129
Kapakap en Uhwong Imwintihti en Mehn Israel
1 Israel, ndadohng kiht mahs duwen omw imwintihti kan ar kalokeiuk
sangete ni omw pwulopwul.
2 “Sang ni ei pwulopwul
ei imwintihti kan kalokehkin ie kalokolok mwuledek,
ahpw re so mwahn kaloweiehdi.
3 Re kalipwelipwehda tihnseweiet
duwehla wasa me kin deideidahr ong wasahn poad wahnsahpw.
4 Ahpw KAUN-O, ih me pwung,
e ketin kasaledekihiehla sang nan mour en lidu.”
5 Eri koaros me kin kailongki Saion
re en lohdi oh tangdoaui.
6 Irail koaros en duwehla dihpw me kin wosada pohn pwelengen ihmw,
me kin mengila mwohn eh pahn laudla;
7 me sohte me kin rikpene
de wahsang.
8 Sohte me kin keid limwah pahn nda,
“KAUN-O en ketin kupwuramwahwih kumwail!
Se kupwuramwahwih kumwail ni mwaren KAUN-O.”