Pwuhken NAHUM
Oaralap en Pwuhk wet
Pwuhken Nahum iei ngihs lingan pwoat me soukohpo wiahda, mehn kaparanihada aramas akan pwehki ohlahn Ninipe ni imwilahn senturi keisuh mwohn Krais. Kahnimw wet, iei poahsoan kaunen wehin Asiria, me imwintihtihiong Israel. Soukohpo wiahki ohlahn Ninipe kilel ehu duwen sapwellimen Koht kadeik ong wehi loallap suwed oh aklapalap wet Asiria.
Audepe ni Oaralap
Kadeik ong Ninipe 1.1-15
Ohlahn Ninipe 2.1—3.19
1
1 Iet mahsen ehu duwen Ninipe, koasoiepen kaudiahl ehu me wiawihong Nahum, mehn Elkos.Ais. 10.5-34; 14.24-27; Sep. 2.13-15.
Engieng en Kauno ong Ninipe
2 KAUN-O Koht sohte kin kupwurki emen en pahrekiong ih;
e kin ketin kaloke me kin uhwong.
E kin ketin dupukohng irail nan sapwellime engieng.
3 KAUN-O sohte kin ketin mwadang engiengda,
ahpw e me ketin manaman
oh sohte kin ketin mweidohng me dipan akan en sohte ale lokolok.
Wasa me KAUN-O kin ketin keid ie, melimel kin kohda;
depwek kan iei pwelpar me kin kohdahsang ni aluweluwe kan!
4 E kin ketin ruwese madau, e ahpw kin madada!
E kin ketin kupwurehda pillap akan en madada.
Mwaht akan en Pasan kin mengila,
Nahna Karmel kin pohnpwehlla,
oh rohs en Lepanon kan kin mengila.
5 Nahna kan kin rerrer mwohn silang en KAUN-O;
dohl kan kin peipeseng mwowe.
Sampah kin rerrer ni KAUN-O eh pahn ketido;
sampah oh towe kan koaros kin rerrer.
6 Ma e pahn ketin engiengda, ihs me kak pitsang?
Ihs me kak pitsang sapwellime engieng kowahlap?
Sapwellime engieng rasehng kisiniei;
paip akan kin mweredi wiahla pwelpar mwowe.
7 KAUN-O me ketin kupwur mwahu;
e kin ketin doandoare sapwellime aramas akan ni ahnsou apwal;
e kin ketin apwalih irail kan me kin sohpeiong.
8 E kin ketin kamwomwala douluhl sapwellime imwintihti kan rasehng lapake;
e kin ketin kemehla irail kan me kin uhwong.
9 Dahme kumwail koasoakoasoane nan kapehdamwail en uhkihong KAUN-O?
E pahn ketin kamwomwkumwailla.
Sohte mehmen kin uhwong tohtohsang pak ehu.
10 Kumwail pahn roangala douluhl
rasehng tuhke tekatek oh dihpw meng!
11 Ninipe, mie ohl emen me pwarada sang rehmw, me diren koasoandi suwed, e kin wia eh koasoandi suwed ong KAUN-O. 12 Iet me KAUN-O ketin mahsanihong sapwellime aramas akan en Israel: “Mehnda ma mehn Asiria kan me kehlail oh ngeder, ahpw re pahn mwomwla oh sohrala. Nei aramas akan, I kalokeikumwailehr, ahpw I sohte pahn pwurehng wia met. 13 Met I pahn katokedier en Asiria manaman pohmwail oh kauwehla selmete me salihkumwaildier.”
14 Iet me KAUN-O ketin koasoanehdi duwen Asiria: “Sohte pahn kadaudokarail me pahn kadakadaur adarail. I pahn kamwomwala dikedik en eni kan me mi nan tehnpas en arail koht kan. I kaukaunop sousou ehu ong mehn Asiria kan—re sohte konehng re en momour!”
15 Kilang, meninkeder men kohkohdo pohn nahna kan me weuwa rohng mwahu pwoat! E kohkodohn kalohkihda manaman en powehdi! Kumwail mehn Suda, kumwail wia amwail sarawi kan oh patohwanohng Koht dahme kumwail inoukihongehr. Me suwed kan solahr pahn pwurehng mahweniong sapwamwailo. Re mwomwlahr douluhl!Ais. 52.7.