42
1 Sohp eri sapeng KAUN-O, patohwan,
Sohp
2 Maing KAUN, I patohwan ese me komwi me ketin manaman ong wia mehkoaros,
oh komw kin kak ketin wiahda mehkoaros me komw kin ketin kupwurki.
3 Komw ketin keinemwe ia duwen ei kak peikasalki sapwellimomwi kupwurokong,
ni ei sohte mwahn audaudki mehkot.
I patohwandahr duwen soahng kapwuriamwei
oh lapalap akan me I sohte dehdehki.Sohp 38.2.
4 Komw mahsanihong ie I en patohwan rong komwi nindokon omwi mahmahsen,
oh I en song sapeng sapwellim keinemwe kan.Sohp 38.3.
5 Eri, mahso I patohwan esehte dahme aramas teikan patohwanohng ie,
a met I pein patohwan kilangkinkomwiher mesei kat.
6 Iei me I patohwan namenengkilahr mehkoaros me I patohwandahr,
oh I koluhlahr nan pwelpar oh pehs pwukat.
Kaimwiseklahn Koasoiepen Sohp
7 Mwurin KAUN-O eh ketin mahsanihong Sohp mepwukat koaros, e ahpw mahsanihong Elipas, “I engieng laud pahmw oh pahn kompoakepahmw riemenen, pwehki amwail sohte koasoiada me mehlel duwen ngehi duwehte me ei ladu Sohp wia. 8 Eri met, kumwail ale kouwol isimen oh sihpw wol isimen oh wahwei rehn Sohp; kumwail ahpw meirongkihong ie ni adamwail. Sohp ahpw pahn kapakapkin kumwail, oh I ahpw pahn karonge eh pekipek oh sohte keriaikumwailla duwen me konehng kumwail. Pwe kumwail sohte koasoiada me mehlel duwen ngehi, duwehte me ei ladu Sohp wia.”
9 Elipas, Pildad, oh Sopahr eri kapwaiada me KAUN-O ketin mahsanihong irail. KAUN-O eri ketin karonge en Sohp eh kapakap.
10 Eri, mwurin Sohp eh kapakapki kompoakepah silimeno, KAUN-O ahpw ketin kapaiamwahwihala sapahl Sohp, oh ketikihong uwen tohtohn dipwisou pak riapak me e ahneki mahso.Sohp 1.1-3. 11 Rien Sohp pwutak oh serepein ko koaros, oh kompoakepah ko koaros en mahs, ahpw pwarodo reh ni imwe oh wiahda lapalahn kamadipw ehu. Re ahpw kamwait oh kasenamwahwihala sang apwal koaros me KAUN-O ketikihong. Emenemen irail eri kisekisehki kisin mwohni oh kisin rihng kohl.
12 KAUN-O eri kupwuramwahwihala luhwen ahnsoun mouren Sohp, ketikihong dipwisou tohtohsang mehn mahs ako. Pwe Sohp nainekihla sihpw 14,000, kamel 6,000, kou 2,000, oh ahs 1,000. 13 E pil nainekihla pwutak isimen oh serepein silimen. 14 E kihong eden serepein me laudo, Semihma,qSisen oh wehwehn eden nein Sohp serepein ko ni mahsen en Ipru kasalehda duwen ar kaselel, SEMIHMA wehwehki “mwuroi”, KESIA wehwehki “kasia” eden tuhke pwohmwahu ehu; oh KEREN-APPUK iei kisin kohpwa kis me lih akan kin kihong mehn kapwata masaraail kan loale. eden me keriemeno Kesia, oh me keieu tikitiko, Keren-appuk. 15 Sohte lih emen nin sampah pwon me kaselel oh masamwahu duwehte nein Sohp serepein ko. Arail pahpao eri pil kihong irail ar sohso duwehte me e kihong en nah pwutak ko.
16 Sohp eri momourki sounpar 140 mwurin met, e koanoahdi oh kilang nein nah seri kan, oh nein nah seri kan nair seri kan. 17 Mwuhr, e ahpw mehla ni eh ohl laudlahr mehlel.
q42:14: Sisen oh wehwehn eden nein Sohp serepein ko ni mahsen en Ipru kasalehda duwen ar kaselel, SEMIHMA wehwehki “mwuroi”, KESIA wehwehki “kasia” eden tuhke pwohmwahu ehu; oh KEREN-APPUK iei kisin kohpwa kis me lih akan kin kihong mehn kapwata masaraail kan loale.