1 Titikaonnta ngeꞌe tetuanꞌannta ixi xronichjeꞌenta ndo Dio, ko tinóatáanta ngajin ndo, ko tájonnta juasianta ngajin ndo ixi chao tsintee kain chujni. 2 Xrokonda tsjancheꞌenta ndo Dio ixi tsingijna ndo kain ni tetuanꞌan ixi jaña ícha jian tsojuna, meꞌe tsinteke̱to̱ꞌa chujni ko tsitikaonna ndo Dio ko jian sincheꞌena. 3 Kain jiꞌi jian ixi jaña tjaun ndo Dio, ndo tajon juachaxin tsechónna kain nchakon. 4 Ixi jeꞌe ndo tjaun ndo tsechón kain chujni kain nchakon ko tjaun ndo ixi tsonoꞌe na̱ chijnie ndo, chijni nduaxin. 5 Naakua ndo Dio jii ko naakua ngisen nichjaxin chujni ngajin ndo Dio, meꞌe ndo Jesucristo, ndo konoxin xranchi chujni ngataꞌa nunte xasintajni. 6 Jeꞌe Ncháina Jesucristo kuajon ndo aséen ndo ko kuenꞌen ndo, meꞌe jaña juenga ndo ꞌna̱ jíee chujni. Jiꞌi konꞌen xranchi ti tsindachro ndo Dio. 7 2Ti. 1:11.*Ndo Dio tjaun ndo tsonoꞌe chujni kain jiꞌi, méxin kuiyaꞌna ndo ko kuayáꞌa̱ ixra̱ sintanoꞌa chujni, ni jeꞌa judío, ixi tsitikaon na̱ Ncháina Jesucristo, ko tsonoꞌe na̱ ngeꞌe ti nduaxin. Ko janꞌan ti nduaxin nichja ixi titikaꞌon ndo Cristo.

8 Tjaꞌon ixi kain sen xi xronichjeꞌe sen ndo Dio ngixeꞌi ti no ste sen, ko tsjatsiꞌin itja sen ixi tjúá aséen sen, ko tsjakaxinꞌa kichuu sen, ni tsoñaoꞌa kichuu sen. 9 1Pe. 3:3.*Ko tjaꞌon ixi kain nchri ndako tsintetsáa nchra ko tsakeꞌa nchra manta ntarichi ti ícha sinchexroan ni xi, ko tsiteꞌa jaa nchra ixi tsikonni tsango tsoxruanta kuiꞌte jaa nchra, ko tsakeꞌa nchra ntachika oro o̱ ixro tjintee. 10 Jaña sincheꞌe sen nchra ti jian xranchi tikinixin ncheꞌe kain nchri tajon juasie ngajin ndo Dio. 11 Ko nchakon tsinꞌen sen nchri chijnie ndo Dio xrotenko sen ko tsitikaon sen kain ngeꞌe. 12 Ko tajonꞌa janꞌan juachaxin ixi sen nchri xronichja sen ti jii kueya chujni ko jeꞌe sen tsetuanꞌa sen ngajin ndoxiꞌe sen ko xrokonda xrotenko sen, 13 ixi ndo Dio saꞌó juinchéña ndo ndo Adán ko tjumeꞌe jan Eva. 14 Ko jeꞌa ndo Adán kuitikaon ndo juancheya tsindachro Xixronꞌanxrée. Jeꞌe jan Eva kuitikaon jan ngeꞌe nichja Xixronꞌanxrée, meꞌe kuama jan ijie̱. 15 Ko nchri xroꞌan tsonꞌen nchra siá sinchejongíꞌe nchra chjenꞌen nchra ko sinchekangi nchra xjan, ko siá tsitikaon nchra ndo Dio ko siá xrochuntia nchra ndo ko xrotjueꞌe nchra ndo ko jian xroxraxaon nchra.