15
Kalokolok en mehn Suda
1 KAUN-O eri ketin mahsanihong ie, “Mehnda ma Moses oh Samuel pahn kesihnenda wasaht, ngidingidki ara pekipek rehi, ahpw I sohte kupwurkalahngan ong aramas pwukat. Ndaiong irail re en kohkohwei sang mwohi.Eks. 32.11-14; Nempe 14.13-19; b 1 Sam. 7.5-9. 2 Ma re pahn idek rehmw wasa me re pahn kohla ie, ndaiong irail me I mahsaniher me:
Ekei kileldier re en mehkihla soumwahu—
eri, ih wasa re pahn kohla ie!
Ekei kileldier re en mehkihla mahwen—
eri, ih wasa re pahn kohla ie!
Ekei kileldier re pahn mehkihla lehk lapalap—
eri, ih wasa re pahn kohla ie!
Ekei kileldier re en selidi oh kalipilipala—
eri, ih wasa re pahn kohla ie!Kaud. 13.10.
3 Ngehi, KAUN-O, koasoanedier me soangen kalokolok pahieu pahn wiawihong irail: re pahn kamakamala nan mahwen; kidi kan pahn dapengpeseng kahlaparail kan; menpihr kan pahn kangala luhwe kan. 4 I pahn koasoanehdi pwe tohn sampah koaros en suwedkinirailla, pwehki wiewiahn Manase, nein Esekaia, nan Serusalem, ni ahnsou me e wiewiahki nanmwarkien Suda.”2 Nan. 21.1-16; 2 Kron. 33.1-9.
5 KAUN-O ketin mahsanih,
“Ihs me pahn poakeikumwailla, kumwail mehn Serusalem,
oh ihs me pahn nsensuwedkinkumwailla?
Ihs me pahn uhdi pwehn
idek rehmwail ia iramwail?
6 Kumwail soikiehla;
kumwail sohpeisang ie.
I ahpw kapahwei limei oh kauweikumwailla,
pwehki ei pwangadahr irihre ei engieng.
7 Nan kahnimw koaros en sahpwet,
I sipedkumwailpeseng nan wehwe duwehte tehndipw meng;
I kamwomwkumwailla, nei aramas akan,
I kemehla noumwail seri kan,
pwehki amwail sohte katokehdi amwail wiewia suwed kan.
8 Liohdi kan nan sapwamwail tohtohsang
pihk en ni oaroahr kan.
I kemehla noumwail mwahnakapw akan ni ar wie pwulopwulte,
oh kupwurehda pwe ar nohno kan en lokolongki.
I mwadang kadardiong pohrail
pwunod en mehla oh masepwehk mwuledek.
9 Lih emen me nah seri isimen melahr, e lupwongmasalahr,
sohla kak esingek.
Marain en rahn reh rotorotalahr,
e nameneklahr oh eh mohngiong ohlahr.
I pahn koasoanehdi pwe amwail imwintihti kan en kemehla
kumwail kan me momourte.
Ngehi, KAUN-O, me mahmahsen.”
Seremaia Kaulimiong KAUN-O
10 Ia uwen ei nsensuwed! Dahme ineio kaipwihkiniehdi? I kin uhwong oh akamaiong aramas koaros nan sahpwet. I sohte kin kamangaiong aramas mwohni, I pil sohte kin pekihsang rehn emen; ahpw aramas koaros kin kerieiehla. 11 Maing KAUN, arail keria koaros en pweida rehi, ma I sohte kin papah komwi mwahu, ma I sohte kin kapakapki ni ngidingid ei imwintihti kan nan arail apwal oh paisuwed. 12 (Sohte emen kak kauwehla mete, ahpw mehlel mete me kin kohsang paliepeng me prons kin doaloahda.)
13 KAUN-O eri mahsanihong ie, “I pahn kadarowei imwintihti me pahn adihasang oh wahsang en nei aramas akan kepwe kesempwal akan, pwe en kalokehkin irail diparail kan me re wiadahr wasa koaros nan sahpwet. 14 I pahn wiahkinirailla lidun arail imwintihti kan nan sahpw ehu me re soh mwahn ese, pwe ei engieng rasehng kisiniei me kin kamwakamwasik kohkohlahte.”
15 I ahpw patohwan, “Maing KAUN, komwi me mwahngih. Komwi ketin tamataman ie oh ketin sewese ie. Komwi ketin mweidohng ie I en ikihong irail kan me kalokaloke ie. Komwi dehr nohn ketin kanengamahiong irail, pwe re de kemeiehla. Komw ketin tamanda me komwi me kahrehda ar mwamwahlikinielahr. 16 Komwi ketin mahsendohng ie, I ahpw pahn kanahieng rong sapwellimomwi mahsen kan koaros. Komw ketin sapwellimanikin ie, Maing KAUN, Koht Wasa Lapalahpie, iei me sapwellimomwi mahsen kan kadirehkilahr nan mohngiongi peren oh nsenamwahu. 17 I sohte iang aramas teikan kauwehla mwahl ei ahnsou, pereperenki peren mwahl akan oh kokouruhr mwahl. Pwe I en kapwaiada doadoahk me komwi ketikihong ie, I kin kelekelehpw nan ei lingeringer. 18 Dahme I wie lokolongki? Dahme ei ohla kan suwedkilahr mehlel? Dahme re sohte kak mwahukihla? Ia duwe, komwi men kansensuwedih ie duwehte piletik pwoat me kin madada ahnsoun karakar?”
19 KAUN-O eri ketin sapeng, mahsanih, “Ma ke pahn wekila oh pwurodo rehi, I pahn pwurehng wiahkinuhkala ei ladu. Ma ke pahn patohwanda duwen soahng kan me katapan, ahpw kaidehk me sohte katepe, ke pahn pwurehng wiahla ei soukohp. Oh aramas akan pahn pwurehng sohpeiong uhk oh kohdo rehmw; ahpw ke sohte pahn kohla rehrail. 20 I pahn wiahkinuhkala duwehte kehl prons ehu me sohte kak ohla. Re pahn uhwong uhk, ahpw re sohte pahn kaloweiukedi. Pwe I pahn kin ieiang uhk, pwe I en kin sinsileiuk oh seweseweiuk. 21 I pahn kapituhkala sang ni manaman en aramas suwed kan oh sounkam aramas akan. Ngehi, KAUN-O, me mahmahsen.”