34
1-2 Aramas ekei kumwail en me inenen loalokong oh koahiek;
kumwail rong dahme I koasoakoasoia.
3 Kumwail kin ese kisin tungoal mwahu ni amwail kin tungoale,
ahpw kumwail sohte kin ese mahsen en kupwurokong ni amwail kin rong.
4 Eri, kitail me pahn pein kapwungala repenpwung wet.
5 Sohp kosekose me ih ohl mwakelekel men,
ahpw dene Koht sohte ketikihong eh tungoal pwuhng.
6 E ahpw kalelapak, “Ia duwen ei kak likamw oh koasoia me ngehi me sapwung?
I ohlahr kowahlap, ahpw sohte dipei.”
7 Mie aramas emen duwehte ohl menet, Sohp?
E sohte mwahn kin kasalehda eh wauneki Koht.
8 E kin perenki iang aramas suwed kan
oh ieiangseli me dipan akan.
9 E kin koasoia me sohte katepen
eh pahn idawehn kupwur en Koht.
10 Kumwail rong ie, kumwail aramas akan me dehdehki!
Koht Wasa Lapalahpie kak ketin wiahda sapwung?
11 E kin ketin katingiheki aramas akan dahme re kin wia
oh ketin pwainohng irail duwen me konehng.Mel. 62.12.
12 Koht Wasa Lapalahpie sohte kin ketin wia me suwed;
e sohte kin ketin kupwur sapahrek ong emen.
13 Ia duwe, Koht kin ketin ale sapwellime manaman sang rehn emen tohtohr?
Mie emen me patohwanohng en ketin apwahpwalih sampah?
14 Ma Koht pahn pwurehng ketikihsang engin mour,
15 eri, me mour koaros pahn mehla
oh pwurehng wiepwella.
16 Eri, komw karonge ie, ma komw me loalokong.
17 Komw kadekadeik sapwellimen Koht pwung?
Komw medemedewe me e kin ketin kalahdeki pwuhng?
18 Koht kin ketin kadeikada nanmwarki kan oh kaun akan
ma re suwed oh sohte kateparail.
19 E sohte kin ketin uhpalihki kaun akan
de uhki me kepwehpwe kan sang me semwehmwe kan,
pwehki ih me ketin kapikada aramas koaros.
20 Aramas emen kakete mehla karuaru nipwong.
Koht kin ketin kaloke aramas, re ahpw kin sohrala;
e kin mengeiong ih en ketin kemehla me lapalap akan.
21 E kin ketin mwasamwasahn kahk koaros me aramas kin wia.
22 Sohte rotorot ehu
me kak ekihsang aramas dipan emen mwohn silangin Koht.
23 Koht sohte kin ketin kilelehdi ahnsou ehu
pwe aramas akan en patohla pahn kupwure oh ale kopwung.
24 E sohte ketin anahne roporop ehu en wiawi
pwehn ketikihsang kaun akan nan dewerail oh wiliankihdi ekei.
25 Pwehki e ketin mwahngih dahme re wiewia;
e kin ketin keseirailla oh tiakirailpeseng nipwong.
26 E kin ketin kaloke me dipan akan wasa me aramas koaros kak kilang,
27 pwehki ar kin sohpeisang
oh soikala sapwellime kosonned kan koaros.
28 Re idingohng me semwehmwe kan en likweriong Koht,
oh e ketin karonge ar likwer en pek sawas.
29 Ma Koht pahn ketin kupwurehda en dehr wia mehkot,
sohte emen kak kasapwunge ih.
Ma e pahn ketin karirihala silangi, e pahn sohla sawasepen aramas.
30 Sohte mehkot me wehi kan kak wia
pwe re en doareirailsang pahn kehnaudek en aramas akan me sohte ar Koht.
31 Sohp, komw sakarkidahngehr Koht dipomwi kan
oh inoukihda me komw solahr pahn pwurehng wiahda dihp?
32 Komw peki rehn Koht en ketin kasalehiong komwi omwi sapwung kan,
oh komw inoukihda me komw pahn tokedihsang wiewia me suwed?
33 Pwehki omwi sohte pwungki dahme Koht ketin wia,
eri, komw kasik en ketin kapwaiada dahme komw anahne?
Komwi me pahn wiewia met, kaidehn ngehi;
eri, komw koasoiaiong kiht met dahme omwi lamalam.
34 Aramas koaros me mie ar lamalam pahn pwungki;
aramas loalokong men me pahn rong ie pahn koasoia
35 me Sohp koasoakoasoi sang nan eh sawehwe
oh mehkoaros me e koasoia me sawehwe.
36 Kumwail medemedewe mehkoaros me Sohp koasoia;
kumwail pahn tehk pwe eh koasoi kan mwomwen koasoi en aramas suwed.
37 E kapatahiong dipe kan kahngohdi;
e ahpw lahlahwe Koht mwohtail koaros.