75
Koht me Sounkopwung eTITLE NI MAHSEN EN IPRU: En Asap melkahka; koul pwoat.
1 Maing Koht, se patohwan kapingkalahngan ong komwi,
se patohwan kapingkalahngan ong komwi!
Se patohwan kalohki roson lapalap en mwaromwi
oh se kin patohwan lohkiseli wiewia kapwuriamwei kan me komw ketin wiadahr.
2 Koht ketin mahsanih, “I koasoanedier ahnsoun ei kopwung,
oh I pahn wia kopwung ni me pwung.
3 Mehnda ma soahng koaros nin sampah pahn rerada
oh sampah pwon pahn itihtikek,
a I pahn katengehdi poahsoan en sampah pwe en teng.
4 I kin ndaiong aramas suwed akan re en dehr aklapalap oh pohnmwahso;
5 I kin ndaiong irail re en tokedihsang arail aksuwei.”
6 Kopwung sohte kin kohdo sang ni palimese de palikapi,
de paliepeng de palieir;
7 Koht iei sounkopwung,
rehn Koht ekei kin pakadeikada oh kalokolok a ekei kin kasaledekla.
8 KAUN-O kin ketiki kep ehu nin lime,
diren wain kehlail en sapwellime engieng.
E kin ketikihong aramas suwed akan koaros pwe re en nim;
re kin nimala koaros oh wekidedi.
9 Ahpw I sohte pahn tokedihsang lohkiseli duwen Koht en Seikop
de kokoulkihong koulen kaping.
10 E pahn ketin kauwehla manaman en aramas suwed kan,
e ahpw pahn ketin kakehlakahla manaman en aramas pwung kan.