Pwuhken OSEIA
Oaralap en Pwuhk wet
Soukohp Oseia wia eh kapahrek kan ni wehin paliepeng en Israel, mwurin soukohp Eimwos, oh erein ahnsou apwal mwohn ohlahn Sameria ni pahr 721 mwohn Krais. E kin pwunodki kowahlap en aramas akan ar kin pwongih dikediek en eni kan oh ar soaloalopwoatohng Koht. Oseia karasahda mwahu en aramas akan ar soaloalopwoatohng Koht sang ni duwen eh pwoud eh soaloalopwoatohng oh kesehla ih. Nin duwen eh pwoud, Komer, eh soaloalopwoatohng, ih duwen sapwellimen Koht aramas akan ar kesehla Kaun-o. Pwehki met, kadeik pahn lelohng Israel. Ahpw ni imwilah, sapwellimen Koht limpoak ong sapwellime kan pahn pweidahte, oh e pahn ketin kasapahldo wehio reh, oh ketin onehda sapahl nanpwungara. Eri, mahsen en limpoak wet kamwakidada nan kapehd en aramas: “Israel, ia duwen ei pahn kak keseiukala? Ia duwen ei pahn kak likidmelieiukala? Mohngiongi sohte kak wia met! Ei limpoakohng uhk me nohn laud” (11.8).
Audepe ni Oaralap
Duwen en Oseia eh pwopwoud oh eh peneinei 1.1—3.5
Mahsen me uhwong Israel 4.1—13.16
Mahsen en wiliakapwala oh inou 14.1-9
1
1 Iet mahsen me KAUN-O ketikihong Oseia, nein Peeri, ni ahnsou me Usaia, Sodam, Ahas, oh Esekaia wia nanmwarkien Suda, oh Seropoham, nein Sehoas wia nanmwarkien Israel.2 Nan. 15.1-7;2 Kron. 26.1-23; b 2 Nan. 15.32-38; 2 Kron. 27.1-8; c 2 Nan. 16.1-20; 2 Kron. 28.1-27; d 2 Nan. 18.1—20.21; 2 Kron. 29.1—32.33; e 2 Nan. 14.23-29.
En Oseia eh Werek oh nah Seri kan
2 Ni ahnsou me KAUN-O tepin mahseniong Oseia, pwehn patohwanohng mehn Israel kan, e mahsanihong Oseia, “Kohwei oh pwoudikihda emen lihen. Omw pwoud sohte pahn loalopwoatohng uhk, oh noumw seri kan pahn suwed duwehte liho. Duwehte nei aramas akan ar keseielahr oh solahr loalopwoatohng ie.”
3 Oseia eri pwoudikihda Komer, nein Diplaim. Liho eri liseianda oh naitikihada pwutak emen. 4 KAUN-O eri mahsanihong Oseia, “Kihong ede ‘Sesreel,’ pwehki eh sohte pahn werei mwohn ei pahn kaloke nanmwarkien Israel pwehki dipen kamaramas akan me seme kahlap Sehu wiadahr nan Sesreel.aSESREEL: Iei wasa me Sehu kemehla ie nanmwarkien Israel oh sapwellime peneinei koaros, pwe pein ih oh nah seri kan en wiahla nanmwarkien Israel (tehk 2 Nan. 9-10). I pahn katokihedi mwehin nanmwarkien kadaudok en Sehu kan pohn Israel. 2 Nan. 10.11. 5 Oh ni ahnsowo, I pahn kauwehla kehlail en sounpei en Israel nan Wahun Sesreel.”
6 Komer ahpw pwurehng liseianda oh naitikihada serepein men. KAUN-O eri mahsanihong Oseia, “Kihong eden serepein en ‘Sempoak,’ pwe I solahr pahn poakohng de mahkohng aramas en Israel. 7 Ahpw I pahn kasalehiong ei limpoak mehn Suda kan. Ngehi, KAUN-O, ar Koht, pahn doareirailla, ahpw kaidehn sang ni mahwen, de kedlahs, de kesik ketieu, de oahs akan oh soundakepe kan.”
8 Mwurin nah serepeino eh mweisangehr dihdi, Komer ahpw pwurehng liseianda oh naitikihada pil emen pwutak. 9 KAUN-O ahpw mahsanihong Oseia, “Kihong ede ‘Kaidehk-Nei-Aramas,’ pwehki mehn Israel kan kaidehk nei aramas oh kaidehk ar Koht ngehi.”
Israel pahn Onohnda Sapahl
10 Mehn Israel kan pahn rasehng pihken ni oaroahr, ngedersang uwen me kak wadawad de sosohng. Eri met, Koht mahsanihong irail, “Kaidehk kumwail nei aramas,” ahpw ahnsou ehu kohkohdo me e pahn mahsanihong irail, “Kumwail serien Koht ieias!”Rom 9.26. 11 Mehn Suda oh Israel ahpw pahn pwurehng wiahla ehu. Irail pahn pilada kaun tehmen ong pein irail, oh re pahn pwurehng keirda oh paiamwahula nan sapwarailo. Ei, rahnen SesreelbSESREEL: Ahd wet ni mahsen en Ipru wehwehki “Koht ketin kamwarak” oh e kahrehiong irail mahso en lemeleme duwen ar pahn kekeirda oh kepwehpwehla. pahn wia rahn lapalap ehu!
1:1: 2 Nan. 15.1-7;2 Kron. 26.1-23; b 2 Nan. 15.32-38; 2 Kron. 27.1-8; c 2 Nan. 16.1-20; 2 Kron. 28.1-27; d 2 Nan. 18.1—20.21; 2 Kron. 29.1—32.33; e 2 Nan. 14.23-29.
a1:4: SESREEL: Iei wasa me Sehu kemehla ie nanmwarkien Israel oh sapwellime peneinei koaros, pwe pein ih oh nah seri kan en wiahla nanmwarkien Israel (tehk 2 Nan. 9-10).
b1:11: SESREEL: Ahd wet ni mahsen en Ipru wehwehki “Koht ketin kamwarak” oh e kahrehiong irail mahso en lemeleme duwen ar pahn kekeirda oh kepwehpwehla.