4
Uhpenehn Kokouda Sapahl en Tehnpas Sarawio
1 Imwintihti kan en mehn Suda oh Pensamin ahpw rongada me irail ko me sapahldohsangehr ar kalipilipala pwurehng kokou Tehnpas en KAUN-O, Koht en Israel. 2 Irail eri kohla tuhwong Serupapel oh kaunen peneinei kan oh patohwan, “Kumwail mweidohng kiht se en iang kauwada Tehnpas Sarawio. Se kin kaudokiong Kohtohte me kumwail kin kaudokiong, oh se kin wiewia meirong kan ong ih sangete ni ahnsou me Esaradon, nanmwarki lapalap en Asiria, ketin kadarkitodohng wasaht pwe se en kousoan ie.”2 Nan. 17.24-41.
3 Serupapel, Sesua, oh kaunen peneinei ko ahpw mahsanihong irail, “Se sohte anahne amwail sawas ong ni kokoupen tehnpesen KAUN-O, at Koht. Pein kiht pahn kauwada, nin duwen me Sairus, Nanmwarki Lapalap en Persia ketin koasoanediong kiht.”
4 Aramas ako me koukousoan nan sahpwo eri song re en kamasak oh katikitikihala nan kapehd en mehn Suhs ko pwe re en dehr wia doadoahko. 5 Re pil pwain ni rir lapalap akan en koperment en Persia pwe re en uhwong arail doadoahko. Re wiewia met erein mwehin Nanmwarki Lapalap Sairus oh lellahng nan mwehin Nanmwarki Lapalap Darius.eNANMWARKI LAPALAP DARIUS: Koasoiepen mwekid wet peusla ni ire tikitik 24. Sang ni ire tikitik 6-23 wia ehu koasoi me pweidahr kerenieng pahr 100 mwuri.
Uhpenehn Kokouda Sapahl en Serusalem
6 Ni tepin mwehin Nanmwarki Lapalap Serksihs, imwintihti en aramas ako me koukousoan nan Suda oh Serusalem ahpw wiahda kisinlikou en uhwong irail.Est. 1.1.
7 Pil ni mwehin Ardaserksihs, nanmwarki lapalap en Persia, Pislam, Midredad, Tapeel, oh iangarail ko wiahda ehu kisinlikou ong nanmwarki lapalapo. Kisinlikowo ntingda ni mahsen en Aramaik fARAMAIK: Sang ni ire laud 4.8 lel 6.16; pwuhk wet sohte ntingdi ni mahsen en Ipru, ahpw ni mahsen en Aramaik, me iei mahsen me lapalap akan kin doadoahngki nan wehin Persia. oh kawehwehpe ahpw pahn wiawi ni ahnsou me kisinlikowo pahn wadawad.
8 Rehum, kepinao, oh Simsai, sounnting en sahpwo, pil ntingihada kisinlikou kiset ong Nanmwarki Lapalap Ardaserksihs duwen Serusalem:
9 “Sang rehn kepina Rehum, Simsai, sounnting en sahpwet, iangarail kan, sounkopwung kan, oh sang lapalap teikan koaros, me wia ohl pwilidak en Erek, Papilon, oh Susa nan wehin Elam, 10 iangahki aramas teikan me kemwekidsang arail wasa kan sang ni manamanlap en Asurpanipal oh kousoanla nan kahnimw en Sameria oh wasa teikan en Pwallap en Palikapi-en-Iupreitis.”gPWALLAP EN PALIKAPI-EN-IUPREITIS: Met iei pwallap en wehin Persia. Wehin Suda wia kisehn pwallap wet me mi palikapien Pillap Iupreitis.
11 Iet audepen kisinlikowo:
“Ong Nanmwarki Lapalap Ardaserksihs, sang sapwellime ladu kan, ohl akan en Palikapi-en-Iupreitis.
12 “Se men Wasa Lapalap en mwahngih duwen mehn Suhs kan me patohdohr wasaht sang nan limomwi teikan patohwan kousoanlahr nan Serusalem oh kokou sapahlih kahnimw suwed oh kahngohdio. Re tapihadahr kokou sapahl kehl kan oh e kereniengehr nekila. 13 Maing, Wasa Lapalap, ma kahnimw wet pahn onohnda sapahl oh kehl kan wiawihda, aramas ako sohla pahn pwain daksis, oh sapwellimomwi wasahn nahk mwohni pahn tikitikla. 14 Eri, pwehki at patopato pahn inoun papah Wasa Lapalap, se sohte men patohwan kilang soahng wet eh pahn pweida, kahrehda se peki 15 komwi en koasoanehdi ehu roporop en wiawi nan pwuken poadopoad me omwi pahpa kahlap ako nekidalahr. Ma komwi pahn wia met, komwi pahn diarada me kahnimw wet kin kahngohdi ahnsou koaros oh sang kawa kohdo e kin kahrehiong kahpwal ong nanmwarki kan oh kaun akan en sahpw teikan. Apwal aramas en kaunda tohn wasao. Ihme kahrehda kahnimwo mwomwla. 16 Eri, se wehwehki me ma kahnimw wet pahn kokouda sapahl oh kehl kan wiawihda, Wasa Lapalap pahn sohla kak ketin kolokol manaman ong Palikapi-en-Iupreitis.”
17 Nanmwarki Lapalapo eri kadarala pasapeng wet:
“Ei rahnmwahu ong Kepina Rehum, Simsai, sounnting en sahpwo, oh iangarail kan me kin koukousoan nan Sameria oh wasa teikan en Palikapi-en-Iupreitis.
18 “Kisinlikou me kumwail kadarodo kawehwehdier oh wadawadohng ie. 19 I wiadahr ehu koasoandien roporop en wiawi, oh mehlel e dierekdahr me sang kawao kohdo Serusalem moromorada oh uhwong koasoandien nanmwarki oh me diren kahngohdi oh sounwie moromor. 20 Nanmwarki kehlail kan kaundahr wasao oh kakaun sahpw koaros en Palikapi-en-Iupreitis, rikirikpene daksis oh mwohni en koperment. 21 Ihme kahrehda kumwail pahn wiahda koasoandi kei me ohl akan en tokedihsang arail onesapahl kahnimwo lao I pahn kihda ehu koasoandi mwurin met. 22 Kumwail wia met ni ahnsou mwadang, pwe ehu soangen mwekid de pil wiawi oh kauwehla ei koasoandi.”
23 Ni ahnsowohte me kisinlikou kiset sang Nanmwarki Lapalap Ardaserksihs wadawadohng Rehum, Simsai, oh iangara kan, re ahpw mwadangalahng Serusalem oh iding mehn Suhs kan en tokedihsang arail onesapahlih kahnimwo.
Doadoahk en Tehnpaso Pwurehng Tepida
24 Kokoupen Tehnpas Sarawio katoktokdi oh wiewiaier soahngo lao lel ni keriaun sounpar en mwehin Darius,hDARIUS: Iei Darius Keieu me ketin wia nanmwarki lapalap en Persia sang pahr 522 lel 486 mwohn Krais. Ak. 1.1; Sek. 1.1.
e4:5: NANMWARKI LAPALAP DARIUS: Koasoiepen mwekid wet peusla ni ire tikitik 24. Sang ni ire tikitik 6-23 wia ehu koasoi me pweidahr kerenieng pahr 100 mwuri.
f4:7: ARAMAIK: Sang ni ire laud 4.8 lel 6.16; pwuhk wet sohte ntingdi ni mahsen en Ipru, ahpw ni mahsen en Aramaik, me iei mahsen me lapalap akan kin doadoahngki nan wehin Persia.
g4:10: PWALLAP EN PALIKAPI-EN-IUPREITIS: Met iei pwallap en wehin Persia. Wehin Suda wia kisehn pwallap wet me mi palikapien Pillap Iupreitis.
h4:24: DARIUS: Iei Darius Keieu me ketin wia nanmwarki lapalap en Persia sang pahr 522 lel 486 mwohn Krais.