65
Koulen Kaping oh Kasapahlkalahngan rTITLE NI MAHSEN EN IPPRU: En Depit melkahka; koul pwoat.
1 Maing Koht, me pwung at pahn kapinga komwi nan Saion
oh kapwaiada at inou ong komwi,
2 pwehki omwi kin ketin sapeng pekipek kan.
Aramas koaros pahn pwarowei rehmwi
3 pwehki diparail kan.
Dipat kin kaloweikitedi,
komwi ahpw kin ketin mahkikihong kiht.
4 Meid pai irail kan me komwi ketin pilada,
me komwi ketikiniraildo pwe re en kin kousoan nan mwoalomwi sarawi.
Se pahn nsenamwahukihla soahng mwahu kan en nan tehnpasomwi sarawi,
kapai kan en Tehnpasomwi Sarawio.
5 Komw kin ketin sapeng kiht ni omwi mweidohng at pahn powehdi,
oh komw kin ketin komour kin kiht sapwellimomwi wiewia kapwuriamwei kan.
Tohn wehi koaros nin sampah kin likih komwi,
pil tohn deke doh en nan madau kan.
6 Sapwellimomwi manaman me koasoanedier nahna kan nan dewerail,
doadoahk wet kasaledahr sapwellimomwi manaman lapalap.
7 Komw kin ketin kameleileidi ngirisek en madau kan
oh ngilen pwuki kan,
oh pil mwoarong en aramas akan.
8 Tohn sampah koaros kin lemmwikin komwi
pwehki doadoahk laud akan en nin limomwi.
Wiepen nin limomwi kan kin kahrehda peren oh ngisingis,
sang ni palimese lel ni palikapi.
9 Komw ketin kasalehda omwi kupwure sampah ni omwi kin ketin kalamwurehki keteu;
komw ketin audekihla wahnsahpw oh pwehl mwahu.
Komwi ketin audehda piletik kan;
komwi ketikihong sampah wahntuhke kan.
Met iei duwen wiepen nin limomwi kan:
10 komw kin ketin kamwerehdi keteu pohn wasa deideida en poad wahnsahpw
oh kin ketin kalamwurehki nanpwel pwoaiken lahng;
komw kin ketin kamatarangkihla pwelen sahpw akan keteu,
oh kin ketin kakairada kisin tuhke kan.
11 Ia uwen lauden wahnsahpw me kin wosada sang ni sapwellimomwi kalahngan!
Wasa koaros me komw ketin keid ie, iei wasa me kepwe tohto kin mi ie.
12 Pelinmen kan kin audehla nan mohs kan,
keilen dohl akan kin pereperen.
13 Pelin sihpw kan kin kipe nan mohs kan;
nan wahu kan direkihla wahn pilawa.
Soahng koaros kin ngisingis oh koulki ar peren!