10
1 Kepina Nehmaia nein Akalaia, me tepin sainih, oh Sedekaia ahpw sainih mwuri. Aramas pwukat pil iang sain:
2-8 Samworo kan:
Seraia, Asaria, Sermaia
Pahsur, Amaraia, Malkaisa
Addus, Sepanaia, Malluk
Arim, Meremod, Opadaia
Daniel, Kinnedon, Paruk
Mesullan, Apaisa, Misamin
Maasaia, Pilkai, oh Semaia
9-13 Mehn Lipai kan:
Sesua nein Asanaia
Pinnui peneineien Enadad,
Kadmiel, Sepanaia, Odaia,
Kelita, Pelaia, Ahnan,
Maika, Rehop, Asapaia,
Sakur, Serepaia, Sepanaia,
Odaia, Pani, oh Peninu.
14-27 Kaun akan en aramas akan:
Paros, Pahad Mohap,
Elam, Sattu, Pani,
Punni, Askad, Pepai,
Adonaisa, Pikpai, Adin,
Ater, Esekaia, Assur,
Odaia, Asum, Pesai,
Arip, Anadod, Nepai,
Makipas, Messulan, Esir,
Mesesapel, Sadok, Saddua,
Pelataia, Ahnan, Anaia,
Osea, Ananaia, Assup,
Allohes, Pila, Sopek,
Rehum, Asapna, Maaseaia,
Ahia, Ahnan, Anan,
Malluk, Arim, oh Paana.
Inowo
28 Kiht, mehn Israel, samworo kan, mehn Lipai kan, sounsilasil kan en Tehnpas Sarawio, sounkoul kan en Tehnpas Sarawio, tohndoadoahk kan en Tehnpas Sarawio, oh meteikan koaros me kin peikiong Kosonned en Koht, tohrohrsangehr mehn liki kan me kin koukousoan nan sapwatail, kiht, iangahki at pwoud kan oh nait seri koaros mahier oh kakehr en wehwehki, 29 me kitail pahn patehng atail kaun akan oh kahula, oh kitail pahn ale kalokolok en keria ehu ma kitail pahn kauwehla, kitail kahukihla me kitail pahn momour nin duwen Kosonned en Koht, me e ketikihong sapwellime ladu Moses; me kitail en peikiong mehkoaros me KAUN-O, atail Kaun, ketin mahsanihong kitail; oh me kitail pahn kapwaiada sapwellime kosonned koaros oh inengen kosonned kan.
30 Se sohte pahn pwoudikihda mehn liki kan me koukousoan nan sapwatailet.Eks. 34.16; Deud. 7.3.
31 Ma mehn liki men pahn wadohng kitail wahnsahpw de ehu soahng tohrohr pwe re en netikihong kitail ni rahnen Sapad de ehu rahn sarawi tohrohr, kitail sohte pahn pwain sang rehrail.
Ni keisuhn sounpar koaros kitail sohte pahn wia mwaht nan sahpwet, oh kitail pahn kemehla pweipwand koaros.Eks. 23.10-11; Lip. 25.1-7; b Deud. 15.1-2.
32 Nan sounpar koaros emenemen kitail pahn kihda welikis ehun ouns en silper pwehn sewese pwainkihda anahn akan en Tehnpas Sarawio.Eks. 30.11-16.
33 Kitail pahn pwukoahki kihda mehn kaudok pwukat ong Tehnpas Sarawio: pilawa sarawi, meirong en wahnsahpw ong rahn koaros, mahn me pahn isihsla rahn koaros nin duwen meirong isihs, meirong sarawi teikan, meirong en tomwki dipen mehn Israel, oh mehkoaros me anahnepe mie ong ni Tehnpas Sarawio.
34 Kiht, aramas akan, samworo kan, oh mehn Lipai kan, pahn kin wia usuhs nan sounpar koaros pwe se en rapahki mehnia peneinei me pahn kihda tuwi en isik meirong ong KAUN-O, atail Koht, nin duwen ineng en Kosonnedo.
35 Kitail pahn walahng nan Tehnpas Sarawio nan ehuehu sounpar ehu meirong en tepin dondoal en wahnsahpw oh mwohn atail wahntuhke kan.Eks. 23.19; 34.26; Deud. 26.2.
36 Neitail mesenih koaros pahn wisiklahng rehn samworo nan Tehnpas Sarawio oh wasao, ni ineng en Kosonnedo, serio pahn kasarawihong Koht. Kitail pahn pil kasarawihala mesenih en neitail kou, sihpw, oh kuht kan.Eks. 13.2.
37 Kitail pahn patohwanlahng rehn samworo nan Tehnpas Sarawio pilawa me tepin wiawihdahsang ni atail tepin dondoal en wahn pilawa nan sounpar koaros oh atail meirong teikan en wain, lehn olip, oh soangen wahntuhke koaros.
Kitail pahn patohwanlahng rehn mehn Lipai kan, me kin pwukoahki alehda eisek kis ehun atail mwaht akan en nan kousapw akan, eisek kis ehun wahntuhke me kin wosada nan sapwatail kan. Nempe 18.21. 38 Samworo kan me kadaudok en Aaron pahn iang mehn Lipai kan ni ahnsoun ar alehda wahnsahpw akan, oh mehn doadoahk en nan Tehnpas Sarawio, mehn Lipai kan pahn patohwanla nan wasahn nahk en Tehnpas Sarawio eisek kis ehun mehkoaros me re rikpenehr.Nempe 18.26.
39 Mehn Israel oh mehn Lipai kan pahn patohwanla wahn pilawa, wain, oh lehn olip me re rikpenehr nan perehn nahk me dipwisou kan en Tehnpas Sarawio kin nekinek loale, wasa me samworo, oh pwihnen koulen Tehnpas Sarawio kin memeir ie.
Se sohte pahn sohpeisang anahn akan en tehnpesen at Koht.