1 Tjaunꞌa tsoniꞌe asáanta, méxin, ndajuasoꞌa ngajinnta. 2 Ixi siá tsoniꞌe asáanta, ¿tjumeꞌe ngisen xrochjána juaxruxin? ¿Xronkanta ti kondanaxin janꞌan koniꞌe asáanta? 3 Méxin, ikjin xroon xruanꞌannta ko juasoꞌa ngajinnta ixi tjaunꞌa xrojuincheníꞌenta aséenna. Janꞌan tjaꞌon ixi nchakon xrojuasó jaꞌanta ko janꞌanna xrobakeꞌena juaxruxin. 4 Ko nchakon ikjinna xroon xruanꞌananta, tsango jitoniꞌe aséenna ko tsjanga kaxon. Ko jeꞌa ikjin xroon ixi kaxon xrokoniꞌe asáanta. Naꞌi, jaña juintaꞌa ixi tjaꞌon xrokonoꞌanta ixi tsango tjuaꞌanta.

5 Tjaunꞌa ícha xronichja ixi xi juincheniꞌe aséenna, ixi jeꞌe xa jeꞌa janꞌon juinchenina xa. Naꞌi. Kaxon juincheniꞌe xa aséen kain jaꞌanta. 6 Kueyanta nichjeꞌenta xa ko koyakutéenta xa, ó chao, íxroꞌan ngeꞌe ndachenta xa. 7 Jai ó ncheméꞌenta ngaya asáanta ti ndakoꞌa juincheꞌe xa ko tingijnanta xa, ixi ba̱ kondeexin juachjaon meꞌe tsitjáña aséen xa. 8 Tinóatáana ngajinnta, tjakoꞌenta xa ixi nduaxin tjueꞌenta xa. 9 Xroon saꞌó kjinꞌannta ixi tjaꞌon tsonóna á nduaxin kuitikaonnta ngeꞌe kuetuanꞌannta. 10 Ko siá jaꞌanta tjáñaꞌanta ti ndakoꞌa juincheꞌe xa, kaxon janꞌan ó tjáñana ngeꞌe juincheꞌe xa. Méxin, siá xrojan ti ndakoꞌa juincheꞌe xa, janꞌan ó tjáñana meꞌe, ixi jaꞌanta jian tsinteenta. Ko ndo Cristo noꞌe ndo ixi ndatjáñana ngeꞌe juincheꞌe xa. 11 Ko jaña Xixronꞌanxrée xroꞌan ngeꞌe sincheꞌe xa ngajin jai̱na ixi jai̱na ó noi̱na xranchi ncheꞌe xa.

12 Hch. 20:1.*Nchakon ikjui tjajna Troas ixi xrojuako chijnie Ncháina Cristo, konóna ixi jeꞌe ndo kuajon ndo juachaxin xrojuako chijnie ndo ntiꞌa. 13 Ko maski jii juachaxin, jii juachjaon ixi kuitjaꞌi ndo kichuuna Tito. Méxin, tuinxin ntatjan sen ste ntiꞌa satji nunte Macedonia ko tjumeꞌe sakjui.

14 Juasie ndo Dio ixi jeꞌe ndo tingijnana ndo ko chondana juachaxien ndo Cristo Jesús. Ko kain ti no tjakona chijnie ndo, ixi ti tjakona xranchi naa ngeꞌe chaxro xraxe. 15 Ixi kain jai̱na chaxro xraxena xranchi naa tsjoxraxé tajon ndo Cristo tayéꞌe ndo Dio ixi jai̱na tjakona chijni jian ngajin sen chónda juachaxin tsechón kain nchakon ko ngajin ni xratayéꞌa juachaxin kaxon. 16 Ngajin ni chóndaꞌi juachaxin tsechón, ti chaxro xraxe meꞌe xranchi xrokuenxin na̱. Ko sen chónda juachaxin tsechón, ti chaxro xraxe meꞌe xranchi tajon juachaxin tsechón sen. ¿Ngisen chao tsjacha sincheꞌe ixra̱ kuetuai̱na ndo Dio? 17 Ko janꞌanna tjanchaꞌina tomi ixi tjakona chijnie ndo Dio xranchi ncheꞌe ikaxin na̱. Naꞌi. Janꞌanna ixi nchijíi aséena̱na tjakona chijnie ndo ixi jeꞌe ndo kuinchana̱na ndo sintaꞌana ixra̱ ngajin ndo Cristo.