanpwungen aramas teikan en wehiet. E kawehwehiong kiht me aramas pwukat mie pein ar kosonned, me uhwong wehi teikan, oh re kin pohnsehse kosonned kan en nanmwarki. Eri, pwehki met, kitail sohte kak kauwada koperment ehu me kin miniminpene oh ehupene nan wehiet, duwen me kitail kupwukupwure en pweida.
18 [5] “Aramas pwukat kin uhwong atail koperment oh kin wiahda sapwung kei me keieu suwed me kak kahrehiong atail wehi keper laud en pingiping. Re kin wia soangen tiahk kei me weksang atail kan, re kin peikiong pein arail kosonned akan, oh irail kelehpw me kin pelian wehi koaros ahnsou koaros. 19 [6] Eri pwehki ire sansal pwukat, se kaweidki pwe aramas pwukat me Aman, keriaun kaunen wehi, kasaledahr duwen irail, re en kamakamala. Irail koaros iangahki lih oh seri kan, uhdahn pahn kamakamala; sohte emen pahn pitla. Irail wia atail imwintihti; kitail sohte pahn mahkohng irail. Koasoandi wet pahn wiawi nan sounpar wet, ni kaeisek pahieu en sounpwong kaeisek riau, iei sounpwong Adar. 20 [7] Aramas pwukat, me kahkahrehiong kitail apwal ahnsou reirei, re pahn kamakamala rahnteieu. Sang mwurin met kohla, sapwellimatail koperment pahn onepek mwahu oh meleilei.”
21 [14] Audepen kisinlikou kiset ahpw kalohkda mwohn aramas akan nan wehi koaros oh aramas koaros ahpw onopadahng rahno.
22 [15] Kosonnedo pil kalohkda mwadang nan kahnimw en Susa. Oh nindokon Nanmwarki oh Aman ara kamakamadipw oh sakaulahr, kahnimw en Susa ahpw pingidahr.