1 Xi Saulo tsango ningakonꞌen xa sen titikaon Ncháina Jesús ko tjaun xa naatsóñaxón xa sen. Méxin, sakjui xa bijée xa xitaana tetuanꞌan 2 ko juanchia xa naa xroon chónda juachaxin satsji xa niꞌngo tjajna Damasco tsjée xa sen titikaon chijnie ndo Jesús ixi tsikao xa sen nchri ko sen xi tjajna Jerusalén xroxraxinꞌin xa sen ndoꞌachjiso. 3 Ko yaa xa chaꞌo ko ó xrokuiji xa tjajna Damasco, tuinxin kui̱i̱ naa xroꞌi kui̱xi̱n ngajní bingasáña ngandajin xa. 4 Ko xi Saulo kuitsinga xa nunte, ko kuinꞌen xa nichja naa ngisen ko ndachro:

―Saulo, Saulo, ¿sonda ningakonna̱na ko tengiana?

5 Ko tjumeꞌe xi Saulo juanchangi xa:

―¿Ngisen jaꞌanta?

Ko tée sen nichja, ndachro:

―Janꞌan ndo Jesús, ndo tsango ningakonꞌén.

6 Jeꞌe xa xranga xa ko xronka xa, ko jaꞌin ndachro xa:

―Jaꞌanta, ¿ngeꞌe tjaunnta sintaꞌa?

Ko Ncháina Jesús ndachro ndo:

―Tingatjén, tixinꞌia tjajna Damasco, ko ntiꞌa tsetuanꞌan ngeꞌe sincheꞌe.

7 Ko tjumeꞌe ni bijikao xi Saulo tsango xronka na̱ ixi kuinꞌen na̱ tée naa ngisen nichja ko xroꞌan ngisen bikon na̱. 8 Ko bingatjen xi Saulo ko kuantjeꞌe ikon xa ko xroꞌan ngeꞌe bikon xa. Ko ni tikao xa ngatséꞌe na̱ xa ko sabikao na̱ xa tjajna Damasco. 9 Ko ntiꞌa bakeꞌe xa níi nchakon, bikonꞌa xa ko juineꞌa xa ko xroꞌan ngeꞌe kuiꞌi xa.

10 Ko tjajna Damasco bakeꞌe naa ndo titikaon Ncháina Jesús ndatinꞌin Ananías, ko juachaxin espíritue ndo Dio tsikikonxin ndo ndo Jesús jaꞌin kuituanꞌan ndo Jesús ngajin ndo:

―Ananías.

Ko ndo Ananías juateꞌe ndo:

―Ntiꞌi ritjén, Nchána.

11 Ko ndachro Ndo Jesús:

―Tingatjén satjia chaꞌo ndatinꞌin Nao. Ko tjée ndoꞌa naa ndo ndatinꞌin Judas ko ntiꞌa tsinchíia naa xi ndatinꞌin Saulo tsiki̱ꞌxi̱n tjajna Tarso ko jeꞌe xa jinichjaꞌna xa, 12 ixi jeꞌe xa bikon xa naa xi ndatinꞌin Ananías tixinꞌin xa nchia ko tsakeꞌe itja xa ngataꞌa jaa jeꞌe xi meꞌe ko chao tsikon xa íjngo.

13 Ko ndo Ananías juateꞌe ndo:

―Nchána, ó kui̱nꞌa̱n ngeꞌe ndachro kueya chujni, ixi xi meꞌe ndakoꞌa ncheꞌe xa ngajin sen titikaon ngajinnta, sen ste tjajna Jerusalén. 14 Ko jai kui̱i̱ xa ntiꞌi ixi tsikayéꞌe xa juachaxien xitaana tetuanꞌan ixi tsikao xa kain sen titikaonnta.

15 Ko Ncháina Jesús ndachro ndo:

―Itjia ixi janꞌan kuinchaꞌa xi meꞌe ixi tsjako xa chijnina. Sinchekuenꞌen xa ni ste jée tjajna ko xi rey ko kaxon ni israelita, 16 ko janꞌan tsjakoꞌa xa ixi tsango tangi tsonꞌen xa ixi tsitikaonna xa.

17 Tjumeꞌe ndo Ananías sakjui ndo nchia ti jii xi Saulo ko bakeꞌe itja ndo ngataꞌa jaa xa ko ndachro ndo:

―Jaꞌa kichian Saulo, Ncháina Jesús, ndo bikuan ngatja chaꞌo, kuetuanna ndo juiꞌi ixi tsikuan íjngo ko tsayeꞌé Espíritue ndo.

18 Ko tuinxin kuintjíxin ikon xi Saulo naa ngeꞌe xranchi kjoꞌe kuchee̱, ko chao bikon xa íjngo. Ko bingatjen xa ko bikitée xa. 19 Ko tjumeꞌe juine xa ko chao konsoji xa íjngo. Ko kuituꞌe xa kaxin nchakon ngajin sen titikaon Ncháina Jesús tjajna Damasco.

20 Ko tjumeꞌe juangíxin ndo Saulo juako ndo ngaxinꞌin niꞌngo Israel ixi ndo Jesús, Chjenꞌen ndo Dio. 21 Kain ni jitinꞌen tsango xronka na̱ ko ndachro na̱:

―¿Á jeꞌa xi jiꞌi baruéꞌe ko bakoña kain ni titikaon ndo Jesús tjajna Jerusalén? ¿Á meꞌe kui̱ꞌxi̱n xa ntiꞌi ixi tsikao xa ni titikaon ndo Jesús ngajin xitaana tetuanꞌan?

22 Ko ícha xrakonꞌa xa juako xa ixi nduaxin ndo Jesús ndo Cristo. Ko ni judío bakeꞌe tjajna Damasco juaꞌi nichjangíꞌe na̱ ndo.

23 2Co. 11:32, 33.*Ko ó kuatsinga itsjé nchakon ko ni judío stexraxaon na̱ xranchi naatsóñaxón na̱ xi Saulo. 24 Ko ó konoꞌe ndo ti stexraxaon na̱. Ko tiie ko nchakon stechónꞌen na̱ ngandangi nduja tjajna ixi tjaun na̱ naatsóñaxón na̱ ndo. 25 Ko naa tiie sen titikaon Ncháina Jesús bakeꞌe sen ndo Saulo ngaya naa ntaxra ijié ko tjumeꞌe juinchexingajin sen ntaxra jiá ndo tuenxin tjatuꞌo jii ngandajin nduja tjajna. Meꞌe chao sabinga ndo.

26 Ko nchakon kuiji ndo Saulo tjajna Jerusalén tjaun ndo xrokui ndo ngajin sen titikaon Ncháina Jesús. Ko kain sen xronka sen ixi kuitikaonꞌa sen á nduaxin kaxon jeꞌe ndo ó titikaon ndo Ncháina Jesús. 27 Ko tjumeꞌe ndo Bernabé sabikao ndo ndo Saulo ti ste sen apóstol ko chronga ndo ixi ndo Saulo tsikikon ndo Ncháina ngatja chaꞌo ko Ncháina tsinichjeꞌe ndo ndo. Ko tjajna Damasco juako ndo Saulo nombrée Ncháina Jesús ko xronkaꞌi ndo. 28 Tjumeꞌe ndo Saulo kuituꞌe ndo tjajna Jerusalén ko chrikao ndo sen apóstol. Ko xrakonꞌa ndo tjako ndo chijnie Ncháina Jesús. 29 Ko jeꞌe ndo tjaun ndo tsjao ndo ni judío nichja griego ko jeꞌe na̱ tjaun na̱ naatsóñaxón na̱ ndo. 30 Tjumeꞌe sen titikaon ndo Cristo tsikinꞌen sen ngeꞌe xrokonꞌen ndo ko sabikao sen ndo tjajna Cesarea ko kuetuenꞌen sen ndo satsji ndo tjajna Tarso.

31 Ko tjumeꞌe sen titikaon Ncháina nchijíi nunte Judea, nunte Galilea ko nunte Samaria juaxruxin bakeꞌe sen ko ícha kuitikaon sen ndo Jesús. Kuachónda sen juasaya ngajin Ncháina ko Espíritue ndo Dio bingijna sen ko ícha konkueya sen.

32 Tjumeꞌe ndo Pedro kuitsjeꞌe ndo kain sen titikaon Ncháina Jesús. Kaxon sakjui ndo kuitsjeꞌe ndo sen titikaon Ncháina ste tjajna Lida. 33 Ntiꞌa kuitja ndo naa xi ndatinꞌin Eneas. Ijní nano jitsingataꞌa xa kania ixi tsikenꞌen yui tutée xa. 34 Ko ndachro ndo Pedro:

―Eneas, ndo Jesucristo sintaxruanꞌan ndo jai. Tingatjen tatsían kaniaꞌa.

Ko tjumeꞌe xi Eneas tuinxin bingatjen xa. 35 Ko kain ni jii tjajna Lida ko tjajna Sarón bikon na̱ ixi koxruenꞌen xa ko kaxon jeꞌe na̱ kuitikaon na̱ Ncháina Jesús.

36 Ko nchakon meꞌe bakeꞌe naa nchri tjajna Jope titikaon nchra Ncháina ko ndatinꞌin nchra Tabita ko ngigua griego xrondachro Dorcas. Ko jeꞌe nchra jian juincheꞌe nchra ko bingijna nchra ni nóa. 37 Tjumeꞌe naa nchakon tsango koniꞌe nchra ko ndakuenꞌen nchra. Ko juinéma sen cuerpoe nchra ko bakeꞌe sen nchra ti piso yuxin noi. 38 A̱ tjajna Jope jii tjajna tjenka tjajna Lida, ntiꞌa bakeꞌe ndo Pedro. Ko sen titikaon Ncháina noꞌe sen ixi ntiꞌa jii ndo. Ko tjumeꞌe xruanꞌan sen yuu sen xrondache sen ndo ixi tuinxin tsi̱i̱ ndo ko tsonchrjenꞌa ndo.

39 Ko tjumeꞌe sabikao sen ndo Pedro. Ko kuiji sen ntiꞌa ko tuinxin bikao sen ndo ti jii cuerpoe nchri tsikenꞌen. Ntiꞌa ste kain nchri kaꞌan tsango tsjanga nchra ko juako nchra kain manta tsijaon nchri Dorcas nchakon xrabakechón nchra. 40 Tjumeꞌe kuetuanꞌan ndo Pedro ixi kain na̱ tsachrje na̱ nduja. Ko bakeꞌexin ntatuchiꞌin ndo ko nichjeꞌe ndo ndo Dio. Ko jitsjeꞌe ndo nchri tsikenꞌen ko ndachro ndo:

―Tabita, tayá.

Ko jeꞌe nchra kuantjeꞌe ikon nchra ko bikon nchra ndo Pedro ko bakeꞌe nchra nunte. 41 Ko tjumeꞌe itsé ndo itja nchra ko juinchengatjen ndo nchra. Ko kuiyeꞌe ndo kain sen titikaon Ncháina ko kaxon kain nchri kaꞌan ixi tsikon sen ó tsixechón nchra. 42 Tjumeꞌe kain ni jii tjajna Jope konoꞌe na̱ ngeꞌe juincheꞌe ndo Pedro ko itsjé na̱ kuitikaon na̱ Ncháina Jesús. 43 Tjumeꞌe ndo Pedro kuituꞌe ndo itsjé nchakon tjajna meꞌe ko bakeꞌe ndo ndoꞌa ndo Simón, naa ndo kuanchexema tjueꞌé iko.