7
En Kaun akan ar Meirong
1 Ni rahn me Moses kaimwisekala kokoudahn Impwal me KAUN-O kin ketiket loale, e ahpw keiehla oh kasarawihala Impwalo iangahki dipwisawi kan koaros oh pil pei sarawio iangahki dipwisawi kan koaros. 2 Soupeidi en peneinei kan me wia kaunen kadaudok en Israel, iei irail ko me pil iang kaunda aramas akan me wadawadier, 3 irail ahpw patohwanda ar mehn meirong kan ong KAUN-O: kuruma weneu oh kou ehk riemen, ehu kuruma ong kaun riemen oh kou men ong kaun emen. Mwurin ar wapenehr dipwisou pwukat, 4 KAUN-O ahpw mahsanihong Moses, 5 “Ale meirong pwukat me pahn wia doadoahk ong ni Impwalo; ke ahpw kihong mehn Lipai kan pwehn wia doadoahk me re pahn wia.” 6 Moses eri patohwanohng mehn Lipai ko kuruma ko oh kou ko. 7 E kihong mehn Kerson kuruma riau oh kou pahmen, 8 oh kuruma pahieu oh kou welimen ong mehn Merari. Ar doadoahk koaros pahn kin wiawi pahn epwelpen Idamar, nein samworo Aaron. 9 Ahpw Moses sohte kihong mehn Kohad kuruma de kou, pwehki ar pahn kapaik dipwisou sarawi ko me re kin pwukoahki apwalih.
10 Kaun akan pil patohwanpene meirong kei mehn iang wia kasarawihpen pei sarawio. Ni ar onopadahr re en patohwanda ar meirong kan ni pei sarawio, 11 KAUN-O ahpw ketin mahsanihong Moses, “Patohwanohng irail me erein rahn eisek riau irekweite emenemen kaun pahn wahdo eh kisakis en kasarawih pei sarawiet.”
12-83 Irail eri patohwando ar meirong kan nin duwe met:
| Rahn | Kadaudok | Kaun |
| Keieu | Suda | Nahson, nein Aminadap |
| Keriau | Isakar | Nedanel, nein Suar |
| Kesiluh | Sepulon | Eliap, nein Elon |
| Kapahieu | Reupen | Elisur, nein Sedeur |
| Kelimau | Simion | Selumiel, nein Surisadai |
| Keweneu | Kad | Eliasap, nein Deuel |
| Keisuh | Epriam | Elisama, nein Ammihud |
| Kawaluh | Manase | Kamaliel, nein Pedasur |
| Keduwau | Pensamin | Apidan, nein Kideon |
| Kaeisek | Dan | Ashier, nein Amisadai |
| Kaeisek ehu | Aser | Pakiel, nein Okran |
| Kaeisek riau | Napdali | Aira, nein Enan |
Kisakis kan me emenemen patohwanda soahngteieu, me iei: ehu pwohl silper me toutouki ouns 50 oh ehu peisin silper me toutouki ouns 30 nin duwen me koasoandier, koaros diren pilawa doal leh mehn wia meirong en wahnsahpw; ehu dahl kohl me toutouki ouns 4, diren warpwohmwahu; emen koupwul wol, emen sihpw wol, oh emen sihmpwul me sounpar ehu, mehn wia meirong isihs; emen kuht, mehn meirong en dihp; oh pil kou wol riemen, sihpw wol limmen, kuht limmen oh sihmpwul limmen me sounpar ehu, mehn wia meirong en kaminimin.
84-88 Iet kan uwen tohtohn mehn meirong me kaun ehk riemeno wapene mehn wia kasarawihpen pei sarawio:
-pwohl silper eisek riau oh peisin silper eisek riau me toutoui patpene wiahda paun 60
-dahl kohl eisek riau me toutoui patpene wiahda ouns 48 me diren warpwohmwahu
-kou wol ehk riemen, sihpw wol ehk riemen, sihmpwul me sounpar ehu me ehk riemen, iangahki arail meirong en wahnsahpw, mehn wia meirong isihs.
-kuht ehk riemem, mehn meirong en dihp.
-kouwol riehk pahmen, sihpw wol wenehk, kuht wenehk, oh pil sihmpwul wenehk me sounpar ehu, mehn wia meirong en kaminimin.
89 Ni ahnsou me Moses patohla nan Impwalo pwehn patohong KAUN-O, e ahpw rongada duwen KAUN-O e ketin mahmahseniong sang pohn pweinen Kohpwahn Inowo nanpwungen kerupaKERUP: Tehk nan kawehwehpen lepin mahsen kan. riemeno.