LEPIN PADAHK AUDAPAN KAN
Oaralap en Pwuhk wet
Pwuhken Lepin Padahk Audapan Kan, iei lepin padahk duwen tiahk oh mour sarawi ni mwomwen lepin kahs kei oh lepin mahsen kei. Pali laud en lepin mahsen pwukat pid mouren aramas ni rahn koaros. Pwuhk wet tepkihda mehn kataman ehu me ketihtihki, “Ma ke loalokong, a ke uhdahn pahn lemmwiki Koht,” de “Tepin loalokong, iei lemmwiki Koht. Ekei pil pid soangen ire kei en tiahk mwahu en aramas emen oh pil tiahk kan me uhdahn konehng aramas koaros. Lepin mahsen mwotomwot tohto nan pwuhk wet kasalehda erpit en sounpadahk en Israel kawa ko, duwen dahme aramas loalokong men pahn wia ni soangen ahnsou kei. Ekei mahsen pwukat pidada mwomwen tiahk ni ahnsoun pokon ape, a ekei pidada anahn en emen en pein kaunda eh mwekid kan. Mahsen tohto pil mie duwen tiahk en mpahi, kanengamah, lamalam mwahu ong me semwehmwe kan, oh pil loalopwoatohng kompoakepahtail kan.
Audepe ni Oaralap
Kapingpen erpit 1.1—9.18
Lepin padahk kan en Solomon 10.1—29.27
Masen en Akur 30.1-33
Soangen lepin kahs teikan 31.1-31
1
Kesempwal en Lepin Padahk Audapan
1 Lepin padahk audapan en Solomon, sapwellimen Depit pwutak oh pil nanmwarkien Israel.1 Nan. 4.32.
2 Iet akan lepin padahk audapan kan, me pahn sewesei kumwail, pwe kumwail en kasawihada dahkot loalokong oh peneu mwahu, oh pil wehwehki lepin mahsen loal akan. 3 Lepin padahk pwukat kak padahkihong kumwail duwen amwail pahn momourki loalokong, oh duwen amwail pahn momourki inen, pwung, oh mwahu. 4 Re kak kakoahiekihala me soakoahiek kan, oh padahkihong me pwulopwul kan duwen ar pahn kak kapwaiada pwukoa tohto. 5 Lepin padahk pwukat pil kak kalaudehla loalokong en me loalokong kan, oh wia mehn kaweid ong me neksang sukuhl kan. 6 Eri, re ahpw pahn kak wehwehkihla wehwe rir en lepin padahk kan, oh pil peidek apwal kan me aramas loalokong kan kin kapwarehda.
Peneu ong Mwahnakapw Pwulopwul kan
7 Ma ke men loalokongla, ke uhdahn pahn lemmwiki Koht mwohn mehkoaros. Aramas soaloalokong kan sohte kin kesempwaliki loalokong, oh sohte men sukuhlki mehkot.Sohp 28.28; Mel. 111.10; Lep. Pad. 9.10; Sir. 1.14.
8 Samwa, rong mahsen en omw pahpa, oh rong kanahieng padahk en omw nohno. 9 Pwe ara padahk kan pahn kamwahwihala omw mour, rasehng mwomw mwahu en elin kapwat pohn mwoangomw de elin tuhke nin tepinweromw.
10 Samwa, ni me suwed akan ar pahn kasongsongeiuk, dehr lohdiong. 11 Mweinele re pahn nda, “Nna, kitail rapahki emen oh kemehla. Kitail peiong aramas me soh-dipe kan, pwe en wia mehn kaperen ong kitail. 12 Mehnda ma kitail pahn diar ar momour oh kehlail, a kitail kedarmourihrailla. 13 Kitail pahn diarada dipwisou kaselel tohto, oh kadirehkihla imwatail kepwehn kuhl kan. 14 Kohdo, iang kiht! Kitail ahpw pahn ahnekipene kepwe pirapada kan.”
15 Eri, samwa, dehr werekiong soangen aramas pwukat, a kadohwaniraileweisang rehmw. 16 Irail kin ngoangki wiahda me suwed. Ahnsou koaros re kin onohnop en kemehla aramas. 17 Sohte katepen omw pahn kihpeseng uhk pwoat mwohn menpihr men me ke men koledi, ni eh kilikilengdohng uhk. 18 A soangen aramas pwukat kin kaunopada lidip ehu ong pein irail. Re sohte pahn ehu ong pein irail. Re sohte pahn koledi mehkot, ihte pein mourirail. 19 Tiahk en pirap kin pirapahla pein mouren sounpirapo—ih met me kin wiawihong irail me kin momourki pirap.
Loalokong kin Likilikwer
20 Kumwail rong! Loalokong kin likilikwer nanial kan oh nan wasahn netinet kan;Lep. Pad. 8.1-3. 21 e kin likilikwer laud nan wenihmwen kelen kahnimw kan, oh pil wasa koaros me aramas kin pokonpene ie:
22 “Kumwail aramas pweipwei kan! Ia erein amwail pahn men mihmi nan soangen mour wet? Ia werein amwail pahn kin mwamwahliki loalokong? Kumwail sohte pahn wehwehkihla? 23 Kumwail rong ei peneu kan; I ahpw pahn kihong kumwail kaweid mwahu oh pil ei loalokong. 24 I kin ekehker kumwail, I lukei kumwail en kohdo, a kumwail sohte men rong. Kumwail sohte mwahn tehk mwahu. 25 Kumwail kin sohpeisang ei peneu kan, oh sohte mwahn men I en kapwungohng kumwail. 26 Eri, ma kumwail pahn lelohng ni apwal, a I pahn kouruhrkin kumwail. Ni amwail masepwehk laud, I pil pahn kouruhrkin kumwail— 27 ni mehn kamasepwehk kot eh pahn lelohng kumwail, me rasehng melimel ehu oh kisinieng en apwal me wadohng kumwail medek oh kansensuwed. 28 Ni ahnsowo kumwail pahn likweriong ie, a I sohte pahn sapeng. Kumwail pahn kakete raparapahkin ie wasa koaros, a kumwail sohte pahn diar ie. 29 Kumwail saikinte mwahn doadoahngki amwail loalokong, kumwail sohte kin men lemmwiki KAUN-O. 30 Kumwail sohte mwahn men alehda ei peneu, de kesempwaliki ei kapwung. 31 Eri, kumwail uhdahn pahn ale mehkoaros me konehng kumwail, oh amwail wiewia kan pahn kansensuwedih kumwail. 32 Aramas soakoahiek kan kin mehkihla ar sohpeisang loalokong. Aramas pweipwei kan kin mwomwkihla ar sohte medemedewe mwahu. 33 A ma mehmen pahn rong ie, e pahn ale komour. E pahn poadoandoarla, oh sohte kahrepen eh pahn masak mehkot.”