22
Elipas
Kesiluhn Koasoakoasoipene
(22.1—27.23)
1-2 Mie aramas emen, me pil keieu loalokong,
me pahn mie katepe ong Koht?Sohp 35.6-8.
3 Omwi wiewia pwung wia kamwahu ong Koht,
de omw wiewia mwahu kin sewese?
4 Kaidehn pwehki omwi lemmwiki Koht
me e ketin kapwungkin komwi oh ketikinkomwilahng mwoalen kopwung.
5 Soh, ahpw pwehki omwi dipadahr kowahlap;
oh pwehki soahng suwed kan koaros me komw wiadahr.
6 Pwehn kak kapwungala en riomwo eh pweipwand ong uhk,
komw kihsang eh likou kan oh sohte ehu luhwe me en likawih.
7 Komw sohte men kanampile irail kan me pwangadahr,
oh kahng kamwenge irail kan me duhpeklahr.
8 Komw doadoahngki omwi manaman oh wahu
pwe komwi en sapwenikihla sahpwo pwon.
9 Kaidehte liohdi kan me komw kahng sewese,
ahpw komw pil pirapa oh wiakauwe me sepwoupwou kan.
10 Eri met, lidip tohto me kapilkomwipenehr,
oh komw ahpw mwadangete masepwehkada.
11 E inenen rotorotalahr oh komw solahr kak patohwan wasa,
oh lapake ehu koaduhpwalkomwidier.
12 Koht soh kin ketiket nanleng ileile kan
oh mahsendiong pohn usu kan, mehndahte ar ileilehie?
13 Oh met komw ahpw kalelapak, “Dahme Koht mwahngih?
Depwek kan kin karirihala ih—ia duwen e kak ketin kapwungohng kitail?”
14 Komw medemedewe me depwek mosul kan kin perehla pwe en dehr mahsanih wasa,
nindokon eh kin ketiketseli pahnlahng.
15 Komw koasoanedier komwi en alu nan ahl akan
me aramas suwed kan kin keid ie ahnsou koaros?
16 Mwohn ar ahnsou eh kin leledo
re kin peila nan lapake.
17 Ih soangen aramas pwukat me kin soikala Koht
oh kamehlele me sohte mehkot me e kak ketin wiahiong irail.
18 Ahpw iet pwe Koht me kin ketikihong arail pai—
I sohte kak wehwehki lamalam en me suwed akan.
19 Aramas mwahu kin nsenamwahu oh aramas mwakelekel kin kouruhr
ni ar kin kilang me suwed akan ar kin ale lokolok.
20 Mehkoaros me aramas suwed kin ahneki kin mwomwla,
oh kisiniei kin isikala mehkoaros me luhwe.
21 Eri, Sohp, peki mahk pahn kupwur en Koht
oh tokedihsang wiahki ih omw imwintihti;
ma komw pahn wia met, e ahpw pahn ketin kupwuramwahwihkomwihla.
22 Ale sapwellime padahk kan;
oh kolokol sapwellime mahsen kan nan kapehdomw.
23 Ei, komw pahn akitikitikla oh sohpeiong Koht
oh tokedihsang suwed koaros
me kin wiewiawi nan imwomw.
24 Kesehla noumw kohl koaros;
keselahng noumw kohl me keieu kaselel nan warawar en pihl madada kan.
25 Koht Wasa Lapalahpie en wiahla noumw kohl,
oh en wia noumw koasoakoasoak en silper.
26 Komw ahpw pahn likih Koht ahnsou koaros
oh diarada me iei ih me poahsoan en omw peren.
27 Ni omwi pahn kapakap, e pahn ketin sapeng komwi,
oh komw pahn kapwaiada inou kan me komw wiadahr.
28 Komw ahpw pahn pweida ni mehkoaros me komw pahn wia,
oh marain pahn daker nan elomw.
29 Koht kin ketin kasapwilidi me aklapalap akan
oh kin ketin doarehla me aktikitik kan.
30 E pahn ketin kapitkomwihla ma komw mwakelekel,
ma omwi wiewia pahn pwung.