40
Mahsen en Koapworopwor
1 Atail Koht ketin mahsanih, “Kumwail koaloalamwahwihala nei aramas akan, kumwail koaloalamwahwihirailla!
2 Kumwail koangoangehda tohn Serusalem kan.
Ndaiong irail me ar lokolok kan imwiseklahr,
oh re aleier met lapwen diparail kan.
Re aleier sang rehi kalokolok unsek en diparail kan koaros.”
3 Ngihl ehu kin likilikwer,
“Kumwail kaunopadahng KAUN-O sapwellime ahl nan sapwtehn!
Kumwail kainenehla wasa kan nan sapwtehn me atail Koht pahn ketin keid ie!Sir. 48.10; Par. 5.7; Mad. 3.3; Mark 1.3; Sohn 1.23.Luk 3.4-6.
4 Audehda wahu koaros,
kapatapatahla nahna koaros.
Dohl kan pahn wiahla sahpw patapat,
wasa sapahrek koaros pahn pahrekla.
5 Lingan en KAUN-O ahpw pahn sansalda,
aramas koaros pahn udiahl sapwellime lingan.
Pein KAUN-O me ketin inoukidahr met.”
6 Ngihl laud ehu me likilikwer, “Kumwail kalohkiseli!”
I ahpw patohwan kalelapak, “Dahme I pahn kalohki?”
A ngihlo mahsanih, “Lohkiseli duwen aramas koaros ar rasehngalahr dipwen nansapw akan;
ar lingan sohte kin wereisang lingan en rohsen nanwel kan.Seims 1.10-11; 1 Pit. 1.24-25.
7 Dihpw kan kin mengila oh rohs akan kin pwupwudi
ni engin silangin KAUN-O eh kin lel irail.
Iei duwen aramas akan, ar sohte kehlailasang dipwen nansapw akan.
8 Ei, dihpw kin mengila oh rohs kin pwupwudi,
ahpw mahsen en atail Koht kin mour poatopoat.”
9 Kohdawei, kowe Serusalem, pohn nahna ile;
ke ahpw lohkiseli rohng kaperen wet!
Kowe, Saion, ngihl laud likilikwerkiseli
oh lohlohkiseli rohng kaperen wet!
Ke dehr masak, a lohkihwei.
Ndaiong kahnimw kan en Suda
me ar Koht ketiket kohdo!
10 KAUN-O, Wasa Lapalahpie, pahn ketidohn kaunda ni roson lapalahpie,
e pahn ketikihdo sapwellime kan me e ketin kapitalahr.Ais. 62.11; Kaud. 22.12.
11 E pahn ketin apwalih sapwellime pelin sihpw duwehte silepen sihpw men;
e pahn ketikipene sihmpwul kan,
e pahn ketin apwalihekin irail nin lime;
oh e pahn ketin kahre inarail kan ni keneinei.Esek. 34.15; Sohn 10.11.
Koht en Israel me Sohte Pelie
12 Ia duwe, mie aramas emen me kak limakasang pilen madau,
de sohngki pahnlahng tipwengenpeh?
Mie me kak oarepenehng pwelen sampah nan kep ehu,
de teneki dohl oh nahna kan pohn mehn tenek kan?
13 Mie aramas emen me kak patohwanohng KAUN-O dahme e pahn ketin wia?
Ihs me kak patohwanohng padahk ehu de panawih?Rom 11.34; 1 Kor. 2.16.
14 Ihs me Koht kin ketin ale kaweid reh
pwe en kin mwahngih oh dehdehkihla soahng kan,
oh ketin padahngki duwen eh pahn ketin wiahda soahng kan?
15 Wehi kan wia mehkot mwahl mwohn silangin KAUN-O,
rasehngete kisin dingiding en pihl kis;
deke doh kan rasehng kisin weren pwelpar kei.
16 Mahn en nanwel koaros en Lepanon sohte itarohng
en wiahla mehn meirong ong atail Koht,
oh tuhke koaros en wasao me nohn malaulau en wia tuwien meirongo.
17 Wehi kan mwohn silangi rasehng sohte.
18 Eri, ihs me kumwail kak karasahiong atail Koht?
Ia duwen amwail pahn koasoiahda mwomwe?Wie. 17.29.
19 E sohte duwehte mwomwen koht likamw ehu me tohndoadoahk kan kin wiahda,
oh sounsukmete kan kin kidimkipene kohl
oh kidahng pohn dehu silper.
20 Aramas me sohte nah silper de kohl
kin pilada soangen tuhke me sohte kak mwoasoahngotla.
E kin rapahki tohndoadoahk koahiek men
pwehn wiahkihda mwohmw ehu me sohte kak pwupwudi ohla.Kupw. 13.11-19; Kis. Ser. 8-40.
21 Kumwail sohte ese?
Koasoiepe seu wiawihiongkumwailehr mahso?
Kumwail sohte kin rong duwen sampah eh tepin wiawihda?
22 E wiawihda sang nin limen ih me kin ketiket nan mwoale
pohnangin sampah oh palio pahnlahng.
tohn sampah kan mwohn silangi rasehng kisin katitik en nanwel kan.
Ih me ketikipeseng pahnlahng rasehng kahdeng ehu,
rasehng impwal ehu pwe aramas akan en kousoan pah.
23 Ih me kin ketin kasapwilidi kaunen wehi manaman akan,
oh kin ketin kamwomwirailla.
24 Re kin rasehng kisin tuhke poadakapw akan
me kin ahpwtehn wosada oh kadarala kalowe.
Ni KAUN-O eh kin ketin kadar pohrail engin silangi,
re kin mengidi oh pihrpeseng, duwehte tehndipw meng.
25 Ihs me kak pahrekiong Koht me sarawi?
Mie emen tohrohr me duwehte ih?
26 Kumwail kilengdalahng pahnlahng!
Ihs me ketin wiahda usu kan me kumwail kilikilang?
Iei ih me kin ketin kawekaweid irail duwehte karis en sounpei ehu,
iei ih me ketin mwahngih uwen tohtohn irail,
oh kin ketin malipehkin irail koaros adarail.
Iei duwen lapalap en sapwellime manaman—
sohte ehu rehrail kak salongala!Par. 3.34-35.
27 Eri, Israel, dahme ke kaukaulimki,
me dene KAUN-O sohte ketin mwahngih omw apwal akan,
de sohte kupwurohki omw lokolongki pwuhng sapahrek?
28 Ke sehse? Ke sohte kin rong?
Me KAUN-O, iei Koht soutuk;
iei ih me ketin kapikada sampah pwon.
E sohte mwahn kin ngirala de luwetala.
Sohte emen kak dehdehki kupwure.
29 E kin ketin kakehlahda me luwet oh me pwangadahr kan.
30 Pil me pwulopwul kan kak luwetala,
oh mwahnakapw kan kak pwupwukihdi eh sohla angirail.
31 Ahpw irail kan me kin koapworopworki KAUN-O,
pahn onehda sapahl ar kehl.
Re pahn kin kehlail, rasehng ikel kan;
ni ar pahn kin tang, re sohte pahn pwangada;
ni ar pahn kin alu, re sohte pahn luwetala.
40:3: Sir. 48.10; Par. 5.7; Mad. 3.3; Mark 1.3; Sohn 1.23.
40:6: Seims 1.10-11; 1 Pit. 1.24-25.
40:10: Ais. 62.11; Kaud. 22.12.
40:11: Esek. 34.15; Sohn 10.11.
40:13: Rom 11.34; 1 Kor. 2.16.
40:20: Kupw. 13.11-19; Kis. Ser. 8-40.
40:26: Par. 3.34-35.