143
Kapakap en Peki Sawas vTITLE NI MAHSEN EN IPRU: En Depit melkahka.
1 Maing KAUN, komw ketin karonge ei kapakap!
Komw ketin karonge ei pekipek ngidingid ni sapwellimomwi pwuhng;
komw ketin sapeng ie ni loalopwoat!
2 Komw dehr ketin kadeik ie, sapwellimomwi ladu menet;
sohte emen me sohte dipe mwohn silangmwi.Rom 3.20; Kal. 2.16.
3 Ei imwintihtio koliedier
oh poweiedier douluhl.
E ahpw keseiehlong nan imweteng rotorot ehu,
wasa I rasehngalahr me melahr akan kawao.
4 Ngeniet mwoatohtalahr;
oh I milahr nan pwunod laud.
5 I tamataman rahn akan me samwalahr;
I medemedewe duwen soahng koaros me komw ketin wiadahr,
oh katamandohng ie wiepen nin limomwi kan koaros.
6 I kapahda pehi kat ni ei kapakapohng komwi;
ngeniet tihwohkinkomwilahr rasehngalahr pwehl madekeng e kin anahne pihl.
7 Maing KAUN, komw ketin kupwure ie met!
Solahr ei koapworopwor.
Komw dehr ketin rirweisang ie,
pwe I dehr iang irail kan me kin kohdihla nan sapwen me melahr akan.
8 Komw ketin katamankin ie nimenseng koaros duwen sapwellimomwi limpoak poatopoat,
pwe I kin koapworopworkin komwi.
Ei tungoal kapakap akan kin kohdawohng rehmwi;
komw ketin kasalehiong ie ahl me I pahn keid ie.
9 Maing KAUN, I patohdo pahn kupwuromwi pwe komwi en ketin sinsilei ie;
komw ketin kapitiehla sang ei imwintihti kan.
10 Komwi me ei Koht;
komw ketin padahkihong ie duwen ei pahn kapwaiada kupwuromwien.
Komw ketin kupwur mwahu ong ie, oh kahluwa ie nan ahl me pwung.
11 Maing KAUN, komw ketin kapitiehla, nin duwen me komw ketin inoukidahr;
sang ni sapwellimomwi kupwur mwahu komw ketin doareiesang nan ei apwal akan!
12 Pwehki sapwellimomwi limpoak ong ie, komw ketin kemehla ei imwintihti kan
oh ketin kamwomwala koaros me kin kaloke ie,
pwe sapwellimomwi ladu ngehi.