99
Koht Nanmwarki Lapalahpie
1 KAUN-O iei nanmwarki,
eri aramas akan kin rerrerki ar masak.
E ket nan mwoale pohnangin kerup kan,
sampah ahpw wie rerrerki.Eks. 25.22.
2 KAUN-O nan Saion me manaman;
e ketin lapalap sang wehi koaruhsie.
3 Aramas koaros pahn kin kapinga lapalap oh lingan en mware.
Ih me sarawihe!
4 Maing nanmwarki lapalap, komw kin ketin poakohng dahme pwung;
komw ketin koasoanehdi mour en pwuhng nan wehin Israel;
komw ketikidohr pwuhng oh pahrek.
5 Kapinga KAUN-O atail Koht
oh kaudok mwohn mwoale!
Ih me Sarawihe!
6 Moses oh Aaron iei sapwellime samworo,
oh Samuel iei ih emen me kin kapakapohng;
irail kin likweriong KAUN-O, e ahpw kin ketin sapeng irail.
7 E ketin mahseniong irail sang nan uhren depweko;
re kapwaiadahr kosonned oh koasoandi kan me e ketikihong irail.Eks. 33.9.
8 Maing KAUN, at Koht, komw ketin sapengehr sapwellimomwi aramas akan;
komw ketin kasalehiong irail me komwi Koht emen me kin kupwurmahk,
mehnda ma komw kin ketin kalokehkin irail diparail kan.
9 Kapinga KAUN-O atail Koht
oh kaudok pohn sapwellime dohl sarawio! aDOHL SARAWI: Tehk 2.6.
KAUN-O atail Koht me sarawihe.